ដោយៈ រ៉ាណេត
កំពត៖ ស្ថានភាពនៃតម្លៃអចលនទ្រព្យ ក៏ដូចជាសកម្មភាពនៃការចូលខ្លួនផ្តើមអភិវឌ្ឍទៅលើគម្រោងធំៗមួយចំនួនហើយ ខណៈតម្លៃដីធ្លីនៅខេត្តនេះបាននិងកំពុងបន្តកើនឡើង។នេះបើតាមការអះអាងរបស់អ្នកជំនាញក្នុងវិស័យនេះ។
នៅក្នុងទឹកដីខេត្តកំពត ដែលមានអំណោយផលបែបធម្មជាតិ ជាមួយនឹងតំបន់ឆ្នេរសមុទ្រ មាត់ព្រែកដែលមានទឹកសាប ទឹកប្រៃលាយជាមួយគ្នា ដែលអនុគ្រោះដល់វិស័យទេសចរណ៍នោះ នៅត្រឹមដើមឆមាសទី២នៃឆ្នាំ២០១៩នេះ សកម្មភាពនៃការសាងសង់សំណង់ផ្សេងៗ ក៏ដូចជាគម្រោងអភិវឌ្ឍធំៗមួយចំនួន បានចាប់ផ្តើមមានសកម្មភាពជាបណ្តើរហើយ។
-->
អគ្គនាយកក្រុមហ៊ុនអចលនទ្រព្យ R Investment Group លោកឧកញ៉ា តេង រិទ្ធី ដែលមានគម្រោងវិនិយោគ និងអភិវឌ្ឍលើវិស័យលំនៅដ្ឋានបែបលំហែរកាយ នៅក្នុងខេត្តកំពតបានមានប្រសាសន៍ប្រាប់តាមទូរស័ព្ទកាលពីព្រឹកថ្ងៃទី៤ ខែកក្កដា ឆ្នាំ២០១៩ នេះថា ខេត្តកំពតពេលនេះ បានចាប់ផ្តើមមានការផ្លាស់ប្ដូរមុខមាត់ជាបណ្ដើរៗហើយ។
លោកឧកញ៉ាបន្តទៀតថា “នៅក្នុងខេត្តមួយនេះ ខ្ញុំមានគម្រោងបណ្តាក់ទុនក្នុងការអភិវឌ្ឍលំនៅដ្ឋានបែបលំហែរកាយប្រភេទជាទេសចរណ៍ ប៉ុន្តែយើងនៅមិនទាន់ចាប់ផ្តើមសកម្មភាពសាងសង់នៅឡើយទេ”។ លោកឧកញ៉ាបន្តទៀតថា “នៅក្នុងតំណាក់នេះ ក្រុមហ៊ុន និងអ្នកជំនាញ កំពុងតែចុះធ្វើការសិក្សាលម្អិតទៅលើស្ថានភាពទូទៅក្នុងតំបន់នៃគម្រោង និងលទ្ធភាពក្នុងការចាប់ផ្តើម”។
;លោកឧកញ៉ាតេង រិទ្ឋីបានបន្តទៀតថា ទឹកដីខេត្តកំពតមានសក្ដានុពល និងភាពទាក់ទាញលើវិស័យទេសចរណ៍ មិនចាញ់ក្រុងព្រះសីហនុនោះទេ។ ពេលនេះក៏មានជនបរទេស(អឺរ៉ុប) និងជនជាតិខ្មែរមួយចំនួនដែលបានចាកចេញពីក្រុងព្រះសីហនុ ចូលមកកាន់ខេត្តនេះដែរ ខណៈដែលការអភិវឌ្ឍហេដ្ឋារចនាសម្ព័ន្ធនានា ក៏ចាប់ផ្តើមមានសកម្មភាព”។
នៅពេលបច្ចុប្បន្ននេះ សកម្មភាពនៃការអភិវឌ្ឍកំពង់ផែទឹកជ្រៅ ដែលអនុគ្រោះដល់វិស័យដឹកជញ្ជូន រួមជាមួយនឹងការកសាងកំពង់ផែទេសចរណ៍ ដែលអាចស្វាគមន៍ភ្ញៀវងទេសចររហូតដល់ប្រមាណ១លាននាក់នោះ កំពុងតែមានសកម្មភាពយ៉ាងសកម្ម ខណៈគម្រោងអភិវឌ្ឍតំបន់ឆ្នេរខ្សាច់ថ្មី ដែលជាទីតាំងទេសចរណ៍កែច្នៃ និងមជ្ឈមណ្ឌលពាណិជ្ជ ក្រោមទុនវិនិយោគសរុបរហូតប្រមាណ ២០០០លានដុល្លារ របស់ក្រុមហ៊ុន IGB ស្ថិតនៅភូមិកែបថ្មី ឃុំបឹងទូក ស្រុកទឹកឈូ ក៏កំពុងចាប់ផ្តើម។
អនុប្រធានសមាគមអ្នកជំនាញអចលនទ្រព្យកម្ពុជា លោក ចក់ ស៊ីណាតបានមានប្រសាសន៍តាមទូរស័ព្ទនៅព្រឹកថ្ងៃដដែលនេះថា ស្របពេលដែលសកម្មភាពនៃការអភិវឌ្ឍគម្រោងធំៗបានចាប់ផ្តើម បានធ្វើឱ្យតម្លៃដី និងវិស័យអចលនទ្រព្យនៅក្នុងខេត្តមួយនេះមានការកើនឡើង។ លោកបានបន្តទៀតថា បច្ចុប្បន្ននេះតម្លៃដីនៅទូទាំងខេត្តគឺមានការកើនឡើង ប៉ុន្តែមានភាពមិនស្មើគ្នានោះទេ។ តម្លៃដីនៅកណ្តាលខេត្ត ជាទូទៅមានការកើនឡើងចន្លោះ៣០ ទៅ៥០ភាគរយតែប៉ុណ្ណោះបើប្រៀបធៀបទៅនឹងឆ្នាំកន្លងទៅ។
លោកបន្តទៀតថា “តម្លៃដីដែលហក់ឡើងខ្ពស់ស្ទើរតែ១០០ភាគរយ ឬលើសពីនេះ គឺនៅតាមតំបន់ជាយក្រុង ជាពិសេសនៅជិតតំបន់ឆ្នេរ តំបន់មាត់ព្រែកឬជួរភ្នំ ព្រោះតំបន់ទាំងអស់នេះ មានតម្រូវការខ្ពស់ទៅលើគម្រោងអភិវឌ្ឍន៍ តំបន់កម្សាន្តលំហែរកាយបែបធម្មជាតិ”។ លោកបន្តទៀតថា “នៅតាមតំបន់ទាំងនេះ កាលពីឆ្នាំកន្លងទៅមានតម្លៃត្រឹម៦០ដុល្លារក្នុងមួយម៉ែត្រ ប៉ុន្តែពេលនេះបានឡើងដល់ ១០០ដុល្លារ ឬលើសពីនេះក៏មានដែរ”។
លោកស៊ីណាតបានបញ្ជាក់ទៀតថា តម្លៃទាំងនេះ នៅមិនទាន់ដល់ចំណុចខ្ពស់នៅឡើយនៅទេ ដែលវាជាឱកាសសម្រាប់អ្នកដែលចង់វិនិយោគបន្តទទួលយកចំណេញនៅថ្ងៃអនាគត។
អភិបាលនៃគណៈអភិបាលខេត្តកំពត លោក ជាវ តាយ ធ្លាប់បានមានប្រសាសន៍ ឱ្យដឹងកាលពីពេលកន្លងទៅនេះថា បច្ចុប្បន្ននេះមានក្រុមហ៊ុន ចិន កូរ៉េ តៃវ៉ាន់ ជប៉ុន និង ក្រុមហ៊ុនបរទេសជាច្រើនទៀត បានចូលមកស្វែងរកឱកាសវិនិយោគនៅក្នុងខេត្តកំពត ប៉ុន្តែគម្រោងណាមួយជាក់លាក់ មិនទាន់បានចាប់ផ្តើមនៅឡើយទេ។ លោកបន្តថា ពួកគេកំពុងសិក្សា ស្វែងយល់ពីសក្តានុពលរបស់ខេត្ត ដែលកំពុងមានភាពទាក់ទាញអ្នកវិនិយោគជាតិ – អន្តរជាតិ។
លោកបន្តថា “ខ្ញុំគិតថានៅចុងឆ្នាំនេះ ឬដើមឆ្នាំ២០២០ខាងមុខ វិស័យសំណង់ និងអចលនទ្រព្យ នឹងរីកចម្រើនខ្លាំងនៅក្នុងខេត្តនេះ ដោយសារខេត្តកំពតមានសក្តានុពលជាច្រើន”។ លោកបន្ថែមថា “ខេត្តកំពត មានសក្តានុពលជាច្រើន ដោយមានកំពង់ផែទឹកជ្រៅ មានតំបន់សេដ្ឋកិច្ចពិសេស ធនធានធម្មជាតិ និងរមណីយដ្ឋានធម្មជាតិជាច្រើនសម្រាប់បម្រើវិស័យទេសចរណ៍”៕
