ដោយ វុត្ថា
ព្រះសីហនុៈ ក្រុមហ៊ុនយក្សចិន Prince Real Estate Group បានចាប់ផ្តើមបើកការដ្ឋានសាងសង់ គម្រោងអគារមជ្ឈមណ្ឌលសន្និសីទអន្តរជាតិកម្ពុជា នៅក្នុងក្រុងព្រះសីហនុ ដើម្បីត្រៀមរៀបចំកិច្ចប្រជុំអាស៊ាននៅក្នុងឆ្នាំ២០២២ខាងមុខ។
ពិធីសម្ពោធបើកការដ្ឋានសាងសង់គម្រោង អគារមជ្ឈមណ្ឌលសន្និសីទអន្តរជាតិកម្ពុជាត្រូវបានរៀបចំឡើងកាលពីថ្ងៃទី ២៧ខែមិថុនាឆ្នាំ២០១៩កន្លងមកនេះ ដែលមានទីតាំងស្ថិតនៅក្បែរនឹងកំពង់ផែស្វយ័តក្រុងព្រះសីហនុ និងជាប់ឆ្នេរអូរឈើទាលដែលមានផ្ទៃក្រឡាអភិវឌ្ឍន៍សរុបជាង១២០.០០០ម៉ែត្រការ៉េ។
-->
តែយ៉ាងណាក៏ដោយក្រុមហ៊ុននេះ មិនបានប្រកាសពីទុនវិនិយោគលើគម្រោងដ៏ធំនេះទេ។ គម្រោងនេះបានរួមបញ្ចូលគ្នា នូវមជ្ឈមណ្ឌលសន្និសីទអន្តរជាតិ និងសណ្ឋាគារលំដាប់ផ្កាយប្រាំដែលរំពឹងថា នឹងដាក់ឲ្យប្រើប្រាស់នៅថ្ងៃទី៣១ខែឧសភាឆ្នាំ២០២២។
ក្រុមហ៊ុនរំពឹថា នៅពេលសាងសង់រួចរាល់ គម្រោងនេះនឹងក្លាយទៅជាមជ្ឈមណ្ឌលសន្និសីទអន្តរជាតិខ្នាតធំ ដែលមាននូវអគារមជ្ឈមណ្ឌលសន្និសីទអន្តរជាតិ សណ្ឋាគារអគារមជ្ឈមណ្ឌលពាណិជ្ជកម្ម និងមុខងារជាច្រើនផ្សេងទៀត។ ទន្ទឹមនឹងនេះ គម្រោងនេះក៏ជាទីតាំងសម្រាប់ រៀបចំកិច្ចប្រជុំកំពូលអាស៊ានឆ្នាំ២០២២ផងដែរ។
សម្តេតេជោហ៊ុនសែន នាយករដ្ឋមន្ត្រីនៃកម្ពុជា ធ្លាប់បានប្រកាសកាលពីពេលថ្មីៗនេះថា នឹងជ្រើសរើសយកខេត្តព្រះសីហនុ ក្នុងការរៀបចំកិច្ចប្រជុំកំពូលអាស៊ាននៅកម្ពុជា នៅឆ្នាំ ២០២២ខាងមុខ ខណៈកម្ពុជាទទួលធ្វើជាម្ចាស់ផ្ទះ សម្រាប់កិច្ចប្រជុំកំពូលមួយនេះ។
ជាមួយគ្នានេះអាជ្ញាធរកម្ពុជា បាននឹងកំពុងជំរុញឱ្យក្រុមហ៊ុនវិនិយោគព្រលានយន្តហោះកម្ពុជា (SCA) ពង្រីកផ្លូវរត់ប្រវែងដល់៣៣០០ម៉ែត្រ របស់អាកាសយានដ្ឋានអន្តរជាតិខេត្តព្រះសីហនុឲ្យបានចប់មុនឆ្នាំ២០២២ ដើម្បីអាចធ្វើឱ្យយន្តហោះខ្នាតធំរបស់ថ្នាក់ដឹកនាំនានាដែលអញ្ជើញ ចូលរួមកិច្ចប្រជុំកំពូលអាស៊ាននៅកម្ពុជា នៅឆ្នាំ ២០២២ នៅក្នុងទឹកដីនៃខេត្តព្រះសីហនុនេះ។
ក្រុមហ៊ុន Prince Real Estate (Cambodia) Group Co.,Ltd. ជាក្រុមហ៊ុនជំនួញឈានមុខគេមួយនៅក្នុងប្រទេសកម្ពុជា ជាមួយនឹងការវិនិយោគយ៉ាងច្រើន នៅក្នុងវិស័យអចលនទ្រព្យ វិស័យទូរគមនាគមន៍ និងហិរញ្ញវត្ថុ។
ក្រុមហ៊ុន Prince Real Estate (Cambodia) Group Co.,Ltd. បានបង្កើតឡើងនៅក្នុងឆ្នាំ២០១៥ ដោយបានសាងសាងអគារជាច្រើនប្រភេទ ដូចជាសណ្ឋាគារ អគារស្នាក់នៅ ផ្ទះល្វែង ខុនដូ និងអគារពាណិជ្ជកម្មនៅតាមបណ្តាខេត្ត ក្រុងនានារបស់ប្រទេសកម្ពុជា។ បច្ចុប្បន្នក្រុមហ៊ុននេះមានសាខាចំនួន១៣ទីតាំងនៅក្នុងប្រទេសកម្ពុជា។
ក្នុងរយៈពេល១០ឆ្នាំ ក្រុមហ៊ុន Prince Real Estate Cambodia Group គ្រោងនឹងវិនិយោគនូវទឹកប្រាក់ ៦ពាន់លានដុល្លារ លើផ្ទៃដីទំហំជាង ៤០០ហិកតា ដើម្បីអភិវឌ្ឍគម្រោងអគារចម្រុះបណ្តុំនូវអគារលំនៅដ្ឋាន និងអគារពាណិជ្ជកម្មលំដាប់អន្តរជាតិ ស្មើនឹងទំហំអភិវឌ្ឍន៍សរុបជាង៦លានម៉ែត្រការ៉េ នៅក្នុងខេត្តក្រុងសំខាន់ៗ ដូចជា រាជធានីភ្នំពេញ ខេត្តព្រះសីហនុ និងខេត្តសៀមរាប៕
