ដោយៈ រ៉ាណេត
ភ្នំពេញៈ បើមិនមានការប្រែប្រួលនោះទេ គម្រោងសាងសង់ផ្សារទំនើប AEON Mall 3 ដែលមានទីតាំងស្ថិតនៅមហាវិថីសម្ដេច តេជោ ក្នុងតំបន់អភិវឌ្ឍទីក្រុងរណប ING City នឹងធ្វើការចាប់ផ្តើមបុកគ្រឹះនៅដើមឆ្នាំ២០២០ឆាប់ៗខាងមុខនេះ។ នេះបើផ្អែកតាមការបង្ហើបប្រាប់ពីប្រភពដែលអាចជឿទុកចិត្តបាន។
យោងតាមប្រភពព័ត៌មានពីថ្នាក់ដឹកនាំក្រុមហ៊ុន ដែលកំពុងផ្អត់ផ្គង់សម្ភារៈ បរិក្ខា នានាដល់ផ្សារទំនើបនេះជាប្រចាំ បាននិយាយក្នុងលក្ខខ័ណ្ឌមិនបញ្ចេញឈ្មោះឲ្យដឹងកាលពីល្ងាចថ្ងៃទី២៦ មិថុនាកន្លងមកថា បើមិនមានអ្វីប្រែប្រួលនោះទេ នៅត្រឹមដើមឆ្នាំ២០២០ឆាប់ៗខាងមុខនេះ គម្រោងសាងសង់ផ្សារទំនើប AEON 3 នឹងចាប់ផ្តើមបុកគ្រឹះដំណើរការសាងសង់ជាផ្លូវការណ៍ហើយ។
-->
ប្រភពដដែលបានលើកឡើងថា “ផ្សារទំនើបលំដាប់ពិភពលោក AEON Mall 3 ដែលមានទីតាំងតាមបណ្តោយមហាវិថី សម្ដេច តេជោ ហ៊ុន សែន ខាងលើនេះ នឹងត្រូវចំណាយពេលសាងសង់ត្រឹម២៤ខែ ស្មើនឹងរយៈពេល២ឆ្នាំឱ្យរួចរាល់”។
លោកបានបញ្ជាក់ថា “ពេលនេះដំណើរការនៃការរៀបចំឯកសារស្នើសុំការសាងសង់ រួមជាមួយនឹងឯកសារក្នុងការដឹកជញ្ជូនសម្ភារៈ សម្រាប់សាងសង់ត្រូវបានធ្វើរួចរាល់ហើយ”។
ទោះជាយ៉ាងណាក៏ដោយ ប្រភពដដែលនេះ សុំមិនបង្ហាញពីចំនួនទុនចំណាយសរុបក្នុងការសាងសង់នោះទេ។
កាលពីចុងឆ្នាំ២០១៨កន្លងទៅ តាមរយៈសេចក្ដីប្រកាសព័ត៌មានរបស់ក្រុមហ៊ុនអភិវឌ្ឍផ្សារទំនើបបានលើកឡើងថា ផ្សារទំនើប AEON 3 នឹងត្រូវដាក់ឱ្យដំណើរការនៅឆ្នាំ២០២៣។ គម្រោងផ្សារទំនើប AEON Mall 3 នឹងមានផ្ទៃក្រឡាសរុបរហូតដល់ទៅ ១៧៤,០០០ ម៉ែត្រការ៉េ ដែលធំជាងផលបូកផ្ទៃក្រឡាផ្សារទំនើប AEON 1 (៦៨០០០ ម៉ែត្រការ៉េ) និងផ្សារទំនើប AEON 2 ខណ្ឌសែនសុខ (១០០០០០ ម៉ែត្រការ៉េ)។
លោកឧកញ៉ា នួន រិទ្ធី អគ្គនាយកក្រុមហ៊ុនអចលនទ្រព្យ KFA បានឱ្យដឹងកាលពីពេលកន្លងទៅនេះថា ក្រុមហ៊ុន AEON MALL GROUP បានទិញដីក្នុងតម្លៃរហូតដល់ជាង ១០០លានដុល្លារនៅតំបន់ខាងលើនេះ ដើម្បីសាងសង់ផ្សារទំនើបរបស់ខ្លួន ដែលនេះជាគំរោងវិនិយោគដ៏ធំមួយទៀតរបស់ក្រុមហ៊ុនជប៉ុន។ លោកឧកញ៉ាបានបន្តថា ការមកដល់នៃក្រុមហ៊ុនលំដាប់អន្តរជាតិល្បីៗ ពិសេសក្រុមហ៊ុនជប៉ុន ដែលបានមកវិនិយោគនៅកម្ពុជា ឆ្លុះបញ្ចាំងពីទំនុកចិត្ត និងបរិយាកាសវិនិយោគនៅកម្ពុជាកាន់តែល្អប្រសើរ។
លោកបន្តថា “អ្នកវិនិយោគជប៉ុនមិនងាយចូលទៅវិនិយោគ នៅប្រទេសណានោះទេ ហេតុនេះនៅពេលពួកគេទៅវិនិយោគមានន័យថា ប្រទេសនោះមានបរិយាកាសនយោបាយល្អ និងស្ថានភាពនៃការវិនិយោគមានភាពប្រសើរ ដែលអាចផ្តល់ភាពកក់ក្តៅដល់ពួកគេ”៕
