ដោយ ម៉ាណេត
ភ្នំពេញ៖ ការផ្គត់ផ្គង់អាផាតម៉ិនជួលមានការកើនឡើង ដោយមានគម្រោងអាផាតមិនជួលចំនួនពីរ ដែលបានបញ្ចប់ការសាងសង់នៅក្នុងត្រីមាសទី២ ឆ្នាំ២០១៩នេះ ពោលគឺគិតចាប់តាំងឆ្នាំ ២០១៨។ នេះបើយោងតាមរបាយការណ៍ចុងក្រោយដែលចេញផ្សាយដោយក្រុមហ៊ុន CBRE Cambodia។
គម្រោងអាផាតម៉ិនជួលចំនួនពីរ ដែលបានបញ្ចប់ការសាងសង់រួមមានគម្រោង Alpha Residence និងគម្រោង The View ដែលមានទីតាំងនៅចំកណ្តាលក្រុងភ្នំពេញ ហើយបង្កើនការចូលរួម ដល់ការផ្គត់ផ្គង់អាផាតម៉ិន ជួលលំដាប់B ចំនួន ៣៤,១ភាគរយ និងបង្កើនចំនួនផ្គត់ផ្គង់អាផាតម៉ិនសរុបចំនួន២,៤៩១យូនីតក្នុងទីផ្សារ។
-->
របាយការណ៍ឲ្យដឹងថា ចំនួនការផ្គត់ផ្គង់អាផាតម៉ិនជួលលំដាប់ A និងBនឹងមានចំនួនសរុប២,៩៩០ យូនីតនៅក្នុងឆ្នាំ ២០១៩ ខណៈការផ្គត់ផ្គង់អាផាតមិនជួលលំដាប់ A សុរបមានចំនួន២៦៦ យូនីតនៅក្នុងឆមាសទី១ក្នុងឆ្នាំនេះ ដែលមានការកើនឡើង២១ ភាគរយ បើធៀបនឹងរយៈពេលដូចគា្នកាលពីឆ្នាំមុន។
របាយការណ៍ខាងលើបានបន្ថែមថា “ការផ្គត់ផ្គង់អាផាតមិនជួលនឹងបន្តកើនឡើងរហូតដល់ឆ្នាំ ២០២០ ដោយមានចួលរួមពីការផ្គត់ផ្គង់អាផាតមិនជួលលំដាប់ A ដែលមានចំនួនសុរប២៦៦យូនីត ពោលគឺមានការកើនឡើង៩ភាគរយ បើធៀបនឹងឆ្នាំ ២០១៩”។
សម្រាប់តម្លៃជួលអាផាតម៉ិនជួលលំដាប់ B ដែលមានបន្ទប់គេងមួយមានតម្លៃចាប់ពី៦០០ ទៅ២,០០០ដុល្លារក្នុងមួយខែ ខណៈអាផាតមិនជួលលំដាប់A ដែលមានលក្ខណៈពិសេសអាចមានចាប់ពី៤០០០ ទៅដល់៩០០០ ដុល្លារក្នុងមួយខែ។
អាផាតម៉ិនជួលលំដាប់ A និង B ភាគច្រើនគឺមានទីតាំងនៅចំកណ្តាលក្រុង។ ចំនួននៃការអភិវឌ្ឍន៍អាផាតម៉ិនជួលភាគច្រើន មានទីតាំងស្ថិតនៅតំបន់បឹងកេងកង១ ដែលមានចំនួន៣៨ភាគរយអាផាតម៉ិនជួលសរុប តំបន់ដូនពេញមាន២៦ភាគរយ និងតំបនទន្លេមាន១៤ភាគរយ៕
