ដោយៈ រ៉ាណេត
ភ្នំពេញៈ បន្ទាប់ពីមានដំណឹងពីការវិនិយោគទីក្រុងមាស នៅតំបន់កោះនរាដោយក្រុមហ៊ុន OCIC ក្នុងសង្កាត់និរោធ ខណ្ឌច្បារអំពៅ បានធ្វើឱ្យស្ថានភាពនៃតម្លៃដីនៅទីនេះកំពុងមានភាពពុះកញ្ជ្រោលជាបណ្តើរៗហើយ។
មុននេះបន្តិចមានការទម្លាយព័ត៌មានពីប្រភពដែលគួរទុកចិត្តបានថា នៅពេលខាងមុខនេះ តាមច្រាំងទន្លេដែលស្ថិតនៅក្នុងតំបន់កោះនរា សង្កាត់និរោធ ខណ្ឌច្បារអំពៅ នឹងផុសឡើងនូវកោះសិប្បនិម្មិតដ៏អស្ចារ្យមួយដោយមានឈ្មោះ «កោះមាស» ដែលជាគម្រោងអភិវឌ្ឍរបស់ក្រុមហ៊ុន OCIC ធ្វើជាមជ្ឈមណ្ឌលពាណិជ្ជកម្មចម្រុះ និងជាទីក្រុងរណបដ៏លេចធ្លោមួយទៀតបន្ទាប់ពីទីក្រុងកោះពេជ្រ ខណៈដែលនៅក្នុងគម្រោងមួយនេះ នឹងត្រូវចាក់ដីបំពេញតាមច្រាំងចូលទន្លេប្រមាណ៤០០ម៉ែត្រ ដែលមានបណ្តោយប្រមាណ២០០០ម៉ែត្រ។
-->
សហស្ថាបនិក និងជានាយកប្រតិបត្តិក្រុមហ៊ុន Advance Real Estate លោក ប៉ូ អ៊ាវគង់ បានមានប្រសាសន៍ប្រាប់តាមទូរស័ព្ទកាលពីព្រឹកថ្ងៃទី២៤ ខែឧសភា នេះថា ជាទូទៅ នៅពេលដែលមានដំណឹងពីការសិក្សា ដើម្បីធ្វើការអភិវឌ្ឍនៅតំបន់ណាមួយ តំបន់នោះគឺរមែងតែងមានការកើនឡើងនូវតម្លៃដីជាប្រក្រតី។ លោកបានបន្តថា ការឡើងតម្លៃនេះ មិនមែនជាការកំណត់ដោយអ្នកជំនាញណាមួយនោះទេ ប៉ុន្តែនៅពេលដែលមានដំណឹងស្ដីពីការសិក្សាធ្វើការអភិវឌ្ឍនៅតំបន់ណាមួយ ម្ចាស់អចនទ្រព្យគាត់តម្លើងថ្លៃទ្រព្យដោយខ្លួនឯងបើទោះជាមិនទាន់ច្បាស់ការណ៍ថា គម្រោងសិក្សាទាំងនោះអាចលេចចេញជារូបរាងក៏ដោយ។
លោកបន្តថា “តម្លៃដីដែលស្ថិតនៅតំបន់កោះនរា ជាពិសេសតំបន់ដែលស្ថិតនៅជាប់ច្រាំងទន្លេ ជាទូទៅគឺមានតម្លៃទាបជាងតំបន់ដទៃ ដោយសារតែតំបន់ជាប់ច្រាំងទន្លេ ទទួលរងនូវគ្រោះហានិភ័យដោយការបាក់ដីចូលទន្លេ”។
ជាក់ស្ដែងនៅពេលបច្ចុប្បន្ន ដីនៅតំបន់ងាយរងគ្រោះនេះ អាចមានតម្លៃត្រឹមប្រមាណ៦០០ដុល្លារចុះក្រោមរហូតដល់ត្រឹម២០០ដុល្លារ ក្នុងមួយម៉ែត្រការ៉េ ឬអាចទាបជាងនេះ (តាមទំហំ ទីតាំង និងស្ថានភាពដី)។ ប៉ុន្តែបើចំពោះដីដែលមានទំហំធំ និងមានសុវត្ថិភាពអាចមានតម្លៃចាប់ពី៤០០-៦០០ដុល្លារក្នុងមួយម៉ែត្រ (ដីទំហំ) ហើយដីដែលមានទំហំតូចអាចមានតម្លៃថ្លៃជាងនេះ។
លោកបានបញ្ជាក់ថា “ប្រសិនបើគម្រោងដែលបានលើកឡើងខាងលើនេះកើតមានមែននោះ តំបន់មួយនឹងនឹងទទួលបានឥទ្ធិពលល្អជាច្រើន ដែលមានការអភិវឌ្ឍលើផ្នែកហេដ្ឋារចនាសម្ព័ន្ធនៅក្នុងតំបន់ ថែមទាំងជម្រុញឱ្យតម្លៃដី និងអចលនទ្រព្យមានការកើនឡើងកាន់តែខ្លាំង”។
លោក ទូច សំណាង អគ្គនាយករងក្រុមហ៊ុន OCIC បានមានប្រសាសន៍ឲ្យដឹងកាលពីពេលថ្មីៗនេះថា គំរោងកសាងទីក្រុងរណបថ្មីមួយនៅតំបន់កោះនរា ពិតជាមានមែន ហើយគំរោងនេះស្ថិតនៅក្នុងដំណើរការរៀបចំនិតិវិធីនានា ដើម្បីឈានទៅសម្រេចសាងសង់គំរោងនេះ ប៉ុន្តែលោកមិនទាន់បញ្ជាក់ពីពេលវេលាជាក់លាក់ថា គម្រោងនេះនឹងសាងសង់នាពេលណាឡើយ។
លោកបន្តថា “គំរោងនេះមានសណ្ឋាន និងការរៀបចំស្រដៀងគ្នានឹងទីក្រុងកោះពេជ្រនាពេលបច្ចុប្បន្ននេះ”។
ពាក់ព័ន្ធទៅនឹងគម្រោងនៃការបង្កើតកោះសិប្បនិម្មិត ដើម្បីអភិវឌ្ឍជាមជ្ឈមណ្ឌលពាណិជ្ជកម្មចម្រុះបែបទំនើប ដែលប្រសិទ្ធនាមថា «កោះមាស» ស្ថិតនៅទីតាំងខាងលើនេះ មន្ត្រីជាន់ខ្ពស់ និងជាអ្នកនាំពាក្យរបស់រដ្ឋបាលសាលារាជធានីភ្នំពេញ លោក ម៉េត មាសភក្ដី បានមានប្រសាសន៍ឲ្យផងដែរថា គម្រោងមួយនេះលោកធ្លាប់បានឮគេនិយាយ ប៉ុន្តែព័ត៌មានជាផ្លូវការ ដែលអាចលេចចេញជារូបរាងនៅពេលណានោះ លោកនៅមិនទាន់ដឹងច្បាស់នៅឡើយនោះទេ។
លោកបន្តទៀតថា “រាល់គម្រោងអភិវឌ្ឍផ្សេងៗទាំងអស់ សុទ្ធតែជាការចូលរួមចំណែកជាមួយរដ្ឋាភិបាល ក៏ដូចជារាជធានីភ្នមពេញក្នុងការអភិវឌ្ឍសង្គម និងប្រទេសជាតិ រាប់ទាំង់ការលើកស្ទួយកម្ពស់ជីវភាពប្រជាពលរដ្ឋ ក៏ដូចជាលើកស្ទួយមុខមាត់របស់រាជធានីភ្នំពេញផងដែរ”។ លោកបន្តថា “គម្រោងនៃការអភិវឌ្ឍទាំងអស់ កើតចេញពីជ្រុងមួយនៃសង្គម និងប្រទេសជាតិ ដែលពោរពេញទៅដោយភាពរីកចម្រើន មានស្ថិរភាពនយោបាយ និងសន្តិសុខសង្គម។
យ៉ាងណាក៏ដោយ លោកម៉េត មាសភក្ដី បានសុំមិនធ្វើការអត្ថាធិប្បាយបញ្ជាក់លម្អិតពាក់ព័ន្ធទៅនឹងគម្រោងនៃការបង្កើតកោះសិប្បនិម្មិត ឬមជ្ឈមណ្ឌលពាណិជ្ជកម្មបែបទំនើប «កោះមាស» នេះនោះទេ ដោយលោកបានបញ្ជាក់ថា វាជាព័ត៌មានដែលមិនទាន់ជាផ្លូវការនៅឡើយ៕
[…] ប្រភព៖ Property Area […]