ដោយ Donald Lee
ភ្នំពេញ៖ ការនាំចេញសុទ្ធរបស់វៀតណាមបានធ្លាក់ចុះចាប់តាំងពីមានការកើនឡើងនៃសង្គ្រាមពាណិជ្ជកម្មរវាងអាមេរិក និងចិននៅឆ្នាំនេះ។ នេះបើយោងតាមរបាយការណ៍វិភាគរបស់ធនាគារអាមេរិក Merrill Lynch បានចេញផ្សាយនៅសប្តាហ៍នេះ។
យោងតាមការិយាល័យស្ថិតិវៀតណាម ក្នុងរយៈពេល ៤ខែដំបូងនៃឆ្នាំ ២០១៩ ការនាំចេញរបស់វៀតណាម មានតម្លៃ ២០,៤ពាន់លានដុល្លារ ខណៈដែលការនាំចូលមានចំនួន ២១ពាន់លានដុល្លារ ដែលបង្កើតឲ្យមានឱនភាពពាណិជ្ជកម្មចំនួន ៦០០លានដុល្លារសម្រាប់រយៈពេលនេះ។
-->
ផ្ទុយទៅវិញ សេដ្ឋកិច្ចវៀតណាមមានអតិរេកពាណិជ្ជកម្មចំនួន ១,៤ពាន់លានដុល្លារកាលពីពេលថ្មីៗនេះ។របាយការណ៍ស្ថិតិវៀតណាមនេះ បានឲ្យដឹងថា ការនាំចេញសុទ្ធរបស់វៀតណាមបានធ្លាក់ចុះ ចាប់តាំងពីសង្គ្រាមពាណិជ្ជកម្មអាមេរិក និងចិនបានកើតឡើង។ របាយការណ៍បានឲ្យដឹងទៀតថា “ប៉ុន្តែការនាំចេញវៀតណាមទៅកាន់អាមេរិកបានកើនឡើង”។
ឱនភាពពាណិជ្ជកម្មរបស់វៀតណាមគឺដោយសារតែការនាំចូលរបស់ខ្លួនកើនឡើងពីប្រទេសចិនដែលជាផ្នែកមួយនៃដំណើរការខ្សែសង្វាក់ផលិតកម្មផ្គត់ផ្គង់ និងតាមរយៈការកើនឡើងនៃចំនួនក្រុមហ៊ុនដែលកាត់បន្ថយពន្ធគយរបស់សហរដ្ឋអាមេរិកដោយការនាំចេញទំនិញរបស់ចិនតាមរយៈប្រទេសវៀតណាម។
របាយការណ៍ បានបង្ហាញថា “វៀតណាមត្រូវនាំចូលបរិមាណវត្ថុធាតុដើមជាច្រើនពីប្រទេសចិន ព្រោះមិនអាចបង្កើតខ្សែសង្វាក់ផ្គត់ផ្គង់សរុបបានក្នុងរយៈពេល ៦ ខែ ហើយអ្វីដែលវៀតណាមអាចធ្វើសម្រាប់ពេលនេះគឺការប្រមូលផ្តុំគឿងបង្គុំចុងក្រោយ”។
រដ្ឋាភិបាលអាមេរិក បានអះអាងថា វៀតណាមបានគេចវេសកាតព្វកិច្ចបង់ពន្ធដែកថែបពីសហរដ្ឋអាមេរិកដោយវៀតណាមនាំចូលដែកថែបពីកូរ៉េខាងត្បូង និងតៃវ៉ាន់ធ្វើការកែច្នៃជាផលិតផលវៀតណាម មុនពេលនាំចេញទៅអាមេរិក ។ ទំនិញនាំចូលរបស់ចិនដែលត្រូវបានយកឆ្លងកាត់ប្រទេសទីបីក្នុងការនាំចេញទៅអាមេរិកដើម្បីគេចវេសពន្ធ៕
