ដោយ ៖ រ៉ាណេត
ភ្នំពេញ ៖ ក្នុងគោលដៅជំរុញវិសាលភាពនៃវិស័យពាណិជ្ជកម្មកម្ពុជា-ចិន ឱ្យកាន់តែមានភាពរីកចម្រើនប្រកបដោយនិរន្តរភាព និងរឹងមាំល្អ សម្ព័ន្ធក្រុមហ៊ុន អ &អេហ្វ កម្ពុជា បានបង្កើតនូវវេទិកាសន្ទនាជាមួយបណ្តាក្រុមហ៊ុនដៃគូវិនិយោគនានា ដែលជាសម្ព័ន្ធពាណិជ្ជករកម្ពុជា ធ្វើយ៉ាងប្រកៀកស្មារគ្នាយ៉ាងជិតស្និទ្ធ ដើម្បីអាចពង្រឹង និងពង្រីកការវិនិយោគរួមគ្នាឱ្យកាន់តែល្អប្រើសើរ ។
នៅក្នុងការប្រកាសបើកសម្ពោធ សម្ព័ន្ធពាណិជ្ជករ អ & អេហ្វ កម្ពុជា កាលពីចុងសប្ដាហ៍កន្លងទៅ ក្រុមហ៊ុន អ & អេហ្វ កម្ពុជា ដែលជាក្រុមហ៊ុនវិនិយោគអចលនទ្រព្យ និងសំណង់ដ៏ធំប្រចាំនៅកម្ពុជា បានសហការជាមួយនឹងសភាពាណិជ្ជកម្មចិន-កម្ពុជា ព្រមទាំងសហគ្រាស មានឈ្មោះបោះសំឡេងនានា ដែលប្រចាំនៅកម្ពុជា បង្កើតឡើងនូវវេទិកាសន្ទនាសម្រាប់សម្ព័ន្ធពាណិជ្ជករកម្ពុជា នៅក្នុងគោលដៅរួមអាចពង្រីកកិច្ចទំនាក់ទំនងលើមុខជំនួញគ្រប់វិស័យនៅកម្ពុជា ឱ្យកាន់តែមានភាពរឹងមាំ និងអាចទទួលបាននូវប្រយោជន៍ និងគុណភាពយូរអង្វែង។
អគ្គនាយកក្រុមហ៊ុន អ & អេហ្វ កម្ពុជា លោក វ៉ាង ជីហាវ បានមានប្រសាសន៍ថា ក្នុងឆ្នាំ២០១៩នេះ វាគឺជាលើកទី២ហើយ ដែលវត្តមានរបស់ក្រុមហ៊ុន អ & អេហ្វ បានចាក់ឫសយ៉ាងជ្រៅនៅលើទីផ្សារកម្ពុជា។ លោកបានមានប្រសាសន៍បន្តទៀតថា “គម្រោងបុរី អ & អេហ្វ និងគម្រោង អ & អេហ្វ ហ័រហ៊្វូ មិនត្រឹមតែជាសមិទ្ធផលដំបូងរបស់ក្រុមហ៊ុន អ & អេហ្វ គ្រុបនៅក្នុងកម្ពុជាប៉ុណ្ណោះនោះទេ តែក៏ជាគម្រោងដែលមានស្ដង់ដារខ្ពស់ អមដោយក្របខណ្ឌអភិវឌ្ឍន៍ប្រទេស ខ្សែក្រវាត់មួយផ្លូវមួយ (One Belt One Road) របស់រាជរដ្ឋាភិបាល ដែលទទួលបានភាពជោគជ័យ យ៉ាងធំធេងកន្លងមកនេះ”។
លោកបានបន្ថែមទៀតថា “ក្រុមហ៊ុន អ & អេហ្វ កម្ពុជា បានប្រកាន់ខ្ជាប់ជានិច្ច នូវយុទ្ធសាស្ត្រអភិវឌ្ឍន៍យ៉ាងជិតស្និទ្ធ ក្នុងការអភិវឌ្ឍទីក្រុងវៃឆ្លាត ក៏ដូចជាសេដ្ឋកិច្ចកម្ពុជាទាំងមួយ ជាមួយនឹងវត្តមានក្រុមហ៊ុនអភិវឌ្ឍន៍វិស័យអចលនទ្រព្យ ដែលឈានមុខគេនៅលើឆាកអន្តរជាតិផងដែរ”។
លោកក៏បានបញ្ជាក់ថា “ ក្រុមហ៊ុន អ & អេហ្វ កម្ពុជា បានសហការជាមួយនឹងសភាពាណិជ្ជកម្ម ចិន-កម្ពុជា ព្រមទាំងសហគ្រាស មានឈ្មោះបោះសំឡេងនានា ដែលប្រចាំនៅកម្ពុជា បង្កើតឡើងនូវវេទិកាសន្ទនាសម្រាប់សម្ព័ន្ធពាណិជ្ជករកម្ពុជា ដើម្បីផាសុកភាពនាពេលបច្ចុប្បន្ន និងវឌ្ឍនភាពនាពេលអនាគតរបស់ពាណិជ្ជករនៅកម្ពុជា ក្នុងកិច្ចសហប្រតិបត្តិការឈ្នះឈ្នះទាំងអស់គ្នាក្នុងភាពជាដៃគូវិនិយោគ”។
អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេង បានបង្ហាញពីក្ដីសាទរជាមួយនឹងសកម្មភាព និងការបង្កើតជាសម្ព័ន្ធពាណិជ្ជករនៅកម្ពុជាសំណាកសម្ព័ន្ធក្រុមហ៊ុន អ & អេហ្វ កម្ពុជា ។
លោកឧកញ៉ាបានមានប្រសាសន៍បន្តទៀតថា “ក្នុងនាមជាសភាពាណិជ្ជកម្មកម្ពុជា តែងស្វាគមន៍ជានិច្ចនូវរាល់ការគៀងគរបណ្តាអ្នកវិនិយោគនានាមកកាន់កម្ពុជា”។ លោកឧកញ៉ាបានបន្តទៀតថា “ជាមួយនឹងការគាំទ្រ និងសាទរយ៉ាងពេញទំហឹង សភាពាណិជ្ជកម្មកម្ពុជា ក៏នៅតែស្វាគមន៍ជានិច្ចក្នុងការស្វែងរកដំណោះស្រាយនានាដែលអាចកើតមាននៅក្នុងដំណើរប្រតិបត្តិការវិនិយោគនៅកម្ពុជា ដើម្បីធ្វើយ៉ាងណាឱ្យបរិយាកាសវិនិយោគមានដំណើរការល្អនប្រសើរ”។
លោកកញ៉ា លឹម ហេង ក៏បានមានប្រសាសន៍បន្តទៀតថា “ ការចូលខ្លួនមកវិនិយោគរបស់ដៃគូប្រទេសចិននៅកម្ពុជា មានដូចជា វិស័យកាត់ដេរសំលៀកបំពាក់ កាបូប ស្បែកជើង វិស័យសំណង់ និងអចលនទ្រព្យ វិស័យកសិឧស្សាហកម្ម ដែលរួមមានដូចជារោងចក្រសម្ងួតកសិផលសម្រាប់វេចខ្ចប់នាំចេញទៅក្រៅប្រទេស ហើយក្រៅពីនោះក៏មានវិស័យទេសចរណ៍ផងដែរ” ៕
