ដោយៈ រ៉ាណេត
ភ្នំពេញៈ បើទោះជាគម្រោង នៃការសាងសង់ស្ពានភ្ជាប់និស្ស័យរវាងរាជធានីភ្នំពេញនិងតំបន់អរិយក្សត្រ នៅមិនទាន់បានលេចចេញជារូបរាងយ៉ាងណាក៏ដោយ ប៉ុន្តែចរន្តនៃសកម្មភាពទិញលក់អចលនទ្រព្យ និងវិស័យដីធ្លីនៅតែបន្តមានយ៉ាងផុសផុល ខណៈដែលតម្លៃដីបានបន្តឡើងថ្លៃជាងកាលពីឆ្នាំកន្លងទៅនោះទៀត។
នៅត្រើយម្ខាងនៃទន្លេមេគង្គទល់មុខរាជធានីភ្នំពេញ ស្ថិតក្នុងតំបន់អរិយក្សត្រ និងតំបន់ស្វាយជ្រុំ ស្ថានភាពនៃវិស័យដីធ្លី ក៏ដូចជាវិស័យអចលនទ្រព្យ នៅតែបន្តមានហាងឆេងខ្ពស់ ខណៈដែលបណ្តាអ្នកវិនិយោគក្នុងវិស័យមួយនេះ នៅតែមានសកម្មភាពទិញ-លក់ ជាធម្មតា ហើយក្រុមហ៊ុនអភិវឌ្ឍវិស័យលំនៅដ្ឋានមួយចំនួន ក៏កំពុងសម្រុកការសាងសង់របស់ខ្លួនដើម្បីឆ្លើយតបទៅនឹងតម្រូវការរបស់អតិថិជន។
-->
នាយិកាក្រុមហ៊ុន AMATAK Property Service លោកស្រីតាំង ហួរ ជាអ្នកជំនាញក្នុងវិស័យអចលនទ្រព្យលើការទិញ-លក់-ជួល បានមានប្រសាសន៍្យដឹងនាព្រឹកថ្ងៃទី៨ កក្កដានេះថា ទាំងពេលបច្ចុប្បន្ននេះ ក៏ដូចជាថ្ងៃខាងមុខ តំបន់ខាងលើនេះនៅតែបន្តមានប្រជាប្រិយភាព ហើយតម្លៃនៅតែបន្តកើនឡើង។ លោកស្រីបន្តទៀតថា តំបន់ទាំង២ខាងលើនេះ នៅមិនឆ្ងាយពីរាជធានីភ្នំពេញនោះទេ ពោលគឺគ្រាន់តែនៅត្រើយម្ខាងដែលខណ្ឌចែកដោយទន្លេតែប៉ុណ្ណោះ។
លោកស្រីបន្តទៀតថា “បើទោះជាមិនទាន់មានស្ពាន ក៏តម្លៃដីធ្លីនៅទីនេះមានកំនើនដែរ ដោយសារតែវាមានភាពល្អប្រសើរដល់ការរស់នៅ”។ លោកស្រីបន្តទៀតថា “ដោយសារតែមើលឃើញពីភាពអំណោយផលទាំងអស់នេះ អ្នកវិនិយោគជាច្រើនបានសម្រុកទិញដីទុកលក់ចំណេញក្នុងរយៈពេលយូរ ហើយអ្នកខ្លះទៀតបានទិញដី ហើយអភិវឌ្ឍជាលំនៅដ្ឋានកម្រិតមធ្យម និងក្រោមមធ្យម”។
លោកស្រីតាំង ហួរបានបន្តទៀតថា អ្នកវិនិយោគបានសម្រុកទិញពេលនេះ ព្រោះតម្លៃនៅមិនទាន់ខ្ពស់ខ្លាំងនៅឡើយ ប៉ុន្តែបើចាំក្រោយគម្រោងស្ពានចាប់ផ្តើមដំណើរការ វាអាចនឹងហួសពេល ដោយសារតែតម្លៃនឹងឡើងថ្លៃខ្លាំង ពិបាកក្នុងការទិញដើម្បីអភិវឌ្ឍន៍។
ទោះជាយ៉ាងណាអគ្គនាយកក្រុមហ៊ុនអចលនទ្រព្យCentury 21 Fortuna Investment លោក វ៉ា វីរៈ បានមានប្រសាសន៍ថា បើមើលតាមភាពជាក់ស្ដែងនាពេលបច្ចុប្បន្ននេះ នៅតំបន់អារិយក្សត្រ និងតំបន់ស្វាយជ្រុំ ហាក់មិនមានសកម្មភាពពុះខ្លាំងដូចកាលពីប្រមាណ២ឆ្នាំមុន នៅពេលធ្លាយព័ត៌មានមានគម្រោងសាងសង់ស្ពាននោះទេ។ លោកបន្តទៀតថា ជាធម្មតានៅពេលដែលមានគំរោងអភិវឌ្ឍន៍ លើវិស័យហេដ្ឋារចនាសម្ព័ន្ធនៅតំបន់ ទីនោះតែងមានភាពពុះកញ្ច្រោល។
លោកបន្តថា “ពេលនេះបើទោះជាគម្រោងសាងសង់ស្ពាន ហាក់មានភាពស្ងប់ស្ងាត់ ប៉ុន្តែការទិញ-ការទិញលក់នៅតែបន្ត គ្រាន់តែតម្លៃមិនថ្លៃខ្លាំងនោះទេ”។ លោកបន្តទៀតថា “បច្ចុប្បន្ននេះ តម្លៃដីគឺមិនមានភាពស្មើគ្នានោះទេ ដែលវាអាស្រ័យទៅតាមទីកន្លែង ស្ថានភាពដី និងទំហំ”។
លោកវ៉ា វីរៈបានបញ្ជាក់្យដឹងផងដែរថា ដីដែលស្ថិតនៅតាមតំបន់ក្បែរមាត់ទន្លេ ឬផ្លូវធំ អាចមានតម្លៃចន្លោះចាប់ពី ២០០-២៥០ -៣០០ដុល្លារក្នុងមួយម៉ែត្រការ៉េ”។ចំណែកដីដែលស្ថិតនៅផ្លូវតូច អាចមានតម្លៃចន្លោះពី ៤០-៥៥ ដុល្លារក្នុងមួយម៉ែត្រការ៉េ ដែលវាអាស្រ័យទៅតាមទំហំ និងស្ថានភាពដី ហើយដីលិចទឹក ឬដីបឹង មានតម្លៃប្រមាណជាង១០ដុល្លារក្នុងមួយម៉ែត្រការ៉េ។
អនុប្រធានក្រុមប្រឹក្សាភិបាលសមាគមអ្នកជំនាញអចលនទ្រព្យកម្ពុជា លោកយិន លាងគង់បានមានប្រសាសន៍ថា កត្តាហេដ្ឋារចនាសម្ព័ន្ឋមានសារៈសំខាន់ណាស់ ក្នុងការជំរុញការអភិវឌ្ឍន៍នៅតាមតំបន់ណាមួយ ហើយតំបន់អរិយក្សត្រទោះជាមិនទាន់សាងសង់ស្ពាន ប៉ុន្តែវាមិនមែនជាឧបសគ្គឬធ្វើឲ្យរាំងស្ទះដល់ចរន្តនៃការអភិវឌ្ឍទេ ដោយសារតំបន់់នេះមានទីតាំងភូមិសាស្រ្តកៀកនឹងរាជធានីភ្នំពេញ មានលក្ខខ័ណ្ឌអាកាសធាតុល្អប្រសើរ និងមានប្រជាជនរស់នៅនិងធ្វើដំណើរឆ្លងកាត់ច្រើន។
លោកបន្តថា “អ្នកអភិវឌ្ឍន៍សាងសង់បុរីនៅតាមតំបន់នេះ ពួកគេបានចាប់ឳកាសបានយ៉ាងល្អ ដោយសារតម្លៃដីធ្លីនៅតំបន់នេះមានតម្លៃទាបកាលពី៣ទៅ៥ឆ្នាំមុន ប៉ុន្តែបច្ចុប្បន្នតម្លៃដីបានកើនឡើងខ្ពស់រួចទៅហើយ”។ លោកបន្តថា “ការសាងសង់ស្ពានភ្ជាប់ទៅតំបន់នេះនឹងធ្វើឡើងនៅពេលខាងមុខ គ្រាន់តែពេលវេលានិងភាពចាំបាច់នៃការចាប់ផ្តើមមិនទាន់មកដល់”៕
[…] ប្រភព៖ Property Area […]