ដោយ: សហសេវិក
អន្តរជាតិ: យោងតាមសារព័ត៌មាន NHK បានរាយការណ៍ថា តម្លៃខុនដូប្រភេទទី២ ស្ថិតនៅចំកណ្តាលទីក្រុងតូក្យូរបស់ប្រទេសជប៉ុនបន្តកើនឡើង ដោយតម្លៃខុនដូជាមធ្យមនៅតែបន្តមានទំហំទឹកប្រាក់លើសពី១០០លានយ៉េនក្នុងរយៈពេល៧ខែជាប់ៗគ្នា។
ក្រុមហ៊ុនស្រាវជ្រាវអចលនទ្រព្យ Tokyo Kantei បានអះអាងថា តម្លៃខុនដូប្រភេទទី២ ជាមធ្យម ដែលមានទំហំ៧០ម៉ែត្រការ៉េស្ថិតនៅសង្កាត់ចំនួន២៣ នៃទីក្រុងតូក្យូមានទំហំទឹកប្រាក់ជិត១១៥លានយ៉េន (ប្រមាណ៧៣០.០០០ដុល្លារ) កាលពីខែវិច្ឆិកា។
តួលេខខាងលើបង្ហាញពីការហក់ឡើងចំនួន៣៤,៦ភាគរយបើធៀបនឹងខែវិច្ឆិកាដូចគ្នាកាលពីឆ្នាំ២០២៤កន្លងមក។
-->
តម្លៃខុនដូអាចមានការប្រែប្រួលយ៉ាងខ្លាំងអាស្រ័យទៅតាមទីតាំង។ នៅក្នុងសង្កាត់ទាំង៦ ដែលស្ថិតនៅចំកណ្តាលបំផុតនៃទីក្រុងតូក្យូ តម្លៃខុនដូជាមធ្យមមានទំហំទឹកប្រាក់ប្រហែល១,១៤លានដុល្លារក្នុងមួយយូនីត។
តម្លៃខុនដូនៅក្នុងសង្កាត់ភាគខាងត្បូង និងភាគខាងលិចចំនួន៦ មានទំហំទឹកប្រាក់ចំនួន៦០៤.០០០ដុល្លារ ខណៈតម្លៃខុនដូនៅក្នុងសង្កាត់ចំនួន១១ ផ្សេងទៀតមានទំហំទឹកប្រាក់ជាមធ្យមប្រហែល៤៦៤.០០០ដុល្លារ។
ដោយឡែក ខុនដូនៅខាងក្រៅទីក្រុងតូក្យូ មានតម្លៃទាបជាងនេះ។ តួយ៉ាង តម្លៃខុនដូជាមធ្យមនៅទីក្រុងអូសាកាមានទំហំទឹកប្រាក់ប្រហែល៣៥៤.០០០ដុល្លារ ខណៈតម្លៃខុនដូជាមធ្យមនៅទីក្រុងយូកូហាម៉ា មានទំហំទឹកប្រាក់ចំនួន២៨៦.០០០ដុល្លារ។
ក្រុមហ៊ុន Tokyo Kantei លើកឡើងថា ខណៈតម្លៃខុនដូនៅចំកណ្តាលទីក្រុងតូក្យូបន្តកើនឡើង តម្រូវការខុនដូនៅតំបន់ជាយក្រុងក៏កំពុងកើនឡើងផងដែរ ដែលជំរុញឱ្យតម្លៃខុនដូនៅជាយក្រុងកើនឡើងផងដែរ៕ប្រភព: NHK World៕
