លោក សន សៃស៊ីផាន់ដន និងសម្តេចតេជោ ហ៊ុន សែន
ដោយ វុត្ថា
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានជំរុញកម្ពុជា-ឡាវបង្កើនការវិនិយោគឱ្យមានការរីកចម្រើនកាន់តែធំ ជាពិសេសវិស័យទេសចរណ៍ វិស័យវប្បធម៌ និងការវិនិយោគលើវិស័យថាមពលអគ្គិសនីកាន់តែច្រើនថែមទៀត ដើម្បីបង្កើនទំហំពាណិជ្ជកម្មនៃប្រទេសទាំងពីរ។
សម្តេចតេជោ នៅក្នុងជំនួបពិភាក្សាការងារជាមួយលោក សន សៃស៊ីផាន់ដន ឧបនាយករដ្ឋមន្ត្រីឡាវ នៅថ្ងៃទី ៤ ខែមិថុនា ឆ្នាំ ២០១៩បានថ្លែងថា ទំហំពាណិជ្ជកម្មកម្ពុជា និងឡាវគប្បីណាជំរុញឱ្យមានការរីកចម្រើនកាន់តែធំថែមទៀត ជាពិសេសវិស័យទេសចរណ៍ វិស័យវប្បធម៌ និងវិស័យវិនិយោគ ក៏ដូចជាវិស័យសេដ្ឋកិច្ចផង។
-->
សម្ដេចតេជោបន្តថា លើសពីនោះទៀត ក៏មិនត្រូវកាត់ផ្ដាច់ពីវិស័យថាមពលផងដែរ យើងគប្បីណាលើកយកវិស័យថាមពលជាវិស័យអាទិភាពសម្រាប់កិច្ចសហប្រតិបត្តិការរវាងប្រទេសយើងទាំងពីរ ជាមួយគ្នានេះផងដែរទាក់ទងនឹងទំហំពាណិជ្ជកម្មរវាងប្រទេសយើងទាំងពីរ គប្បីណាដាក់បញ្ជូលទៅលើផ្នែក ការទិញ-លក់ នៃវិស័យថាមអគ្គិសនីនេះផងដែរ។
លោក សន សៃស៊ីផាន់ដន ឧបនាយករដ្ឋមន្ត្រីឡាវ បានឲ្យដឹងថា តាមរយៈដំណើរទស្សនកិច្ចរបស់មកកាន់ព្រះរាជាណាចក្រកម្ពុជានៅពេលនេះ គឺដើម្បីសិក្សាស្វែងយល់ និងដកស្រង់បទពិសោធន៍អំពីការអភិវឌ្ឍកម្ពុជា ដើម្បីយកទៅអនុវត្តនៅប្រទេសឡាវ។
ទន្ទឹមនឹងនេះ លោកបន្តថា ព្រះរាជាណាចក្រកម្ពុជានៅពេលបច្ចុប្បន្ននេះ មានការរីកចម្រើនយ៉ាងខ្លាំងជាពិសេសអគារខ្ពស់ៗបានរីកស្គុះស្គាយ ហើយជីវភាពប្រជាពលរដ្ឋក៏មានភាពល្អប្រសើរឡើង។
លោកក៏បានថ្លែងអំណរគុណចំពោះ សម្ដេចតេជោនាយករដ្ឋមន្ត្រី ក៏ដូចជារដ្ឋាភិបាលកម្ពុជាដែលបានគាំទ្រដល់វិនិយោគគិនឡាវនៅកម្ពុជា ជាពិសេស ធនាគារឡាវ BIC ក៏ដូចជាអ្នកវិនិយោគផ្សេងៗ និងការគាំទ្រដល់ការទិញថាមពលអគ្គិសនីពីប្រទេសឡាវផងដែរ។
ជាមួយគ្នានេះ សម្ដេចតេជោ ហ៊ុន សែន ក៏បានធ្វើការណែនាំលើករណីវិស័យ ធនាគារ ដើម្បីអោយទទួលបាននូវភាពជោគជ័យនោះ គឺធ្វើយ៉ាងណាត្រូវយកចិត្តទុកដាក់ដល់ការផ្ដល់កម្ចីដល់វិស័យឧស្សាហកម្ម និងសិប្បកម្ម។ ពាក់ព័ន្ធនឹងវិស័យថាមពលវិញ សម្ដេចតេជោនាយករដ្ឋមន្ត្រី បានថ្លែងអំណរគុណដល់ភាគីឡាវផងដែរ ដែលឆ្នាំនេះបានលក់ថាមពលអគ្គិសនីឲ្យប្រទេសកម្ពុជាយើងបានចំនួន ១៨ មេហ្គាវ៉ាត់ ដែលថាមពលអគ្គិសនីនេះកំពុងតែប្រើប្រាស់នៅខេត្តកំពង់ធំ និងខេត្តព្រះវិហារ៕
