ដោយៈ ម៉ាណា
ម៉ាឡេស៊ីៈ ម៉ាឡេស៊ីមានឱកាសខ្ពស់ ក្នុងការក្លាយជាប្រទេសមួយដែលមានសេដ្ឋកិច្ចឈានមុខគេនៅក្នុងអាស៊ាន ប៉ុន្តែខ្ញុំមិនរំពឹងថាវានឹងក្លាយជាប្រទេស ដែលមានសេដ្ឋកិច្ចធំជាងគេបំផុត ក្នុងអាស៊ាននៅពេលដ៏ខ្លីខាងមុខនេះទេ។
ស្ថានភាពរបស់ម៉ាឡេស៊ីនៅឆ្នាំ ២០២៦ យោងតាមការព្យាករណ៍របស់មូលនិធិរូបិយវត្ថុអន្តរជាតិ (IMF)សម្រាប់ខែមេសា ឆ្នាំ២០២៦៖
ផលិតផលក្នុងស្រុកសរុប (GDP) តាមតម្លៃបច្ចុប្បន្ន ឆ្នាំ ២០២៦ ឈានមុខគេគឺឥណ្ឌូណេស៊ី ជាមួយផលទុនជាតិសរុប១,៥៥ ទ្រីលានដុល្លារ។ សិង្ហបុរីមានសេដ្ឋកិច្ចសរុបចំនួន៦០៦ពាន់លានដុល្លារប្រទេសថៃ មានផលទុនសេដ្ឋកិច្ចសរុប៥៦២ពាន់លានដុល្លារ។ ចំណែកប្រទេសវៀតណាម មានផលទុនជាតិសរុបចំនួន៥២៧ពាន់លានដុល្លារ ប្រទេសម៉ាឡេស៊ី មានទំហំសេដ្ឋកិច្ចសរុប៥១៦ពាន់លានដុល្លារ។ ចំណែកប្រទេសហ្វីលីពីន មានទំហំសេដ្ឋកិច្ចសរុប៥១២ពាន់លានដុល្លារ។
ដូច្នេះ ប្រទេសម៉ាឡេស៊ីស្ថិតនៅលំដាប់ថ្នាក់ទី៥ ក្នុងតំបន់អាស៊ាន ដោយផ្អែកលើផលិតផលក្នុងស្រុកសរុប (GDP) តាមតម្លៃទីផ្សារបច្ចុប្បន្ន (nominal GDP) ដែលមានទំហំប្រហែល៥០០-៥២០ ពាន់លានដុល្លារនៅឆ្នាំ២០២៦។
ទោះជាយ៉ាងណាក៏ដោយ បើនិយាយពីកំណើនសេដ្ឋកិច្ច ម៉ាឡេស៊ីកំពុងធ្វើបានល្អជាងចំណាត់ថ្នាក់របស់ខ្លួន៖ នៅក្នុងការព្យាករណ៍កាលពីខែមេសា មូលនិធិរូបិយវត្ថុអន្តរជាតិ (IMF)បានប៉ាន់ប្រមាណថា កំណើនGDP ពិតប្រាកដ (real GDP) របស់ម៉ាឡេស៊ីនឹងមានកម្រិត៤,៧% នៅឆ្នាំ២០២៦ បើធៀបនឹង៥,០% សម្រាប់ប្រទេសឥណ្ឌូណេស៊ី និង៧,១% សម្រាប់ប្រទេសវៀតណាម។
តើម៉ាឡេស៊ីអាចឈានឡើង ទៅកាន់ចំណាត់ថ្នាក់កំពូលទាំង៣ បានដែរឬទេ? ចម្លើយគឺអាចទៅរួច ជាពិសេសក្នុងរយៈពេល៥ទៅ ១០ ឆ្នាំខាងមុខ។
ម៉ាឡេស៊ីមានគុណសម្បត្តិជាច្រើនដូចជា៖ការផលិតគ្រឿងអេឡិចត្រូនិក និងបន្ទះឈីប (semiconductor) មជ្ឈមណ្ឌលទិន្នន័យ (data centers) និងហេដ្ឋារចនាសម្ព័ន្ធឌីជីថល។
ទំនាក់ទំនងពាណិជ្ជកម្មដ៏រឹងមាំជាមួយចិន សហរដ្ឋអាមេរិក និងអាស៊ានរួមមានវិស័យថាមពល និងទំនិញមូលដ្ឋាន (commodities)
GDP សម្រាប់មនុស្សម្នាក់ (GDP per capita) ក្នុងកម្រិតខ្ពស់គួរសម។
ហេដ្ឋារចនាសម្ព័ន្ធហិរញ្ញវត្ថុ និងឧស្សាហកម្មដែលមានការអភិវឌ្ឍល្អ ប៉ុន្តែឥណ្ឌូណេស៊ីមានចំនួនប្រជាជន និងទីផ្សារក្នុងស្រុកដ៏ធំធេង ខណៈដែលវៀតណាម កំពុងមានកំណើនសេដ្ឋកិច្ចលឿនជាង។
កត្តាទាំងនេះ ធ្វើឱ្យការវ៉ាដាច់ប្រទេសទាំងនោះ លើទំហំGDP សរុបក្លាយជារឿងពិបាកក្នុងរយៈពេលដ៏ខ្លីខាងមុខ។ តាមការព្យាករណ៍ សេដ្ឋកិច្ចវៀតណាមគិតតាមអំណាចទិញ (PPP)នៅឆ្នាំ ២០២៦ នឹងមានទំហំធំជាងម៉ាឡេស៊ីរួចទៅហើយ។
ម៉ាឡេស៊ីទំនងជានឹងបន្តស្ថិតនៅចំណាត់ថ្នាក់ទី ៤ ឬទី៥ ក្នុងអាស៊ានបើគិតលើGDP សរុប (nominal GDP) នៅចន្លោះឆ្នាំ ២០២៦-២០៣០ ប៉ុន្តែនៅតែជាប្រទេសមួយដែលមានសេដ្ឋកិច្ចជឿនលឿន និងមានចំណូលខ្ពស់នៅក្នុងតំបន់អាស៊ាន។
ចំពោះការពិចារណា លើវិស័យអចលនទ្រព្យនៅកម្ពុជា ម៉ាឡេស៊ីគឺជាករណីសិក្សាដ៏គួរឱ្យចាប់អារម្មណ៍មួយ ដោយសារគំរូនៃការអភិវឌ្ឍរបស់ខ្លួន ដែលរួមមានតំបន់ឧស្សាហកម្ម ហេដ្ឋារចនាសម្ព័ន្ធ វិស័យផលិតកម្ម សេវាកម្ម និងការពង្រីកទីក្រុង គឺមានភាពស៊ីសង្វាក់គ្នាយ៉ាងខ្លាំងទៅនឹងអ្វីដែលកម្ពុជា អាចអភិវឌ្ឍឆ្ពោះទៅឆ្នាំ២០៣០៕
