ដោយ Donald Lee
ភ្នំពេញ៖ ការវិនិយោគទុនដោយផ្ទាល់ពីបរទេសរបស់ចិនក្នុងវិស័យផលិតកម្មក្នុងតំបន់អាស៊ាននៅទសវត្សរ៍ខាងមុខនឹងផ្លាស់ប្តូរតំបន់នេះទៅជា”តំបន់រោងចក្ររបស់ពិភពលោក” ថ្មី។ នេះបើយោងតាមអ្នកសិក្សាភូមិសាស្រ្តមួយរូប។
លោក Arm Tungnirun អ្នកសិក្សាភូមិសាស្រ្តនៃសាកលវិទ្យាល័យជូឡាឡុងកនដែលមានមូលដ្ឋាននៅប្រទេសថៃ និងជាអ្នកនិពន្ធសៀវភៅប្រទេសចិន 5.0 បានឲ្យដឹងថា “តំបន់អាស៊ាននឹងក្លាយទៅជាមូលដ្ឋានថ្មីសម្រាប់មជ្ឈមណ្ឌលផលិតកម្មរបស់ចិននៅពេលឆាប់ៗនេះ នៅពេល ចិនព្យាយាមផ្លាស់ប្ដូរទីតាំងចង្វាក់ផលិតកម្មផ្គត់ផ្គង់ចេញអាស៊ីប៉ាស៊ីហ្វិក”។
-->
ខណៈក្រុមហ៊ុនចិនកំពុងត្រូវបានរងផលប៉ះពាល់ដោយសង្រ្គាមពាណិជ្ជកម្មរវាងចិន និងអាម៉េរិក ជំហានបន្ទាប់នៅក្នុងគម្រោងខ្សែក្រវ៉ាត់មួយនិងផ្លូវមួយរបស់ចិនគឺនឹងមានផ្លាស់ប្ដូមូលដ្ឋានផលិតកម្មរបស់ចិនទៅកាន់តំបន់អាស៊ាន។ នេះបើយោងតាមលោក Arm Tungnirun បានថ្លែងក្នុងកិច្ចប្រជុំមួយនៅទីក្រុងបាងកកកាលពីម្សិលមិញ។
យោងតាមវិទ្យាស្ថានស្រាវជ្រាវអាស៊ាន CIMB បានឲ្យដឹងថា ថវិកាគម្រោងខ្សែក្រវ៉ាត់មួយនិងផ្លូវមួយក្នុងតំបន់បានកើនដល់ ៧៣៧ ពាន់លានដុល្លារកាលពីឆ្នាំមុន។ ប្រទេសកម្ពុជាស្ថិតក្នុងលំដាប់ថ្នាក់កំពូលក្នុងចំណោមប្រទេសអាស៊ានទាំងបីដែលទទួលបានលំហូរទុនវិនិយោគពាក់ព័ន្ធនឹងគម្រោងខ្សែក្រវ៉ាត់មួយនិងផ្លូវមួយដែលមានទឹកប្រាក់ចំនួន ១០៤ ពាន់លានដុល្លារ។
ប្រទេសទទួលបានទុនវិនិយោគច្រើនបំផុតគឺឥណ្ឌូណេស៊ីដែលមានទឹកប្រាក់ប្រមាណ ១៧១ ពាន់លានដុល្លារ ហើយបន្ទាប់មកគឺប្រទេសវៀតណាម ១៥២ ពាន់លានដុល្លារ។ការចាកចេញរបស់ក្រុមហ៊ុនមួយចំនួនពីប្រទេសចិនទៅកាន់បណ្តាប្រទេសអាស៊ាន ដោយសារតែសង្គ្រាមពាណិជ្ជកម្មរវាងអាមេរិក និងចិនដែលអាចមានការតម្លើងពន្ធគយ ២៥ ភាគរយផលិតផលចិនទាំងអស់។
របាយការណ៍សេដ្ឋកិច្ចរបស់ទីភ្នាក់ងារព័ត៌មាន Bloomberg ចេញផ្សាយនៅថ្ងៃនេះ បានប៉ាន់ស្មានថា តម្លៃនៃផលប៉ះពាល់ដោយសង្គ្រាមពាណិជ្ជកម្មរវាងអាមេរិក និងចិនអាចមានតម្លៃរហូតដល់ចំនួន ១,២ ពាន់ពាន់លានដុល្លារ និងធ្វើឲ្យសេដ្ឋកិច្ចសកលធ្លាក់ចុះ។
ក្រុមហ៊ុនផលិតកម្មអាមេរិកដែលកំពុងប្រតិបត្តិការនៅចិនបានប្រមូលផ្ដុំយុទ្ធសាស្ត្រចាកចេញពីចិនទៅកាន់តំបន់អាស៊ីអាគ្នេយ៍។ ឧទាហរណ៍ ក្រុមហ៊ុន Steve Madden ផលិតស្បែកជើង និងកាបូបដៃអាមេរិក បានប្រកាសអំពីផែនការបង្កើនផលិតកម្មនៅក្នុងប្រទេសកម្ពុជា បន្ទាប់ពីបានដាក់ទុនវិនិយោគ ៩០ ភាគរយ នៃផលិតផលរបស់ខ្លួននៅចិនកាលពីឆ្នាំមុន។
ក្រុមអ្នកវិភាគអះអាងថា ក្រុមហ៊ុនចិន និងរដ្ឋាភិបាលចិនកំពុងជួយគាំទ្រដល់កម្ពុជាដោយមិនត្រឹមតែធ្វើឲ្យកម្ពុជាក្លាយជាមជ្ឈមណ្ឌលផលិតកម្មប៉ុណ្ណោះទេ ថែមទាំងធ្វើឲ្យក្លាយជាមជ្ឈមណ្ឌលភស្តុភារកណ្តាលនៃតំបន់មេគង្គទាំងមូល។ ប្រមាណជា ៧៧ ភាគរយនៃលំហូរវិនិយោគផ្ទាល់ពីបរទេសដែលរដ្ឋាភិបាលកម្ពុជាបានអនុម័តគឺមកពីចិន។
ចិនមិនត្រឹមតែក្លាយទៅជាដៃគូពាណិជ្ជកម្មដ៏ធំបំផុតរបស់កម្ពុជាប៉ុណ្ណោះទេ ថែមទាំងជាអ្នកវិនិយោគបរទេស ម្ចាស់ជំនួយទ្វេភាគី អ្នកនាំចូលអង្ករពីកម្ពុជា និងប្រភពដើមនៃភ្ញៀវទេសចរបរទេសដ៏ធំបំផុតផងដែរ។
គម្រោងខ្សែក្រវ៉ាត់មួយ និងផ្លូវមួយ ដូចជាគម្រោងវិនិយោគផ្លូវល្បឿនលឿនភ្នំពេញ-ក្រុងព្រះសីហនុដែលមគិតជាទឹកប្រាកប្រមាណជា ២,០៨ ពាន់លានដុល្លារ ដែលនឹងក្លាយជាច្រករបៀងសំខាន់សម្រាប់ការនាំចេញ និងនាំចូល កំពុងឆ្លើយតបនឹងការអភិវឌ្ឍន៍ហេដ្ឋារចនាសម្ព័ន្ធជាចាំបាច់ដើម្បីបង្វែរកម្ពុជាទៅជាមូលដ្ឋានផលិតកម្ម និងភ័ស្តុភារ។
ក្រុមហ៊ុន Alibaba Group ចាប់អារម្មណ៍ក្នុងការប្រែក្លាយកម្ពុជាទៅជាមជ្ឈមណ្ឌលដឹកជញ្ជូនដោយធ្វើពាណិជ្ជកម្មអេឡិចត្រូនិកនៅ ៥ ឆ្នាំខាងមុខទៀត។
លោក Kevin Li អ្នកគ្រប់គ្រងទូទៅនៃក្រុមហ៊ុន Cainiao Smart Logistics Network Ltd. ដែលបុត្រសម្ព័ន្ធរបស់ក្រុមហ៊ុន Alibaba បាននិយាយថា “កម្ពុជាជាទីតាំងល្អបំផុត ប្រសិនបើអ្នកយកកម្ពុជាជាមជ្ឈមណ្ឌលដឹកជញ្ជូន និងមជ្ឈមណ្ឌលផ្ទេរសេវាកម្ម និងអាចគ្របដណ្តប់ប្រទេសវៀតណាម ថៃ និងសូម្បីតែមីយ៉ាន់ម៉ា”។
លោក បានបន្ថែមថា “គោលនយោបាយរបស់កម្ពុជាមានភាពប្រសើរជាងវៀតណាម និងថៃ”។បណ្តាប្រទេសអាស៊ានមានប្រជាជនសរុបជាង ៦០០ លាននាក់ និងមានផលិតផលសរុបក្នុងស្រុកប្រមាណ២,៤ ពាន់ពាន់ដុល្លារ ដែលធ្វើឲ្យក្រុមអ្នកវិភាគមួយចំនួនហៅតំបន់នេះថាជា “ប្រទេសចិនថ្មី” ។
អង្គការរូបិយវត្ថុពិភពលោក ព្យាករថា តំបន់អាស៊ាននឹងមានសេដ្ឋកិច្ចធំបំផុតទីបួននៅលើពិភពលោកនៅឆ្នាំ ២០៥០៕
