ដោយ: សហសេវិក
អន្តរជាតិ: តម្លៃផ្ទះថ្មីរបស់ប្រទេសចិនបានស្ថិតនៅទ្រឹងក្នុងខែកក្កដា ដែលបង្ហាញពីបញ្ហាប្រឈមសម្រាប់ការងើបឡើងវិញយ៉ាងពេញលេញនៃទីផ្សារលំនៅឋាន ខណៈដែលតម្រូវការនៅតែស្ថិតក្នុងកម្រិតទាប។
តម្លៃផ្ទះថ្មីបានធ្លាក់ចុះ០,១ភាគរយក្នុងខែកក្កដាធៀបនឹងខែមុន ដែលត្រូវគ្នានឹងការធ្លាក់ចុះក្នុងខែមិថុនា។នេះបើយោងតាមការគណនារបស់កាសែត Reuters ដោយផ្អែកលើទិន្នន័យដែលចេញផ្សាយដោយការិយាល័យស្ថិតិជាតិចិន។
បើគិតលើមូលដ្ឋានប្រចាំឆ្នាំ តម្លៃផ្ទះបានធ្លាក់ចុះ៣,២ភាគរយ ដែលថយចុះបន្តិចពីការថយចុះ៣,៣ភាគរយក្នុងខែមិថុនា។
ការអូសបន្លាយនៃវិបត្តិអចលនទ្រព្យនៅប្រទេសចិន បានបន្ថែមសម្ពាធលើសេដ្ឋកិច្ច ខណៈដែលការធ្លាក់ចុះនៃការលក់ផ្ទះ និងការធ្លាក់ចុះនៃតម្លៃផ្ទះ បានជះឥទ្ធិពលដល់ការប្រើប្រាស់ និងការវិនិយោគក្នុងស្រុក។
ស្របពេលមានសញ្ញានៃភាពប្រសើរឡើងនៅក្នុងទីផ្សារមួយចំនួននៅឆ្នាំនេះ ការកើនឡើងភាគច្រើនត្រូវបានប្រមូលផ្តុំនៅក្នុងទីក្រុងធំៗ ហើយមិនទាន់បានបង្ហាញពីការកើនឡើងជាបន្តបន្ទាប់ទូទាំងប្រទេសនៃតម្រូវការលំនៅឋាននៅឡើយទេ។
ក្នុងចំណោមទីក្រុងចំនួន៧០ ដែលត្រូវបានស្ទង់មតិ មានតែ១៧ ទីក្រុងប៉ុណ្ណោះដែលសម្រេចបានកំណើននៃតម្លៃផ្ទះប្រចាំខែនៅក្នុងខែកក្កដា ដែលការណ៍នេះបង្ហាញថា ទីផ្សារទាំងមូលមិនទាន់ងើបចេញពីវិបត្តិនៅឡើយ៕
