ដោយ រ៉ាណេត
ភ្នំពេញៈ មជ្ឈមណ្ឌលពាណិជ្ជកម្មកប់ពពកចំនួនពីរ បាននិងកំពុងតែមានការប្រជែងគ្នាក្នុងការសាងសង់ ដើម្បីបញ្ចប់គម្រោងទៅតាមការគ្រោងទុករបស់ខ្លួន ដើម្បីសម្រុកធ្វើយ៉ាងណាបំពេញទៅតាមតម្រូវការទីផ្សារនៅពេលបច្ចុប្បន្ននេះ។
មជ្ឈមណ្ឌលពាណិជ្ជកម្មកប់ពពកចំនួនពីរតម្លៃរាប់រយលានដុល្លារកំពុងប្រជែងគ្នាសាងសង់នៅលើទីក្រុងកោះពេជ្រ
អគារពាណិជ្ជកម្មបែបទំនើបចំនួនពីរ ដែលកំពុងតែមានសកម្មភាពយ៉ាងមមាញឹកក្នុងការសាងសង់នេះ រួមមានអគារ GIA Tower ដែលត្រូវបានអភិវឌ្ឍឡើងដោយក្រុមហ៊ុន GIA International Real Estate Company (Overseas Cambodian Investment Corporation ) ដោយអគារមួយនេះមានកម្ពស់៤២ជាន់ មានទំហំអាគារចំនួន៣៨៣៩ ម៉ែត្រការ៉េ។ មជ្ឈមណ្ឌលពាណិជ្ជកម្មនេះនឹងប្រើប្រាស់សំរាប់ការិយាល័យ និងលក់រាយចំនួន៨យូនីត ទីតាំងសម្រាប់ការិយាល័យខ្នាតតូចចំនួន៣០៦យូនីត ការិយាល័យខ្នាតធំចំនួន១១យូនីត រួមជាមួយជាន់អាហារដ្ឋាន Sky bar ផងដែរ។ បន្ថែមពីនេះក៏មានទីធ្លាសម្រាប់ទុកយានយន្តបានរហូតដល់ទៅ៣៨២គ្រឿង។
ដោយឡែកអាគារកប់ពពកមួយទៀត ជាមជ្ឈមណ្ឌលពាណិជ្ជកម្មលំដាប់ផ្កាយ៥ មានឈ្មោះថា Morgan Tower ដែលកំពុងតែមានសកម្មភាពសម្រុកការសាងសង់ផងដែរនោះ មានកម្ពស់៤៦ជាន់ស្មើនឹង២១០ម៉ែត្រ ជាមួយនឹងទំហំទឹកប្រាក់លើការវិនិយោគសាងសង់រហូតដល់ប្រមាណ១៦០លានដុល្លារសហរដ្ឋអាមេរិក។ អគារដ៏ទំនើបមួយនេះ នឹងប្រើប្រាស់ក្នុងនាមជាអាគារការិយាល័យ សណ្ឋាគារប្រណីត សាលប្រជុំ ភោជនីយដ្ឋាន និង Sky Bar សម្រាប់គយគន់ទេសភាពក្រុងភ្នំពេញ ខណៈដែលការលក់ទាំងស្រុងត្រូវបានសម្រេចទៅលើក្រុមហ៊ុនអន្តរជាតិដ៏ល្បីឈ្មោះ Century 21 Cambodia ក្រោមកិច្ចសហការជាមួយសមាជិកនៃគ្រួសារ Century 21 ដែលមានទីស្នាក់នៅក្នុងប្រទេសចិនរហូតដល់ចំនួន១១ការិយាល័យ។
យោងតាមសេចក្តីប្រកាសព៌តមានរបស់ក្រុមហ៊ុន Centuy21 Cambodia បានឲ្យដឹងកាលពីពេលថ្មីៗនេះថា ក្រុមគ្រួសារ Century21 Family នឹងសហការជាមួយក្រុមហ៊ុន Century21 មកពីប្រទេសចិនចំនួន១១ ដែលគ្របបណ្តប់ការិយាល័យប្រមាណ៥០០ នឹងធ្វើជាភ្នាក់ងារជួល និងលក់គំរោងនេះ។ ជាមួយគ្នានេះ Century21 Family ក៏នឹងដើរតួនាទីជាអ្នកជួល និងលក់បន្តសម្រាប់អ្នក ដែលបានវិនិយោគគំរោងនេះនាពេលអនាគតផងដែរ។
អគ្គនាយករងក្រុមហ៊ុន OCIC លោក ទូច សំណាង បានមានប្រសាសន៍ប្រាប់កាលពីពេលកន្លងមកថ្មីៗនេះថា បើទោះជាពេលនេះយើងឃើញមានសកម្មភាពនៃការសាងសង់សំណង់អគារតូចធំព្រោងព្រាត នៅលើទីធ្លានៃទឹកដីកោះពេជ្រក៏ពិតមែន ប៉ុន្តែចំនួននៃកំណើនសំណង់អគារទាំងនេះ គឺទើបតែបានប្រមាណ២៥ភាគរយ ស្មើនឹង១ភាគ៤ នៃផ្ទក្រឡាលើគម្រោងសាងសង់ សរុបរបស់ទីក្រុងរណបកោះពេជ្រតែប៉ុណ្ណោះ។
លោកបន្តថា “តាមផែនការមេនៅថ្ងៃខាងមុខនេះ ទីក្រុងកោះពេជ្រ ក៏ដូចជាតំបន់ដែលស្ថិតនៅជុំវិញនឹងប្រែក្លាយ ទៅមជ្ឈមណ្ឌលពាណិជ្ជកម្មលំដាប់អន្តរជាតិ ខណៈដែលបច្ចុប្បន្ននេះ យើងបាននិងកំពុងតែដើរតាមផែនការជាបណ្តើរៗហើយ”៕
[…] ប្រភព៖ Property Area […]