ដោយ: គង់ លាងហួរ
អន្តរជាតិ: ទីផ្សារអចលនទ្រព្យលំនៅឋានរបស់រដ្ឋធានីម៉ានីលនៅប្រទេសហ្វីលីពីនសម្រេចបានសន្ទុះយ៉ាងរឹងមាំក្នុងត្រីមាសទី៣ ឆ្នាំ២០២៥ ស្របពេលដែលតម្រូវការកើនឡើង ទោះបីជាអត្រាផលចំណេញពីការវិនិយោគមានកម្រិតទាបយ៉ាងណាក្តី។
លោក Roy Amado Golez Jr. អ្នកជំនាញនៅក្រុមហ៊ុនប្រឹក្សាអចលនទ្រព្យ Leechiu Property Consultants បានអះអាងថា ទីផ្សារកំពុងបង្ហាញសញ្ញានៃការស្ទុះងើបឡើងវិញ ខណៈតម្រូវការបានកើនឡើងដល់កម្រិតខ្ពស់បំផុតក្នុងរយៈពេលជិត២ឆ្នាំ។
លោកបានបន្តថា ទីផ្សារកំពុងមានភាពប្រសើរឡើង។ ប៉ុន្តែ ផ្ទះភាគច្រើននៅតែមានតម្លៃថ្លៃសម្រាប់ប្រជាជនហ្វីលីពីន ដែលមានប្រាក់ចំណូលមធ្យម។ ការបង្រួមគម្លាតជាគន្លឹះចាំបាច់ក្នុងការធានាបាននូវកំណើនប្រកបដោយបរិយាបន្ន។
ចាប់តាំងពីឆ្នាំ២០១៩មក តម្លៃខុនដូនៅតំបន់ពាណិជ្ជកម្មកណ្តាល Makati ក្នុងរដ្ឋធានីម៉ានីលបានហក់ឡើង៣៨ភាគរយ បើធៀបនឹងកំណើន១៥ភាគរយនៃប្រាក់ចំណូលជាមធ្យមរបស់ប្រជាជនហ្វីលីពីន។
នៅត្រីមាសទី៣ ឆ្នាំ២០២៥ ការបើកដំណើរការលក់លំនៅឋានថ្មីបានកើនឡើង០,៣ភាគរយធៀបនឹងត្រីមាសទី២ ដល់ចំនួន១.៧៦៦យូនីត ខណៈតម្រូវការបានកើនឡើងដល់ចំនួន៧.៧១៣យូនីត ស្របពេលមានការបន្ធូរបន្ថយអត្រាការប្រាក់ដោយធនាគារកណ្តាលហ្វីលីពីន៕ប្រភព: Bilyonaryo៕
