ដោយ វុត្ថា
តូក្យូៈ ប្រមុខរដ្ឋាភិបាលកម្ពុជាបានអះអាងថា សង្គ្រាមពាណិជ្ជកម្មរវាងមហាយក្សចិន និងអាមេរិក ដែលកំពុងកើតឡើងយ៉ាងក្តៅគគុកនាពេលបច្ចុប្បន្ននេះ នឹងមិនប៉ះពាល់ខ្លាំងដល់កម្ពុជានោះទេ ព្រោះប្រព័ន្ធសេដ្ឋកិច្ចរបស់កម្ពុជា គឺរាល់មុខទំនិញដែលប្រទេសទាំងនោះវាយពន្ធទៅវិញទៅមក មិនមានបញ្ជីមុខទំនិញរបស់កម្ពុជាទេ។
សម្តេចតេជោ ហ៊ុន សែននាយករដ្ឋមន្រ្តីកម្ពុជាបានថ្លែងនៅក្នុងនៅក្នុងសន្និសីទអន្តរជាតិ លើកទី២៥ ស្តីពី «អនាគតរបស់អាស៊ី» នៅថ្ងៃទី៣០ ខែឧសភា ឆ្នាំ២០១៩នេះ ថា កម្ពុជារងផលប៉ះពាល់តិចតួចពីសង្គ្រាមពាណិជ្ជកម្មចិន-អាមេរិក មិនត្រឹមតែប៉ុណ្ណោះកម្ពុជាមិនគ្រាន់តែរកស៊ីជាមួយចិន និងអាមេរិកនោះទេ ពោលគឺរកស៊ីជាមួយបណ្តាប្រទេសផ្សេងៗ ដូចជាមួយជប៉ុន ជាដើម កម្ពុជាមានដៃគូរកស៊ីច្រើន ។
សម្តេចបន្តថា “សម្រាប់ហិរញ្ញវត្ថុ កម្ពុជាក៏មិនមានការភ័យខ្លាចនោះទេ ដោយសារមិនទាន់សមាហរណកម្មពេញលេញ ទោះមានភាពរង្គោះ រង្គើរហិរញ្ញវត្ថុរបស់ចិន និងអាមេរិកអាចមានផលប៉ះពាល់ខ្លាំងក៏ទេដែរ”។ សម្តេចរំពឹងថា “សម្តេចរំពឹងថា ចិននិងអាមេរិក នៅតែជំនះបាននូវការលំបាក ដែលមិនមែនជាបញ្ហាមិនចេះចប់នោះទេ ពោលគឺស្វែងរកដំណោះស្រាយសមស្របណាមួយដែលឈ្នះៗទាំងសង់ខាង”។
សម្តេចបញ្ជាក់ថា សង្គ្រាមពាណិជ្ជកម្មរវាងចិន-អាមេរិក មិនមានចំណេញនោះទេ ចំពោះប្រទេសទាំងពីរនេះ ពោលគឺមានការខាតបង់សេដ្ឋកិច្ចរៀងខ្លួនប៉ុណ្ណោះ តាមរយៈដំឡើងពន្ធលើមុខទំនិញរបស់គ្នាទៅវិញទៅមក៕
