អគារ CDC។ រូបថត៖ សហការី
ដោយៈ រ៉ាណេត
ភ្នំពេញៈ ក្រុមប្រឹក្សាអភិវឌ្ឍន៍កម្ពុជា (CDC)បានអនុម័តគំរោងវិនិយោគរបស់ក្រុមហ៊ុនចំនួន៣ ដែលមានទុនវិនិយោគសរុបជាង១២លានដុល្លារអាមេរិក នៅក្នុងចុងសប្តាហ៍នេះ។
យោងតាមសេចក្តីប្រកាសព៌តមានរបស់ក្រុមប្រឹក្សាអភិវឌ្ឍន៍កម្ពុជា នៅលើបណ្តាញទំនាក់ទំនងសង្គមបានឲ្យដឹងនាព្រឹកថ្ងៃទី១៥ មិថុនានេះថា បន្ទាប់ពីឆ្លង់កាត់ការត្រួតពិនិត្យ និងពិចារណាទៅទំហំនៃការវិនិយោគ ក្រុមប្រឹក្សាអភិវឌ្ឍកម្ពុជា CDC បានសម្រេចអនុញ្ញាតចេញវិញ្ញាបនប័ត្រដល់ក្រុមហ៊ុនចំនួន៣ ជាមួយនឹងទុនវិនិយោគសរុបជាង១២លានដុល្លារ។
-->
គំរោងវិនិយោគនោះរួមមាន ទី១ ក្រុមហ៊ុន EALYTEX (CAMBODIA) GARMENT CO., LTD. គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិស្រែជំរៅ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគប្រមាណ៣.៤លានដុល្លារអាមេរិក និងអាចបង្កើតការងារបានចំនួន១,៨២៣កន្លែង។
ទី២ ក្រុមហ៊ុន XINLONGTAI (CAMBODIA) INDUSTRIAL CO., LTD. គម្រោងបង្កើតរោងចក្រផលិតអំបោះគ្រប់ប្រភេទបម្រើការនាំចេញ ដែលមានទីតាំងវិនិយោគស្ថិតនៅផ្លូវក្រវ៉ាត់ក្រុងពីរ ភូមិពាម សង្កាត់ព្រៃស ខណ្ឌដង្កោ រាជធានីភ្នំពេញ មានទុនវិនិយោគប្រមាណ ៦លានដុល្លារអាមេរិក និងអាចបង្កើតការងារបានចំនួន ៤៤១កន្លែង។
និងទី៣ ក្រុមហ៊ុន CAPITAL GARMENTS CO., LTD. គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិរំដួល ឃុំត្រពាំងគង ស្រុកសំរោងទង ខេត្តកំពង់ស្ពឺ មានទុនវិនិយោគប្រមាណ ៣.៣លានដុល្លារអាមេរិក និងអាចបង្កើតការងារបានចំនួន ១,៤២១កន្លែង៕
