ដោយៈ រ៉ាណេត
ភ្នំពេញៈ ពេលវេលាគឺជាបញ្ហាសំខាន់បំផុតសម្រាប់អ្នកជំនួញគ្រប់រូប ជាពិសេសអ្នកមានមុខជំនួញច្រើននៅក្នុងដៃ ដែលចាំបាច់ត្រូវតែមានការបែងចែក និងគ្រប់គ្រងឱ្យច្បាស់លាស់ ដើម្បីដំណើរការប្រកបដោយភាពរលូន និងជោគជ័យ។
ចង់ដឹងទេថា ការគ្រប់គ្រង និងបែងចែកពេលវេលាដែលល្អបំផុត ត្រូវធ្វើឡើងយ៉ាងដូចម្ដេចនោះ សូមស្វែងយល់ជាមួយការបង្ហើបពីលោកបណ្ឌិត Michael S.Nhim ដៃគូវិនិយោគក្រុមហ៊ុន Care Group និងជាអ្នកដែលមានមុខជំនួញច្រើនដំណើរការរួមគ្នាក្នុងពេលតែមួយ។
-->
លោកបណ្ឌិត Michael S.Nhim បានមានប្រសាសន៍ប្រាប់ឱ្យដឹងថា មិនថាចំពោះតែអ្នកដែលមានមុខជំនួញច្រើនប្រភេទ ឬមានក្រុមហ៊ុនច្រើនដែលកំពុងដំណើរការរួមគ្នានៅក្នុងពេលតែមួយនោះទេ ដែលត្រូវមានការបែងចែកពេលវេលាក្នុងការគ្រប់គ្រង ក្នុងនោះសូម្បីតែអ្នកដែលមានក្រុមហ៊ុនតែមួយ ឬមុខជំនួញតែមួយក្នុងដៃក៏ត្រូវតែមានភាពច្បាស់លាស់ក្នុងការគ្រប់គ្រងពេលវេលានេះផងដែរ។
លោកបន្តថា “នៅពេលមានការបែងចែកពេលវេលា និងការគ្រប់គ្រងទៅលើមុខជំនួញមិនបានត្រឹមត្រូវ នោះមានន័យថា ដំណើរការរបស់ក្រុមហ៊ុនក៏មិនមានភាពច្បាស់លាស់ គ្មានភាពរលូន ដែលអាចឈានដល់ភាពបរាជ័យលើមុខជំនួញយ៉ាងប្រាកដ”។ លោកបានបន្តទៀតថា “អ្នកជំនួញដែលមានក្រុមហ៊ុនច្រើននៅក្នុងដៃ និងកំពុងតែដំណើរការព្រមគ្នា ចំពោះការគ្រប់គ្រង និងបែងចែកពេលវេលាដែលល្អបំផុតនោះ គឺត្រូវតែមានការកត់ត្រាកាលវិភាគសម្រាប់ប្រតិបត្តិការ និងការបំពេញភារកិច្ចយ៉ាងត្រឹមត្រូវច្បាស់លាស់ដោយខ្លួនឯង ឬអាចមានអ្នកជំនួយការ ដែលគេហៅថាលេខាផ្ទាល់ខ្លួនធ្វើកំណត់ត្រាជាប្រចាំ ហើយនឹងអនុវត្តទៅតាមការកត់ត្រាទាំងនោះជាបន្តបន្ទាប់”។
លោកបណ្ឌិត Michael S.Nhim បានបន្តទៀតថា ក្រៅពីមានការបែងចែកពេលវេលាឱ្យបានត្រឹមត្រូវ និងច្បាស់លាស់ ការគ្រប់គ្រងលើដំណើរការនៃប្រតិបត្តិការក្រុមហ៊ុនក៏សំខាន់ដូចគ្នា ដើម្បីអាចរីកចម្រើនលូតលាស់ និងជោគជ័យ។ គ្មានអ្នកណាម្នាក់ដែលអាចធ្វើការ១០ប្រភេទ នៅក្នុងពេលតែមួយប្រកបដោយប្រសិទ្ធភាពនោះទេ ប៉ុន្តែអ្វីដែលចាំបាច់ត្រូវធ្វើនោះគឺការចេះគ្រប់គ្រង និងការចេះប្រើមនុស្សតាមប្រព័ន្ធ Digital។
លោកបន្តថា អ្នកគ្រប់គ្រងដែលជាម្ចាស់ក្រុមហ៊ុន ត្រូវតែផ្តល់ភារកិច្ចបន្តទៅឱ្យមនុស្សក្រោមឱវាទ ដែលមានជំនាញច្បាស់ លាស់អនុវត្តន៍ ជំនួសជាមួយនឹងការផ្តល់នូវសិទ្ធិអំណាចក្នុងការសម្រេចចិត្តដល់ពួកគាត់ ហើយរង់ចាំទទួល និងពិនិត្យរបាយការណ៍។ នៅពេលមានរបាយការណ៍ដែលបង្ហាញពីការជួបឧបសគ្គ ក្នុងនាមជាអ្នកដឹកនាំ និងគ្រប់គ្រងត្រូវតែមាន ការសម្រេចចិត្តខ្ពស់ ក្នុងការផ្តល់នូវដំណោះស្រាយបន្ទាន់ ដើម្បីកែប្រែស្ថានការណ៍ឱ្យមករកភាពល្អប្រសើរវិញ ហើយនៅពេលអ្នកក្រោមឱវាទអនុវត្តប្រកបដោយគុណភាព និងជោគជ័យទៅលើភារកិច្ច ក្នុងនាមជាអ្នកគ្រប់គ្រងក៏ត្រូវមានការលើកទឹកចិត្តផងដែរ។
យ៉ាងណាក៏ដោយ លោក Michael S.Nhim ក៏បានបញ្ជាក់ផងដែរថា ការរៀបរាប់ខាងលើនេះ គឺគ្រាន់តែជាវិធីសាស្ត្រមួយ ក្នុងចំណោមវិធីសាស្ត្រជាច្រើនទៀត ដែលវាក៏អាស្រ័យទៅលើប្រភេទ និងទំហំនៃមុខជំនួញផងដែរ៕
