ដោយ ម៉ាណេត
ភ្នំពេញៈ សម្តេចតេជោ ហ៊ុន សែននាយករដ្ឋមន្រ្តីនៃព្រះរាជាណាចក្រកម្ពុជាបានថ្លែងថា សេដ្ឋកិច្ចកម្ពុជាត្រូវបានរំពឹងទុកថា នឹងសម្រេចបានអត្រាកំណើន៧,១ភាគរយដែលគាំទ្រដោយកំណើនរឹងមាំនៃឧស្សាហកម្ម និងកំណើននៃកំណើននៃវិស័យសេវាកម្ម បើទោះជាវិស័យកសិកម្មនៅបន្តមានកំណើនទាបក្តី។
មានប្រសាសន៍ក្នុងឱកាសប្រារព្ធខួប៦៨ឆ្នាំថ្ងៃកំណើត គណបក្សប្រជាជនកម្ពុជានៅព្រឹកថ្ងៃទី២៨ មិថុនានេះនាទីក្រុងកោះពេជ្រ សម្ដេចតេជោមានប្រសាសន៍បន្តថា “នៅឆមាសទី ១ ឆ្នាំ ២០១៩ នេះ រាល់សកម្មភាពសេដ្ឋកិច្ចកំពុងដំណើរការយ៉ាងល្អ”។
-->
សម្តេចបន្តថា ជាក់ស្តែងរយៈពេល៤ខែដើមឆ្នាំ គម្រោងវិនិយោគ១១៥គម្រោងដែលមានទុនវិនិយោគប្រមាណ៤ពាន់លានដុល្លារត្រូវបានអនុម័ត ធៀបនឹងរយៈពេលដូចគ្នា២០១៨ ដែលមានគម្រោង៨១គម្រោង និងទុនវិនិយោគ ៨៦៣លានដុល្លារ។ ការនាំចេញផលិតផលកាត់ដេរនៅតែមានកំណើនខ្ពស់។ ការនាំអង្ករចេញសម្រេចបានជាង ២១ ម៉ឺនតោន ធៀបនឹងរយៈពេលដូចគ្នាកាលពីឆ្នាំ ២០១៨ កើនឡើង៨,៣ ភាគរយ ហើយវិស័យសំណង់ និងអចលនទ្រព្យក៏នៅតែបន្តកំណើនខ្ពស់។
ជាមួយគ្នានេះ កម្ពុជាទទួលបានភ្ញៀវទេសចរបរទេសជាង ២,៤លាននាក់ កើនឡើង១១ ភាគរយ ធៀបនឹងរយៈពេលដូចគា្នក្នុងឆ្នាំមុន។
កាលពីពេលថ្មីៗនេះ ធនាគារពិភពលោកក៏បានថ្លែងនៅក្នុងរបាយការណ៍បច្ចុប្បន្នភាពសេដ្ឋកិច្ចកម្ពុជាថា ប្រទេសកម្ពុជាសម្រេចបានកំណើនសេដ្ឋកិច្ច ៧,៥ភាគរយនៅក្នុងឆ្នាំ២០១៨ ដែលជាអត្រាកំណើនល្អជាងការរំពឹងទុកទៅទៀត ដោយមានការជំរុញមួយផ្នែកធំពីការកើនយ៉ាងរហ័សនៃការនាំចេញ និងការបន្តលូតលាស់នៃវិស័យសំណង់។
ការនាំចេញរបស់ផលិតផលសម្លៀកបំពាក់ ស្បែកជើង និងមុខទំនិញធ្វើដំណើរ ដែលទាំងអស់នេះ មានជាងពីរភាគបីនៃមុខទំនិញនាំចេញសរុប ជាកំណត់ត្រាកំណើនខ្ពស់ប្រាំឆ្នាំជាប់គ្នាហើយ ដោយវាកើនបាន១៧,៦ភាគរយក្នុងឆ្នាំ២០១៨ ប្រៀបធៀបជាមួយ ៨,៣ភាគរយក្នុងឆ្នាំ២០១៧។
វិស័យសំណង់ អចលនទ្រព្យ និងទេសចរណ៍សរុបគ្នាមកមានចំណែក៦០ភាគរយ នៃចំនួនគម្រោងវិនិយោគទាំងអស់ ដែលត្រូវបានអនុម័តរួចក្នុងឆ្នាំ២០១៨។ ការផលិតសម្ភារផ្គត់ផ្គង់ការសាងសង់ ដែកគ្រឿងសង្ហារឹម និងផលិតផលប្ល៉ាស្ទ៊ីកក៏មានការកើនឡើងយ៉ាងលឿនដែរ ដើម្បីគាំទ្រដល់ការលូតលាស់របស់វិស័យសំណង់៕
