ដីធ្លី ​តំបន់​មាន​សក្តានុពល​សម្រាប់​ឱកាស​វិនិយោគ​នា​ពេល​អនាគត​

ដោយៈ ស៊ីវ ម៉េង

   ភ្នំពេញៈ តើពេលណាដែលតម្លៃអាចនឹងងើបឡើងវិញ? តើដីស្ថិតនៅទីតាំងណាខ្លះ គួរវិនិយោគ ដើម្បីយកផលចំណេញនាពេលអនាគត?។

សំណួរទាំងនេះ គ្រាន់តែជាការប៉ាន់ស្មានអំពីសេណារីយ៉ូ ដែលអាចកើតឡើងប៉ុណ្ណោះ មិនមែនជាលទ្ធផលទីផ្សារដែលបានកំណត់ច្បាស់លាស់នោះទេ។

សេដ្ឋកិច្ចធ្លាក់ចុះ ឬការរឹតបន្តឹងលើការផ្តល់កម្ចី អាចធ្វើឱ្យការងើបឡើងវិញនៃតម្លៃមានភាពយឺតយ៉ាវ។

ប៉ុន្តែលោកយិន លាងគង់សហស្ថាបនិកនិងជាអគ្គនាយកគេហទំព័រPropertyarea.asia ជាគេហទំព័រផ្តល់ និងវិភាគអចលនទ្រព្យឈានមុខគេនៅកម្ពុជាបានលើកឡើងថា អ្វីដែលអ្នកវិនិយោគគួរធ្វើមុនសម្រេចចិត្តទិញដី ត្រូវធ្វើការប្រៀបធៀបតម្លៃនៃការទិញ លក់ជាក់ស្តែងដែលបានបញ្ចប់រួចរាល់ មិនមែនគ្រាន់តែមើលតម្លៃដែលគេដាក់លក់នោះទេ។

លោកបញ្ជាក់ថា “ជាអ្នកវិនិយោគត្រូវប្រាកដថា ពិនិត្យមើលប័ណ្ណកម្មសិទ្ធិ ការកំណត់តំបន់ប្រើប្រាស់ដី (zoning)ហានិភ័យនៃការជន់លិច ផ្លូវធ្វើដំណើរ និងថវិកាសម្រាប់ហេដ្ឋារចនាសម្ព័ន្ធ”។
លោកបន្ថែមថា “អ្នកវិនិយោគគួរតែគណនាថា តើអ្នកមានលទ្ធភាពគ្រប់គ្រាន់ ក្នុងការកាន់កាប់ដីនោះរយៈពេលជាច្រើនឆ្នាំ ដោយមិនចាំបាច់ប្រញាប់លក់ចេញដែរឬទេ”។

លើសពីនេះ អ្នកវិនិយោគនាពេលបច្ចុប្បន្ន គួរតែជៀសវាងការទិញក្នុងតម្លៃខ្ពស់ ដោយសារតែគម្រោងសាងសង់ ព្រលានយន្តហោះ ផ្លូវថ្នល់ ឬការពង្រីកទីក្រុង ដែលគ្រាន់តែជាសំណើ ឬគម្រោងនៅឡើយ។

លោកយិន លាងគង់បានបន្ថែមទៀតថា ការប្រៀបធៀបការកើនឡើងតម្លៃដែលរំពឹងទុក ជាមួយនឹងផលចំណេញដែលទទួលបានពីការរក្សាទុកប្រាក់នៅក្នុងទ្រព្យសកម្ម ដែលមានហានិភ័យទាប និងអាចប្តូរជាសាច់ប្រាក់បានឆាប់រហ័ស។

គេហទំព័រមួយបានរាយការណ៍ថា តម្លៃដីជាមធ្យមនៅរាជធានីភ្នំពេញមានប្រហែល១,៧៩០ដុល្លារអាមេរិក ក្នុងមួយម៉ែត្រការ៉េសម្រា​ប់ឆមាសទី២ ឆ្នាំ២០២៥ ដោយផ្អែកលើទិន្នន័យរបស់សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA)។

តួលេខជាមធ្យមទូទាំងទីក្រុងនេះ មិនបានបង្ហាញពីភាពខុសគ្នាដ៏ធំរវាងតំបន់កណ្តាល និងតំបន់ជាយក្រុងនោះទេ ដូច្នេះមិនគួរបង្ហាញថាវាជាតម្លៃជាក់ស្តែងសម្រាប់ដីឡូត៍ណាមួយឡើយ។

លោកយិន លាងគង់បានទាញយកការសន្និដ្ឋានថា ថ្លៃដីនឹង ងើបឡើងវិញ នៅក្នុងតំបន់មួយចំនួននៃប្រទេសកម្ពុជា ប៉ុន្តែលោកបានចង្អុលបង្ហាញឲ្យមានការផ្តោតលើដី ដែលមានទំនាក់ទំនងជាមួយតម្រូវការលំនៅដ្ឋាន និងការងារជាក់ស្តែង ជាពិសេសនៅតំបន់ច្រករបៀងភាគខាងត្បូងនៃរាជធានីភ្នំពេញ ជាជាងការទិញដីដែលមានតម្លៃថោកដោយគ្រាន់តែរង់ចាំឱ្យតម្លៃកើនឡើង។

តើអ្នកកំពុងពិចារណាទិញដីនៅពេលនេះ ឬអ្នកមានដីរួចហើយ ហើយចង់ដឹងថា ពេលណាដែលតម្លៃរបស់វា អាចនឹងកើនឡើងវិញ? ចម្លើយចំពោះសំណួរនេះ នឹងធ្វើឱ្យយុទ្ធសាស្ត្រដ៏ល្អបំផុតមានភាពខុសគ្នាខ្លាំង៕