ដោយ ម៉ាណេត
ភ្នំពេញ៖ ក្រុមហ៊ុន NagaCorp ប្រតិបត្តិករកាស៊ីណូដែលចុះបញ្ជីនៅហុងកុងទទួលបានប្រាក់ចំណូលសរុប ៨៧២,៤ លានដុល្លារអាមេរិកក្នុងរយៈពេល ៦ខែដំបូងឆ្នាំនេះ ខណៈប្រាក់ចំណេញសុទ្ធមានប្រមាណ ២៤៥,១លានដុល្លារ កើនឡើង ៣៦,១ភាគរយធៀបនឹងរយៈពេលដូចគ្នាកាលពីឆ្នាំមុន។
ក្រុមហ៊ុន NagaCorp បានឲ្យដឹងក្នុងរបាយការណ៍ហិរញ្ញវត្ថុរបស់ខ្លួនកាលពីម្សិលមិញថា ប្រាក់ចំណេញរបស់ខ្លួនបានកើនឡើងជាបន្តបន្ទាប់ដោយទទួលបានប្រាក់ចំណូលសរុប ៨៧២,៤ លានដុល្លារអាមេរិក កើនឡើង ២២,២ ភាគរយ បើប្រៀបធៀបទៅនឹងឆមាសទីមួយនៃឆ្នាំមុន។
-->
ប្រតិបត្តិការកាស៊ីណូនៅភ្នំពេញបានផ្តល់ប្រាក់ចំណូលជាង ៩៧ភាគរយនៃប្រាក់ចំណេញរបស់ក្រុមហ៊ុនដែលមានចំនួន ៩៨១,៦ លានដុល្លារនៅក្នុងឆមាសដែលដែលមានការចូលរួមដោយផ្នែកសណ្ឋាគារ និងផ្នែកកម្សាន្តផ្សេងៗទៀត។
ក្រុមហ៊ុនបានបញ្ជាក់ពីស្ថិរភាពនយោបាយក្នុងប្រទេសកម្ពុជា បរិយាកាសប្រតិបត្តិការប្រសើរឡើង កំណើនអាជីវកម្មនៅណាហ្គា ២ ទេសចរណ៍ និងការពង្រីកអាជីវកម្មល្បែងវីអាយភីដែលបានផ្តល់លទ្ធផលប្រសើរនៅពាក់កណ្តាលឆ្នាំនេះ។
ក្រុមហ៊ុន NagaCorp មានអាជ្ញាប័ណ្ណផ្តាច់មុខក្នុងការប្រតិបត្តិការកាស៊ីណូនៅភ្នំពេញ និងតំបន់ជុំវិញខ្លួន។ ក្រុមហ៊ុននេះបានចាប់ផ្តើមប្រតិបត្តិការជាមួយអចលនទ្រព្យណាហ្គាវើរដែលបច្ចុប្បន្ននេះត្រូវបានគេស្គាល់ថាជាណាហ្គា ១ ដែលបានបើកដំណើរការកាលពីខែធ្នូឆ្នាំ ២០០៦។
អចលនទ្រព្យឥឡូវនេះភ្ជាប់ទៅណាហ្គា ២ ដែលបានបើកនៅក្នុងខែវិច្ឆិកាឆ្នាំ ២០១៧៕
