ដោយគង់ សូរិយា
ភ្នំពេញៈ ទេសរដ្ឋមន្រ្តី រដ្ឋមន្រ្តីក្រសួងសាធារណៈការ និងដឹកជញ្ជូនលោកស៊ុន ចាន់ថុល បានបង្ហើបពីគម្រោងសាងសង់ផ្លូវល្បឿនលឿនភ្នំពេញ បាវិតជាថ្មី ដែលគំរោងនេះនឹងសាងសង់នាពេលខាងមុខ។
រដ្ឋមន្ត្រីសាធារណៈការបង្ហើបពីគម្រោងសាងសង់ផ្លូវល្បឿនលឿនភ្នំពេញ បាវិតជាថ្មី
លោកបានមានប្រសាសន៍ក្នុងជំនួបជាមួយប្រតិភូធុរកិច្ចអាមេរិក អាស៊ានកាលពីថ្ងៃទី៨ កក្កដាកន្លងមកថា រដ្ឋាភិបាលកម្ពុជាមានគំរោងសាងសង់ផ្លូវល្បឿនលឿនភ្នំពេញ ទៅកាន់ក្រុងបាវិត ខេត្តស្វាយរៀង នាពេលខាងមុខ ហើយនិងគំរោងសាងសង់ផ្លូវរថភ្លើងអាកាស និងផ្លូវរថភ្លើងក្រោមដីនៅរាជធានីភ្នំពេញផងដែរ។
ទោះជាយ៉ាងណាលោកស៊ុន ចាន់ថុលមិនបញ្ជាក់ពីពេលវេលានៃការសាងសង់ផ្លូវល្បឿនលឿនភ្នំពេញ បាវិតនាពេលណានៅឡើយទេ។
ផ្លូវល្បឿនលឿនភ្នំពេញ បាវិត ជាផ្លូវដ៏សំខាន់មួយដែលតភ្ជាប់ជាមួយនឹងគោលនយោបាយខ្សែក្រវ៉ាត់១ ផ្លូវ១របស់ប្រទេសចិន និងជាផ្លូវតភ្ជាប់តំបន់អាស៊ាន តាមរយៈការតភ្ជាប់ពីប្រទេសថៃ មកកម្ពុជាតាមផ្លូវជាតិលេខ៥ ដែលបាននិងកំពុងពង្រីកដោយហិរញ្ញប្បទានរបស់រដ្ឋាភិបាលជប៉ុន។ផ្លូវនេះនឹងតភ្ជាប់ជាមួយផ្លូវជាតិលេខ១ តាមរយៈផ្លូវល្បឿនលឿន ដែលនឹងសាងសង់នាពេលខាងមុខ។
ក្នុងជំនួបជាមួយសម្តេចតេជោហ៊ុន សែននាយករដ្ឋមន្រ្តីកម្ពុជា កំឡុងពេលសម្តេចទស្សនកិច្ចនៅប្រទេសចិនកាលពីពេលថ្មីៗនេះ ប្រធានក្រុមហ៊ុនស្ពានថ្នល់របស់ចិន បានលើកឡើងពីគំរោងសាងសង់ផ្លូវល្បឿនលឿនភ្នំពេញ បាវិតផងដែរ។
សម្តេចតេជោហ៊ុន សែននាយករដ្ឋមន្រ្តីកម្ពុជាធ្លាប់បានលើកឡើងពីគម្រោងសាងសង់ផ្លូវល្បឿនលឿនភ្នំពេញ បាវិតក្នុងកំឡុងពេលសម្តេចអញ្ជើញបើកការដ្ឋានសាងសង់ផ្លូវល្បឿនលឿនភ្នំពេញ ក្រុងព្រះសីហនុកាលពីថ្ងៃទី២២ មិនា ឆ្នាំ ២០១៩ កន្លងមកនេះ និងបង្ហើបពីគម្រោងសាងសង់ផ្លូវល្បឿនលឿនភ្នំពេញ ទៅកាន់ព្រំដែនឡាវនាពេលអនាគតផងដែរ។
ផ្លូវល្បឿនលឿនភ្នំពេញ បាវិត ត្រូវបានសិក្សាដោយអ្នកជំនាញរបស់ទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន(JICA) ដែលបានសិក្សាបញ្ចប់លើគំរោងផ្លូវប្រវែង១៦០គីឡូម៉ែត្រ ដោយចាកចេញពីរាជធានីភ្នំពេញ ឆ្លងកាត់ខេត្តកណ្តាល ព្រៃវែង និងឆ្ពោះទៅកាន់ព្រំដែនបាវិត ក្នុងខេត្តស្វាយរៀង។ គំរោងនេះគ្រោងចំណាយទឹកប្រាក់រហូតដល់៣៨០០លានដុល្លារអាមេរិក៕
