ដោយ Donald Lee
ភ្នំពេញៈ ខណៈតំបន់សេដ្ឋកិច្ចពិសេសខេត្តព្រះសីហនុ (SSEZ) ដែលវិនិយោគដោយចិន បានរៀបចំគម្រោងក្នុងការផ្តល់ជូនជាសាធារណៈដំបូង នៅផ្សារមូលបត្រកម្ពុជា (CSX) ដោយឆ្លើយតបការចោទប្រកាន់របស់អាមេរិក លើសកម្មភាពខុសច្បាប់នៅតំបន់នេះដែលបង្ហាញថា ក្រុមហ៊ុនចិនប្រើប្រាស់តំបន់នេះជាចំណុចដឹកឆ្លងកាត់ ជៀសវាងពន្ធគយរបស់អាមេរិក។
តំបន់សេដ្ឋកិច្ចពិសេសខេត្តព្រះសីហនុ បានប្រកាសផែនការសម្រាប់ចុះបញ្ជីនៅផ្សារមូលបត្រកម្ពុជាកាលពីថ្ងៃម្សិលមិញ ខណៈកាលពីពេលថ្មីៗនេះ សារព័ត៌មានបានបង្ហាញថា សហរដ្ឋអាមេរិកបានដាក់ពិន័យក្រុមហ៊ុនចិន ដែលកំពុងប្រតិបត្តិការនៅក្នុងតំបន់សេដ្ឋកិច្ចពិសេសក្រុងព្រះសីហនុ សម្រាប់ការប៉ុនប៉ងខុសច្បាប់ ក្នុងការចៀសវាងការដាក់ពន្ធរបស់អាមេរិកលើទំនិញចិន តាមរយៈការដឹកជញ្ជូនទំនិញ តាមរយៈខេត្តព្រះសីហនុ។
អ្នកនាំពាក្យស្ថានទូតអាមេរិកលោក Arend Zwartjes បានប្រាប់សារព័ត៌មានរ៉យទ័រកាលពីម្សិលមិញថា “ក្រសួងសន្តិសុខមាតុភូមិអាមេរិកបានត្រួតពិនិត្យ និងពិន័យក្រុមហ៊ុនមួយចំនួន សម្រាប់ការគេចវេសពន្ធដាររបស់អាមេរិក ដោយការដឹកទំនិញតាមប្រទេសកម្ពុជា។ ក្រុមហ៊ុនទាំងនេះស្ថិតនៅក្នុងតំបន់សេដ្ឋកិច្ចពិសេសខេត្តព្រះសីហនុ”។
អ្នកគ្រប់គ្រងតំបន់សេដ្ឋកិច្ចពិសេស ខេត្តព្រះសីហនុបានបដិសេធថា ក្រុមហ៊ុនចិនត្រូវបានគេពិន័យ ឬជាប់ពាក់ព័ន្ធគឺរឿងខុសមួយ។
អ្នកគ្រប់គ្រងទូទៅតំបន់សេដ្ឋកិច្ចពិសេសខេត្តព្រះសីហនុ លោក Cao Jianjiang បាននិយាយថា “យើងមានការសោកស្តាយយ៉ាងខ្លាំង ចំពោះការខូចខាតដល់កេរ្តិ៍ឈ្មោះរបស់តំបន់សេដ្ឋកិច្ចពិសេសខេត្តព្រះសីហនុ ដែលបង្កឡើងដោយរបាយការណ៍មិនពិតខាងលើ”។
លោក Jianjiang បាននិយាយថា “យើងតែងតែទទូចលើការបង្កើត និងការគ្រប់គ្រងសួនឧស្សាហកម្មស្របតាមច្បាប់ និងបទបញ្ជា និងប្រឆាំងនឹងសកម្មភាពខុសច្បាប់ណាមួយ។ នាពេលអនាគតយើងនឹងបន្តប្រតិបត្តិការ ដោយអនុលោមទៅតាមច្បាប់ និងបទបញ្ជា”។
យោងតាមក្រុមប្រឹក្សាអភិវឌ្ឍន៍កម្ពុជា (CDC) បានឲ្យដឹងថា ទំនិញនាំចេញរបស់តំបន់សេដ្ឋកិច្ចពិសេស ខេត្តព្រះសីហនុមានតម្លៃ៣៧២លានដុល្លារ កាលពីឆ្នាំមុនពោលគឺកើនឡើង៦៨ភាគរយ ធៀបនឹងរយៈពេលដូចគ្នាកាលពីឆ្នាំទៅមួយ ហើយបានចុះបញ្ជីទុនវិនិយោគមានទឹកប្រាក់ជិត៩១៨លានដុល្លារ។
តំបន់សេដ្ឋកិច្ចពិសេសខេត្តព្រះសីហនុ បានបង្កើតឡើងក្នុងឆ្នាំ២០០៨ ដែលមានរោងចក្រចំនួន១៦០ និងបង្កើតការងារដល់ប្រជាជនចំនួន២ម៉ឺននាក់ និងតំបន់សេដ្ឋកិច្ចពិសេសខេត្តព្រះសីហនុមានផ្ទៃដីចំនួន១,១១៣ ហិកតានៅខេត្តព្រះសីហនុ។
ក្នុងបទសម្ភាសថ្មីៗនេះឧបនាយករដ្ឋមន្ត្រីកម្ពុជា ហោ ណាំហុង បានថ្លែងថា តំបន់សេដ្ឋកិច្ចពិសេសផ្សេងទៀត គួរធ្វើគំរូពីតំបន់សេដ្ឋកិច្ចពិសេសខេត្តព្រះសីហនុ។
លោកបានមានប្រសាសន៍ថា “សម្រាប់តំបន់សេដ្ឋកិច្ចពិសេសនេះ ខ្ញុំអាចចាត់ទុកវាជាគំរូជីវសាស្រ្តរបស់រាជរដ្ឋាភិបាលកម្ពុជា និងរដ្ឋាភិបាលចិន”៕
