ដោយ វុត្ថា
ភ្នំពេញ៖ អគារភ្លោះពាណិជ្ជកម្ម Royal One កំពស់ ៦៨ជាន់ ហាក់គ្មានសកម្មភាពសាងសង់ ខណៈអគារនេះ ត្រូវបានបុកគ្រឹះសាងសង់កាលពីដើមឆ្នាំ ២០១៩ កន្លងមកនេះ ។
អគារភ្លោះពាណិជ្ជកម្ម Royal One កំពស់ ៦៨ជាន់ ហាក់គ្មានសកម្មភាពសាងសង់
អគាររបស់ក្រុមហ៊ុន Royal Group នេះ កំពុងហុំព័ទ្ធដោយរបងដែលបង្ហាញពីទ្រង់ទ្រាយនៃអាគារ និងចាក់សោបិតជិត ព្រមទាំងគ្មានគ្រឿងចក្រសំណង់សាងសង់ផ្សេងៗនៅក្នុងនៃអគារ។
អ្នកឧកញ៉ា គិត ម៉េង ប្រធានក្រុមប្រឹក្សាភិបាលនៃក្រុមហ៊ុន Royal Group និងជាប្រធានសភាពាណិជ្ជកម្មកម្ពុជា បានសហការរួមគ្នាជាមួយវិនិយោគិនចិន បោះទុនទឹកប្រាក់ចំនួន ២៣០លានដុល្លារ សាងសង់អគារភ្លោះពាណិជ្ជកម្មកំពស់ ៦៨ជាន់ និងបានប្រកាសបុកគ្រឹះសាងសង់ជាផ្លូវការនៅថ្ងៃទី១៤ ខែកុម្ភៈ ឆ្នាំ២០១៩កន្លងទៅនេះ។
អគារភ្លោះពាណិជ្ជកម្មកំពស់ ៦៨ជាន់ មានឈ្មោះថា Royal One ដែលមានទីតាំងស្ថិតនៅលើមហាវិថីសហព័ន្ធរុស្ស៊ី និងមហាវិថីមន្នីវង្ស ព្រមទាំងស្ថិតនៅក្នុងតំបន់ពាណិជ្ជកម្ម និងប្រជុំដោយអគារខ្ពស់ៗដូចជា អគារកាណាឌីយ៉ា, អគារវឌ្ឍនៈថៅវើរ រួមទាំងអគារ Exchange Square ជាដើម។
នៅក្នុងអគារភ្លោះពាណិជ្ជកម្ម Royal One នេះ មានដូចជា ខុនដូ, ផ្សារទំនើប, សណ្ឋាគារ,ក្លឹបកំសាន្ត, ក្លឹបហាត់ប្រាណ, ភោជនីយដ្ឋាន និងមជ្ឍមណ្ឌលកំសាន្តផ្សេងៗជាដើម។ លោកឧកញ៉ា គិត ធាង ជាប្រធានក្រុមហ៊ុន Royal One និងជាអនុប្រធានសម្ព័ន្ធ Royal Group។
អគារភ្លោះពាណិជ្ជកម្ម Royal One កំពស់ ៦៨ជាន់ ក្នុងនោះ ៦ជាន់ក្រោមដី និង ៦២ជាន់លើអាកាសស្មើនឹង ២៣០ ម៉ែត្រ សាងសង់លើផ្ទៃដីទំហំ ៤,០៣៦ម៉ែត្រការ៉េ និងប្រើប្រាស់រយៈពេលសាងសងចំនួន៥ឆ្នាំ។ក្រុមហ៊ុន Royal Group ធ្លាប់បានបង្ហាញភាពជឿជាក់ថា វត្តមានអគារភ្លោះដ៏ប្រណិតនេះនឹងចូលរួមចំណែក នៃមោទនភាពជាតិរបស់កម្ពុជា ដែលបង្ហាញឲ្យឃើញពីសមត្ថភាព និងភាពរីកចម្រើនរបស់មាតុប្រទេស និងផ្សព្វផ្សាយលើឆាកអន្ដរជាតិ៕
[…] ប្រភព៖ Property Area […]