ដោយ រ៉ាណេត
ភ្នំពេញៈ ស្ថាប័នថ្នាក់ជាតិ ថ្នាក់ក្រោមជាតិ និងដៃគូអភិវឌ្ឍន៍បានប្រកាសផ្សព្វផ្សាយអភិវឌ្ឍន៍ និងដាក់ឱ្យប្រើប្រាស់ជាផ្លូវការ និងជំរុញឱ្យការអនុវត្តធ្វើឡើងឱ្យមានប្រសិទ្ធភាព និងតម្លាភាពខ្ពស់ នៃគម្រោងអភិវឌ្ឍន៍ទីក្រុងនិរន្តរភាពសម្រាប់រាជធានីភ្នំពេញ២០១៨-២០៣០។
រដ្ឋលេខាធិការក្រសួងបរិស្ថាន លោក អ៊ាង សុផល្លែត បានលើកឡើងក្នុងពិធីនាព្រឹកថ្ងៃទី២៧ មិថុនាកន្លងមកថា ការអភិវឌ្ឍបៃតង ដែលជាគំរូអភិវឌ្ឍន៍ ដើម្បីធានានូវការអភិវឌ្ឍសេដ្ឋកិច្ចសង្គម និងនិរន្តរភាព បរិស្ថាន និងបានគូសបញ្ជាក់ពីកិច្ចខិតខំប្រឹងប្រែងអនុវត្តន៍ការអភិវឌ្ឍបៃតងរបស់ថ្នាក់ជាតិ និងអន្តរជាតិ ដើម្បីឆ្ពោះទៅរកការអភិវឌ្ឍប្រកបដោយចីរភាព និងកាត់បន្ថយភាពក្រីក្រ។ ជាមួយគ្នានេះ លោកក៏បានបង្ហាញផងដែរថា ទីក្រុង គឺជាទីកន្លែងប្រមូលផ្តុំនៃសកម្មភាពសេដ្ឋកិច្ច ជំរុញការបង្កើតការងារ និងកំណើនផលិតផលក្នុងស្រុកសរុប។
ប៉ុន្តែទីក្រុងក៏ជាកន្លែងដែលមានធនធាន ដូចជា ទឹក ថាមពល និងធនធានផ្សេងៗទៀតត្រូវបានប្រើប្រាស់ ដោយឧស្សាហកម្មក្នុងការជំរុញការអភិវឌ្ឍសេដ្ឋកិច្ច។
-->
លោក អ៊ាង សុផល្លែត បានបញ្ជាក់ថា “រាជរដ្ឋាភិបាលកម្ពុជាបានចាប់ផ្តើមជំរុញអភិវឌ្ឍន៍ប្រកបដោយចីរភាព និងការអភិវឌ្ឍទីក្រុងនិរន្តរភាព នៅក្នុងអាទិភាពគោលនយោ បាយរបស់ខ្លួន សម្រាប់ឱកាសពន្លឿនកំណើនសក្តានុពលបន្ថែមទៀត តាមរយៈការអភិវឌ្ឍទីក្រុងបៃតង និងជំរុញឱ្យមានឱកាសផ្សេងៗពីវិស័យកាត់ដេរ ទេសចរណ៍ និងវិស័យអច លនទ្រព្យ និងសំណង់”។ លោកបានគូសបញ្ជាក់ថា “ផែនការអភិវឌ្ឍន៍ទីក្រុងនិរន្តរភាពសម្រាប់រាជធានីភ្នំពេញនេះ គឺជាការចាប់ផ្តើមដ៏ល្អមួយ ដើម្បីធ្វើជាគំរូដល់ទីក្រុងសក្តានុពលផ្សេងៗទៀតជាបន្តបន្ទាប់”។
លោកហួត ហៃ អភិបាលរងរាជធានីភ្នំពេញ បានមានប្រសាសន៍ថា ខណៈដែលសេដ្ឋកិច្ចរាជធានីភ្នំពេញមានការរីកចម្រើនខ្លាំង ហើយមានប្រជាជនចូលមករស់នៅ និងប្រកបរបរចិញ្ចឹមជីវិតកាន់តែច្រើន វាពិតជាមានសារៈសំខាន់ដែលរាជធានីភ្នំពេញ ត្រូវតែមានការអភិវឌ្ឍប្រកបដោយនិរន្តរភាពសម្រាប់ប្រជាពលរដ្ឋ។
លោកបានបន្តទៀតថា “ផលវិបាកទាំងវិជ្ជមាន និងអវិជ្ជមាននៃការរីកលូតលាស់យ៉ាងឆាប់រហ័យនៃវិស័យ នគរូបនីយកម្ម ដែលបានជះឥទ្ធិពលដល់ការអភិវឌ្ឍសេដ្ឋកិច្ច និងសង្គម រួមមាន៖ ការកកស្ទះចរាចរណ៍ ទឹកកខ្វក់ និងការកើនឡើងនៃបរិមាណសំរាមក្នុងរាជធានីជាដើម”។
ជាមួយគ្នានេះ លោកស្រី Karolien Casaer អ្នកតំណាងវិទ្យាស្ថានអភិវឌ្ឍន៍បៃតងសកល (GGGI) ប្រចាំកម្ពុជា បានបង្ហាញអំពីបញ្ហាប្រឈមខ្លះៗទៅលើការអភិវឌ្ឍទីក្រុងបៃតងជុំវិញពិភពលោក ហើយក៏បានបង្ហាញពីដំណោះស្រាយដែល GGGI បានណែនាំទៅដល់ បណ្តារដ្ឋជាសមាជិកទាក់ទងទៅនឹងវិស័យជាច្រើន ដូចជា សំណង់អគារបៃតង ការដឹកជញ្ជូនដោយប្រើថាមពលស្អាត និងការថែរក្សាអនាម័យ (ទឹកកខ្វក់) ជាដើម។
លោកស្រីក៏បានគូសបញ្ជាក់ពីគម្រោងខ្លះៗ នៅក្នុងខេត្តសៀមរាប កែប និងខេត្តបាត់ដំបង ដែល GGGI បាននិងកំពុងធ្វើការជាមួយរដ្ឋបាលក្រុងទាំងនោះ និងសហគមន៍ធុរកិច្ចក្នុងស្រុកស្តីពី ដំណោះស្រាយលើការគ្រប់គ្រងទឹកកខ្វក់ និងអនាម័យ។
លោកស្រីបានសង្កត់ធ្ងន់ទៅលើកាលានុវត្តភាព ដែលការអភិវឌ្ឍទីក្រុងបៃតងអាចជួយដល់ប្រជាជន និងវិស័យឧស្សាហកម្មក្នុងរាជធានីភ្នំពេញ និងឱកាសក្នុងការបង្កើតការងារ ការវិនិយោគបៃតង និងការកើនឡើងនូវសុខភាពសាធារណៈ និងសុខុមាលភាពរបស់ប្រជាជន។
សេណារីយូឧស្សាហកម្មបៃតងដែល GGGI និង NCSD បានបង្កើតកាលពីឆ្នាំមុនបង្ហាយឱ្យឃើញថា ការណែនាំឱ្យមានការប្រើប្រាស់បច្ចេកវិទ្យាបៃតង ក្នុងវិស័យឧស្សាហកម្មអាចបន្ថែមលើផលិតផលក្នុងស្រុក បានប្រមាណ២,៧ពាន់លានដុល្លារអាម៉េរិក គិតត្រឹមឆ្នាំ២០៣០ និងបង្កើតឱកាសការងារបានជាងកន្លះលាននាក់ ខណៈដែលការកាត់បន្ថយការបំភាយឧស្ម័ន និងកាបំពុលបរិស្ថាន៕
