ដោយៈ ម៉ាណា
ភ្នំពេញៈ ក្រុមការងាររបស់រដ្ឋាភិបាល ទទួលបន្ទុកលើការជំរុញការវិនិយោគនៅខេត្តព្រះសីហនុ បានចុះត្រួតពិនិត្យនៅនឹងកន្លែងលើគម្រោងឧស្សាហកម្មធំៗចំនួនប្រាំ ដើម្បីគាំទ្រដល់វិនិយោគិន និងធានាដល់ការអនុវត្តគម្រោងដោយរលូន ក្រោមកម្មវិធីពិសេសដើម្បីជំរុញការវិនិយោគ។
ការចុះត្រួតពិនិត្យនេះ ត្រូវបានធ្វើឡើងកាលពីថ្ងៃទី២៦ ខែធ្នូ និងដឹកនាំដោយលោក ហ៊ាន សាហ៊ីប ទីប្រឹក្សាលោកនាយករដ្ឋមន្ត្រី និងជាប្រធានក្រុមការងារជំរុញការវិនិយោគក្នុងខេត្តព្រះសីហនុ រួមជាមួយអភិបាលខេត្តព្រះសីហនុ លោក ម៉ាង ស៊ីណេត និងមន្ត្រីរដ្ឋបាលខេត្តផងដែរ។
-->
គណៈប្រតិភូ បានចុះទៅពិនិត្យគម្រោងវិនិយោគចំនួនប្រាំ ដែលមានទីតាំងស្ថិតនៅក្នុងខេត្តព្រះសីហនុ ក្រុងកំពង់សោម និងស្រុកព្រៃនប់។ គម្រោងទាំងនេះ រួមមាន រោងចក្រផលិតខ្សែភ្លើង និងខ្សែកាបដែលដំណើរការដោយក្រុមហ៊ុន Empire Electrical Cable Co., Ltd, រោងចក្រកែច្នៃអាលុយមីញ៉ូមដែលដំណើរការដោយក្រុមហ៊ុន Cambodia Kuna New Energy Co., Ltd, រោងចក្រផលិត និងផ្គុំគ្រឿងសង្ហារិមដែលដំណើរការដោយក្រុមហ៊ុន Bo Kang Industry (Cambodia) Co., Ltd, រោងចក្រកែច្នៃដែកថែបដែលដំណើរការដោយក្រុមហ៊ុន Haule Steel; និងរោងចក្រផលិតបំពង់ដែកដែលដំណើរការដោយក្រុមហ៊ុន Deep Oil Field Cambodia Co., Ltd.។
គម្រោងឧស្សាហកម្មទាំងប្រាំនេះ តំណាងឱ្យការវិនិយោគសរុបប្រមាណ១៣៨លានដុល្លារ ហើយត្រូវបានគេរំពឹងថានឹងបង្កើតការងារប្រហែល១០៧០កន្លែង។
លោក ហ៊ាន សាហ៊ីប បានមានប្រសាសន៍ថា ការចុះត្រួតពិនិត្យនេះមានគោលបំណង តាមដានការអនុវត្តគម្រោង វាយតម្លៃវឌ្ឍនភាពនៅនឹងកន្លែង និងស្តាប់ដោយផ្ទាល់ពីវិនិយោគិនអំពីកង្វល់ និងបញ្ហាប្រឈមរបស់ពួកគេ។
លោកបានបន្ថែមថា ដំណើរចុះត្រួតពិនិត្យនេះ ក៏បានស្វែងរកដំណោះស្រាយជាក់ស្តែង និងវិធានការសម្របសម្រួល ទន្ទឹមនឹងការជំរុញដល់ការប្រើប្រាស់កម្លាំងពលកម្មក្នុងស្រុក ការផ្ទេរជំនាញនិងបច្ចេកវិទ្យាកាន់តែច្រើន និងការប្រើប្រាស់សម្ភារៈផលិតក្នុងស្រុក ឱ្យបានកាន់តែច្រើននៅក្នុងរោងចក្រ និងសហគ្រាសនានាទូទាំងខេត្ត។
ក្រុមការងារបានឱ្យដឹងថា ការចុះត្រួតពិនិត្យនេះ ជាផ្នែកមួយនៃការទទួលខុសត្រូវជាបន្តបន្ទាប់របស់ខ្លួន ក្នុងការផ្តល់ជូនវិនិយោគិននូវសេវាថែទាំបន្ទាប់ ពីការវិនិយោគក្រោមកម្មវិធីវិនិយោគពិសេស ដោយមានកិច្ចសហប្រតិបត្តិការយ៉ាងជិតស្និទ្ធ ជាមួយរដ្ឋបាលខេត្តព្រះសីហនុ។ គួរកត់សម្គាល់ថា កិច្ចខិតខំប្រឹងប្រែងទាំងនេះ បានជួយពង្រឹងទំនុកចិត្តវិនិយោគិន និងកែលម្អបរិយាកាសវិនិយោគទាំងមូល។
តំណាងក្រុមហ៊ុននានា បានសម្តែងការពេញចិត្ត ចំពោះការសម្របសម្រួល ការយកចិត្តទុកដាក់ និងការលើកទឹកចិត្តដែលផ្តល់ដោយអាជ្ញាធរក្រោមកម្មវិធីពិសេស ដើម្បីជំរុញការវិនិយោគ នៅខេត្តព្រះសីហនុ។
រដ្ឋាភិបាលក៏បានបញ្ជាក់ជាថ្មី នូវការសម្រេចចិត្តរបស់ខ្លួនក្នុងការពង្រីកកម្មវិធីវិនិយោគពិសេស សម្រាប់រយៈពេលពីរឆ្នាំបន្ថែមទៀត រហូតដល់ចុងឆ្នាំ២០២៧ ខណៈរក្សាវិធានការដែលមានស្រាប់ និងណែនាំគំនិតផ្តួចផ្តើមបន្ថែម ដែលផ្តោតលើការជំរុញការវិនិយោគ ក្នុងស្រុក ការបណ្តុះបណ្តាលជំនាញ ការប្រើប្រាស់កម្លាំងពលកម្មក្នុងស្រុក និងការប្រើប្រាស់ធាតុចូលដែលផលិតក្នុងស្រុក។
ក្រុមការងារបានអំពាវនាវដល់វិនិយោគិន និងប្រតិបត្តិករអាជីវកម្មឱ្យបន្តចែករំលែកមតិយោបល់ និងសំណូមពរ ដើម្បីជួយអាជ្ញាធរផ្តល់ការគាំទ្រ និងដំណោះស្រាយទាន់ពេលវេលា៕
