ដោយ Donald Lee
បាងកក៖ ក្រុមហ៊ុន CBRE ថៃបានព្យាករណ៍ថា ការិយាល័យជួលនៅបាងកកនឹងមានកើនឡើងដល់១០លានម៉ែត្រការ៉េនៅត្រឹមឆ្នាំ ២០២២ ខណៈក្រុមហ៊ុនពីហុងកុងជាច្រើន កំពុងផ្លាស់ប្តូរទីតាំងទៅកាន់រាជធានីថៃនេះ ដើម្បីដាក់ជាមូលដ្ឋានប្រតិបត្តិការនៅតំបន់អាស៊ីអាគ្នេយ៍។
បច្ចុប្បន្ននេះ ការិយាល័យជួលនៅទីក្រុងបាងកក មានទំហំ ៨,៩៥លានម៉ែត្រការ៉េនៅក្នុងទីក្រុងបាងកកដែលមានចំនួនជាង៨លាននាក់។
លោក Roongrat Veeraparkkaroon ទីប្រឹក្សារបស់ CBRE បាននិយាយថា ការផ្គត់ផ្គង់ថ្មី ដែលទើបនឹងសាងសង់ទាំងគម្រោងសាងសង់ និងអគារការិយាល័យដែលមានទំហំជាង២លានម៉ែត្រការ៉េ ដែលនឹងវត្តមានក្នុងទីផ្សារនៅឆ្នាំ២០២២ នឹងមានការប្រកួតប្រជែងយ៉ាងខ្លាំងដល់ទីផ្សារនេះ។
គម្រោងអភិវឌ្ឍន៍ការិយាល័យថ្មីភាគច្រើន នឹងមានបំពាក់នូវគ្រឿងបរិក្ខារថ្មីដែលមានភាពល្អប្រសើរ ខណៈការប្រកួតប្រជែងកើនឡើង ដោយសារតែក្រុមហ៊ុនថ្មីរបស់ហុងកុងបានត្រៀមខ្លួនរួចរាល់ក្នុងការវិនិយោគការិយាល័យជួលលំដាប់ A។
ការិយាល័យជួលនៅហុងកុង មានតម្លៃថ្លៃជាងគេបំផុតនៅលើពិភពលោក ហើយបច្ចុប្បន្នក្រុមហ៊ុនកំពុងស្វែងរកការិយាល័យជួល នៅក្រុងបាងកកជាមួយតម្លៃទាប ទីតាំងកណ្តាល និងការសាងសង់មានគុណភាពល្អប្រសើរ។
លើសពីនេះទៅទៀត ភាពចលាចលផ្នែកនយោបាយ នៅក្នុងទីក្រុងហុងកុងដែលជាទីក្រុង ដែលបានទស្សនាច្រើនជាងគេនៅលើពិភពលោក បានបិទអាជីវកម្មនៅក្នុងទីក្រុងនេះ ដែលធ្វើឲ្យអាជីវកម្មទាំងនោះ ទទួលរងការបាត់បង់ប្រាក់រាប់លានដុល្លារ។ កាលពីសប្តាហ៍មុនប៉ូលីស បានបាញ់កាំភ្លើងឧស្ម័នបង្ហូរទឹកភ្នែកទៅកាន់ក្រុមអ្នកតវ៉ា នៅពេលដែលមនុស្សជិតកន្លះ លាននាក់បានចូលរួមបាតុកម្មនៅតាមផ្លូវហុងកុង។
ក្រុងបាងកកដែលជាទីក្រុង ដែលបានទស្សនាច្រើនជាងគេបំផុតទីពីរ របស់ពិភពលោក បានទទួលការកែលំអជាចាំបាច់ ក្នុងវិស័យអចលនទ្រព្យកាលពីប៉ុន្មានខែមុន។ ការកែលម្អហេដ្ឋារចនាសម្ព័ន្ធ និងការធ្វើចរាចរសាធារណៈ បានបង្កើនតម្លៃដីធ្លីនៅទូទាំងទីក្រុងនេះ។
ការអភិវឌ្ឍដ៏អស្ចារ្យនេះបានកើតឡើងកាលពីខែមុន នៅពេលដែលរដ្ឋាភិបាលថៃបានប្រកាសគម្រោងបណ្តាញផ្លូវដែកល្បឿនលឿនដ៏ធំមួយ ដែលនឹងភ្ជាប់ប្រទេសទៅប្រទេសចិន សិង្ហបុរី ម៉ាឡេស៊ី កម្ពុជា និងឡាវ។
សមាសភាគសំខាន់មួយនៃទុនវិនិយោគ លើហេដ្ឋារចនាសម្ព័ន្ធចំនួន ៦៧ពាន់លានដុល្លារ នឹងត្រូវបានបង្កើតឡើងជាមជ្ឈមណ្ឌលរថភ្លើងល្បឿនលឿន នឹងក្លាយជាតំបន់ធំបំផុតនៅអាស៊ីអាគ្នេយ៍ ដែលធ្វើឲ្យទីក្រុងបាងកកជាមជ្ឈមណ្ឌលកណ្តាលនៃតំបន់មេគង្គ។ តម្លៃដីធ្លីត្រូវបានគេរំពឹងថា នឹងកើនឡើងខ្ពស់នៅជុំវិញតំបន់ Bang Sue នៃទីក្រុងបាងកកបន្ទាប់ពីការដំឡើងស្ថានីយកណ្តាល៕
