ដោយៈ រ៉ាណេត
ភ្នំពេញៈ នៅពេលនិយាយពីកំហុស ជាធម្មជាតិមនុស្សមិនចង់ទទួលទេ ហេតុនេះការសាចទឹកដាក់គ្នាជារឿងមិនគួរកើតមាន ប៉ុន្តែការចាត់ទុកវាជាមេរៀន១ដើម្បីបង្ការកុំឲ្យមានសោកនាដកម្មអាក្រក់កើតមានជាថ្មី ជារឿងប្រសើរបំផុតខណៈការរ៉ុករកសាកសពនៃការដួលរលំអាគារបាននិងកំពុងប្រព្រឹត្តិទៅ។
ប៉ុន្តែសំណួរនៅទីនេះ គឺថា តើមុនសម្រេចឲ្យសាងសង់អាគារក្នុងទំហំណាមួយ តើសមត្ថកិច្ចថ្នាក់ជាតិ ឬថ្នាក់ក្រោមជាតិទទួលខុសត្រូវ?។
អនុប្រធានមន្ទីររៀបចំដែនដី នគរូបនីយកម្ម និងសំណង់ ខេត្តកណ្តាល លោកបណ្ឌិតវ៉ាន់ វ៉ាត បានមានប្រសាសន៍ឲ្យដឹងតាមទូរស័ព្ទកាលពីថ្ងៃទី២៣ មិថុនាកន្លងមកថា គ្រប់ការសាងសង់សំណង់គ្រប់ប្រភេទ សុទ្ធតែត្រូវបានកំណត់ដោយច្បាប់ និងបទដ្ឋានគតិយុត្តិទាំងអស់។លក្ខខណ្ឌនៃច្បាប់ គឺថ្នាក់ក្រសួងមានការបែងចែកចំពោះគ្រប់សកម្មភាព និងទំហំនៃការសាងសង់ទាំងអស់ ប៉ុន្តែការអនុវត្តជាក់ស្ដែងការអនុវត្ត នៅមានការខ្វះខាតច្រើន។
លោកបានបន្តទៀតថា “តាមគោលការណ៍ ក៏ដូចជាបទដ្ឋានគតិយុត្តិត្រូវបានបែងចែក និងចាត់ចែងទំហំនៃការទទួលខុសត្រូវ រួមជាមួយនឹងសិទ្ធិអំណាចក្នុងការសម្រេចត្រឹមថ្នាក់ស្រុក (ការិយាល័យ) ថ្នាក់ខេត្ត (មន្ទីរ) និងរាធានីភ្នំ (ក្រសួងរៀបចំដែនដី នគរូបនីយកម្ម និងសំណង់)”។ លោកបន្តទៀតថា “រាល់គម្រោងសាងសង់សំណង់ដែលស្ថិតនៅក្រោមទំហំ៥០០ម៉ែត្រការ៉េ ការទទួលខុសត្រូវ និងសេចក្ដីសម្រេចអនុញ្ញាតជាបន្ទុករបស់ថ្នាក់ស្រុក ប៉ុន្តែទាមទារឱ្យប័ណ្ណបញ្ជាក់ពីកម្មសិទ្ធិ (ប្លង់រឹង) ជាពិសេសពិនិត្យឱ្យច្បាស់ថា សំណើរសាងសង់សំណង់ មិនប៉ះពាល់ទៅលើតម្រូវការនៃការប្រើប្រាស់ដីក្នុងគម្រោងអភិវឌ្ឍ ដែលស្ថិតនៅក្នុងប្លង់មេរបស់រដ្ឋាភិបាលនៅថ្ងៃអនាគត”។
លោកបណ្ឌិតបានបន្តទៀតថា គម្រោងសាងសង់សំណង់ដែលស្ថិតនៅក្រោមទំហំ ៣០០០ម៉ែត្រការ៉ សមត្ថកិច្ចថ្នាក់ក្រោមជាតិ(ថ្នាក់រាជធានី ខេត្តមានសិទ្ឋសម្រេចនិងអនុញ្ញាតរបស់ថ្នាក់ខេត្ត ដែលជាសេនាធិកាទទួលបន្ទុក ប៉ុន្តែទាមទារឱ្យប័ណ្ណបញ្ជាក់ពីកម្មសិទ្ធិ (ប្លងរឹង) និងពិនិត្យឱ្យច្បាស់ថា សំណើរសាងសង់សំណង់មិនប៉ះពាល់ទៅលើតម្រូវការនៃការប្រើប្រាស់ដី ក្នុងគម្រោងអភិវឌ្ឍដែលស្ថិតនៅក្នុងប្លង់មេ របស់រដ្ឋាភិបាលនៅថ្ងៃអនាគត។
បន្ថែមពីនេះ ជាងសាងសង់ ឬក្រុមហ៊ុនទទួលម៉ៅការ ត្រូវតែមានអជ្ញាប័ណ្ណអាជីវកម្ម និងជំនាញយ៉ាងត្រឹមត្រូវ។ ចំពោះរាល់គម្រោងសាងសង់សំណង់អគារនានាដែលស្ថិតនៅលើផ្ទៃដីលើសពី៣០០០ម៉ែត្រការ៉េឡើងទៅ ក្រៅពីមានឯកសារ និងលក្ខខណ្ឌពាក់ព័ន្ធនានា ដូចដែលបានបញ្ជាក់ខាងលើនេះ ការសម្រេច និងផ្តល់សិទ្ធិក្នុងការសាងសង់់ ឬអភិវឌ្ឍសំណង់គឺជាបន្ទុករបស់ថ្នាក់ជាត ដែលជាសិទ្ធិអំណាចរបស់ក្រសួងរៀបចំដែនដី នគរូបនីយកម្ម និងសំណង់។
ក្រសួងរៀបចំដែនដី នគរូបនីយកម្មនិងសំណង់ បានដាក់ចេញនូវច្បាប់ និងបទដ្ឋានគតិយុត្តិចំនួន៣ ទៅដល់សាធារណជន ក្នុងការអនុវត្តដំណើរការសាងសង់របស់ខ្លួនឱ្យបានត្រឹមត្រូវ។ ច្បាប់ និងបទដ្ឋានគតិយុត្តនោះ រួមមាន ទី១ រាល់ការសាងសង់ ត្រូវមានលិខិតអនុញ្ញាតសាងសង់ និងលិខិតបើកការដ្ឋានសាងសង់ ទី២ ម្ចាស់សំណង់ ត្រូវជួលតែក្រុមហ៊ុនសាងសង់ ឬក្រុមជាងដែលបានចុះបញ្ជីត្រឹមត្រូវ និងមានវិញ្ញាបនបត្រធានារ៉ាប់រងការដ្ឋាន និងទី៣ អាជ្ញាធរគ្រប់ថ្នាក់ ត្រូវសហការគ្នាតាមដានគ្រប់ការដ្ឋានសាងសង់ ឱ្យប្រព្រឹត្តទៅស្របតាមច្បាប់ និងលិខិតបទដ្ឋានគតិយុត្តិជាធរមាន។
លោកបណ្ឌិតវ៉ាន់ វ៉ាត់ បានមានប្រសាសន៍បន្តទៀតថា “ការកំណត់ពីទំហំនៃផ្ទៃដីសាងសង់តួអគារ គឺជារឿងមួយដែលត្រូវបានកំណត់ដោយបទដ្ឋានគតិយុត្តិ។ ដោយឡែកពាក់ព័ន្ធទៅនឹងកម្ពស់នៃតួអគារ ក៏ត្រូវបានកំណត់ផងដែរ អាស្រ័យទៅតាមតំបន់មួយចំនួនដែលត្រូវបានអនុញ្ញាត និងហាមឃាត់មិនអាចឱ្យសាងសង់ផងដែរ។
លោកបានបន្តទៀតថា “ក្រោយការសម្រេចឱ្យមានដំណើរសាងសង់ អាជ្ញាធរដែលជាមន្ត្រីជំនាញពាក់ព័ន្ធ ក៏ត្រូវមានកាតព្វកិច្ចចុះធ្វើការពិនិត្យ ទៅលើទិដ្ឋភាពជាក់ស្ដែងនៃការសាងសង់ ដើម្បីធ្វើឲ្យប្រាកដថា តើម្ចាស់គម្រោងបានគោរពទៅតាមការកំណត់របស់ច្បាប់ឬទេ មន្ត្រីជំនាញត្រូវចុះពិនិត្យទៅលើគុណភាពសំណង់ផងដែរ ជៀសវាងកើតមានហានិភ័យទៅថ្ងៃអនាគត”៕
