ដោយ វុត្ថា
ភ្នំពេញ៖ វិនិយោគិនរបស់ក្រុមហ៊ុនវិនិយោគធំៗ របស់សាធារណរដ្ឋបេឡារុស នឹងមកសិក្សាស្វែងឪកាសវិនិយោគ ដើម្បីបង្កើនទំហំពាណិជ្ជកម្មនិងពង្រឹងកិច្ចសហប្រតិបត្តិការសេដ្ឋកិច្ចនៅក្នុងប្រទេសកម្ពុជា ខណៈទំហំពាណិជ្ជកម្មនៃប្រទេសទាំងពីរនៅមានកម្រិតទាបនៅឡើយ។
នៅក្នុងជំនួបពិភាក្សាការងារជាមួយលោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា នៅថ្ងៃទី២៣ ខែមេសា ឆ្នាំ ២០១៩ នេះ លោក Vlafimir Goshin ឯកអគ្គរដ្ឋទូតសាធារណរដ្ឋបេឡារុសប្រចាំកម្ពុជា បានឲ្យដឹងថា លោកនឹងដឹកនាំគណៈប្រតិភូប្រទេសបេឡារុស មកប្រទេសកម្ពុជា ដើម្បីមកសិក្សាស្វែងយល់ពីបរិយាកាសសេដ្ឋកិច្ចដោយផ្ទាល់ អោយបានកាន់តែច្បាស់លាស់។
-->
លោកឧកញ៉ាលឹម ហេង បានសម្តែងការស្វាគមន៍យ៉ាងកក់ក្តៅ និងគាំទ្រយ៉ាងពេញទំហឹងចំពោះការលើកឡើលោកឯកអគ្គរដ្ឋទូត ក្នុងការដឹកនាំធុរជនប្រទេសបេឡារុស មកកាន់ប្រទេសកម្ពុជា។
លោកឧកញ៉ា ក៏បានលើកទឹកចិត្តឲ្យប្រទេសបេឡារុស វិនិយោគទៅលើវិស័យកសិកម្ម ដូចជាការដាំដុះ និងការបង្កើតរោងចក្រនៅប្រទេសកម្ពុជា និងជម្រុញឲ្យមានការហោះហើរត្រង់មកកាន់កម្ពុជា ព្រោះកម្ពុជាមានវិស័យទេសចរណ៍ ដែលមានប្រាសាទអង្គរវត្តដ៏ល្បីល្បាញ និងឆ្នេរសមុទ្រដ៏ស្រស់ស្អាត ផងដែរ ដែលសុទ្ធតែជា វិស័យមានសក្តានុពលនៅប្រទេសកម្ពុជា។
លោកឧកញ៉ាលឹម ហេងបានបញ្ជាក់ថា ដោយសារទំហំពាណិជ្ជកម្មរវាងប្រទេសកម្ពុជា និងបេឡារុស មានត្រឹមតែ៦លានដុល្លារកាលពីឆ្នាំ២០១៨ កន្លងមកនេះ ដូច្នេះហើយបានជាឯកអគ្គរដ្ឋទូតសាធារណរដ្ឋបេឡារុសប្រចាំកម្ពុជា គ្រោងនឹងដឹកនាំប្រតិភូពាណិជ្ជករបស់ប្រទេសខ្លួនមកកាន់ប្រទេសកម្ពុជា តែមិនទាន់កំណត់ពេលវេលាជាក់លាក់នោះទេ ។
លោកបន្តថា “ទីផ្សារនៃប្រទេសបេឡារុស គឺល្អសម្រាប់ប្រទេសកម្ពុជា ដោយសារប្រទេសនេះ ជាសមាជិករបស់សមាជិកសភាពសេដ្ឋកិច្ចអឺរ៉ុប អាស៊ី ដែលមាន៥ប្រទេសជាសមាជិក រួមមាន សហភាពរុស្ស៊ី សាធារណៈរដ្ឋបេឡារុស សាធារណៈរដ្ឋកាហ្សាក់ស្ថាន សាធារណៈរដ្ឋមេនី និងសាធារណៈរដ្ឋកៀហ្ស៊ីស៊ីស្ថាន ដែលអនុញ្ញាតកម្ពុជានាំផលិតផលជាង៤ពាន់មុខ ក្នុងនោះទំនិញមួយចំនួន គឺកម្ពុជាអាចនាំចេញដោយរួចពន្ឋបាន៕
