ដោយ ៖ រ៉ាណេត
ភ្នំពេញ ៖ ក្រុមហ៊ុនអភិវឌ្ឍអចលនទ្រព្យលំដាប់ទី១០ របស់ចិន Agile Property Development Project នឹងផ្តើមបុកគ្រឹះសាងសង់អគារខុនដូដ៏ធំមួយមានកម្ពស់ ៤៤ជាន់នៅចំកណ្តាលតំបន់បឹងកេងកងនៅត្រឹមខែសីហា ឆ្នាំ២០១៩ខាងមុខនេះ ។
ក្រុមហ៊ុនយក្សចិនសហការជាមួយក្រុមហ៊ុនក្នុងស្រុកសាងសង់មជ្ឈមណ្ឌលពាណិជ្ជកម្មកប់ពពកណ្តាលក្រុងភ្នំពេញ
នៅត្រឹមខែសីហា ឆ្នាំ២០១៩ ខាងមុខនេះ ក្រុមហ៊ុន Agile Property Development Project ដែលជាក្រុមហ៊ុនអភិវឌ្ឍវិស័យអចលនទ្រព្យដ៏ធំស្ថិតក្នុងលំដាប់ទី១០ នៅប្រទេសចិននោះ នឹងចាប់ដៃគ្នាជាមួយក្រុមហ៊ុនក្នុងស្រុក NiKa Group ផ្ដើមដំណើរការសាងសង់អគារដ៏ទំនើប Agile Sky Residence ដែលមានកម្ពស់ ៤៤ជាន់ ស្ថិតក្នុងសង្កាត់បឹងកេងកង៣ ខណ្ឌបឹងកេងកង រាជធានីភ្នំពេញ។
លោក មាស វាសនា នាយកប្រតិបត្តិក្រុមហ៊ុន NaKi Group បានមានប្រសាសន៍ឱ្យដឹងថា បច្ចុប្បន្ននេះវិស័យអចនទ្រព្យនៅកម្ពុជាមានការរីកចម្រើនយ៉ាងខ្លាំង។ លោកបានបន្តឱ្យដឹងទៀតថា ភាពល្អប្រសើរទាំងអស់នេះបានបង្កលក្ខណៈងាយ ស្រួលក្នុងទាក់ទាញការចាប់អារម្មណ៍ពីសំណាក់ក្រុមហ៊ុនវិនិយោគទាំងក្នុង និងក្រៅស្រុក ដែលមានជំនាញលើវិស័យសាងសង់អគារផ្សេងៗ ដូចជា ខុនដូរ អាផាតមិន កន្លែងកម្សាន្ត និងអគារការិយាល័យជាដើម។
ជាមួយគ្នានេះ លោកក៏បានបង្ហាញនូវជំនឿចិត្តយ៉ាងមុតមាំ ចំពោះកិច្ចសហប្រតិបត្តិការរវាងក្រុមហ៊ុនលោក និងក្រុមហ៊ុន Agile Property Development Project ដែលជាក្រុមហ៊ុនដ៏ធំមួយរបស់ចិន និងជាគម្រោងទី១ របស់ Agile នៅកម្ពុជា។
លោកបានបន្តទៀតថា “អគារខុនដូដ៏ទំនើបមួយនេះ នឹងមានបំពាក់ទៅដោយសម្ភារបរិក្ខារទំនើបៗ និងទីកម្សាន្តនានាជាច្រើន ដើម្បីផ្តល់ជូននូវផាសុកភាពដល់ការរស់នៅបែបទាន់សម័យ រួមជាមួយនឹងសួនច្បារ Sky Garden ចំនួន៤ មានកន្លែងហាត់ប្រាណ ហាងកាហ្វេ មណ្ឌលកម្សាន្តសម្រាប់កុមារ បណ្ណាល័យ រួមជាមួយនឹងផ្សារទំនើបផងដែរ”។
លោកបានបន្តទៀតថា “ខុនដូ នេះមានកម្ពស់ ៤៤ជាន់ ស្មើនឹងប្រមាណ ៩៦៣ យូនីត ដោយត្រូវចំណាយរយៈពេលសាងសង់ចំនួន៣ឆ្នាំ បន្ទាប់ពីចាប់ផ្តើមបុគ្រឹះនៅត្រឹមខែសីហា ឆ្នាំ២០១៩ ខាងមុខនេះ”។
នាយិកាប្រចាំប្រទេសក្រុមហ៊ុនអន្តរជាតិ CBRE Cambodia លោកស្រី អាន សុធិតា បានធ្លាប់បានមានប្រសាសន៍កាលពីពេលកន្លងទៅថ្មីៗនេះថា វិស័យខុនដូនៅកម្ពុជានាពេលបច្ចុប្បន្ននេះនៅតែមានសញ្ញាល្អប្រសើរ ហើយក៏មានការកើនឡើងជាប្រចាំឆ្នាំផងដែរ។
លោកស្រីបានបន្តទៀតថា “សម្រាប់ការកើនឡើងនេះ គឺកើនឡើងទៅតាមប្រភេទរបស់វា តែអ្វីដែលកើនឡើងខ្លាំងជាងគេនោះ គឺប្រភេទខុនដូរកម្រិតធម្យម ដោយសារតែអ្នកអភិវឌ្ឍន៍បានផ្តោតទៅលើអ្នកមានចំណូលមធ្យមវិញ ព្រោះខុនដូកម្រិតនេះ ត្រូវបានទិញ និងវិនិយោគដោយប្រជាពលរដ្ឋខ្មែរ”។
ដោយឡែកពាក់ព័ន្ធទៅនឹងទីផ្សារវិញ លោកស្រីបានបញ្ជាក់ថា “ទីផ្សារលក់ខុនដូនៅក្នុងប្រទេសកម្ពុជា មិនមានអ្វីជាបញ្ហានោះទេ តែអ្វីដែលសំខាន់គឺការដាក់ជួលតែប៉ុណ្ណោះ ដោយសារតម្លៃវាមានតម្លៃខ្ពស់ ហើយការផ្គត់ផ្គង់មានច្រើន”។
ស្រដៀងគ្នានឹងការលើកឡើងខាងលើនេះ នាយិកាក្រុមហ៊ុនអចលនទ្រព្យអន្តរជាតិ Century 21 Cambodia លោកស្រី Grace Rachny Fong បានមានប្រសាសន៍ថា ជម្រើសខុនដូបច្ចុប្បន្ន ៨០ភាគរយ ត្រូវបានទិញ និងវិនិយោគដោយជនបរទេស ប៉ុន្តែសម្រាប់រយៈពេល ១០ឆ្នាំខាងមុខនេះ ចំនួននេះនឹងបញ្ច្រាសត្រលប់មកវិញ មានន័យថា ប្រជាជនកម្ពុជានឹងសម្រេចចិត្តរស់នៅខុនដូជំនួសវិញ។
ហេតុនេះអ្នកវិនិយោគធំៗ ពួកគេបានមើលឃើញពីនិន្នាការប្រែប្រួលនៅចំពោះមុខ ខណៈតម្លៃដីធ្លីមានភាពសមរម្យនាពេលបច្ចុប្បន្ន ដែលវាជាពេលវេលាសមស្របសម្រាប់ពួកគេចូលមកអភិវឌ្ឍន៍។ អ្នកនាងបន្តថា “បើពួកគេយឺតជាងនេះ ពួកគេនឹងយឺតពេល ព្រោះតម្លៃដីធ្លីកើនខ្ពស់ ហើយទីផ្សារកាន់តែមានភាពប្រកួតប្រជែងខ្លាំង” ៕
[…] ប្រភព៖ Property Area […]