ដោយ Donald Lee
ភ្នំពេញ៖ មុនពេលកិច្ចចរចាពាណិជ្ជកម្មអាមេរិក ចិន ដែលនឹងចាប់ផ្តើមឡើងវិញនៅសប្តាហ៍ក្រោយ រដ្ឋាភិបាលចិនបានរិះគន់រដ្ឋាភិបាលអាមេរិកថា ជ្រៀតជ្រែកក្នុងការតវ៉ាប្រឆាំងនឹងការធ្វើបត្យាប័នពីប្រទេសហុងកុង។
កាលពីដើមសប្តាហ៍នេះ រដ្ឋាភិបាលចិនបានអះអាងថា អាមេរិកគឺនៅពីក្រោយការតវ៉ានៅហុងកុង។
រដ្ឋមន្ត្រីការបរទេសចិនលោក Wang Yi បាននិយាយថា “ដៃខ្មៅ” របស់លោកខាងលិច គឺនៅពីក្រោយការតវ៉ាដ៏ធំ ដែលបានកើតឡើងនៅហុងកុងនៅឆ្នាំនេះ។
អ្នកនាំពាក្យក្រសួងការបរទេសចិន លោកស្រី Hua Chunyin បានបន្ថែមលើសពីអ្វីដែលបានលើកឡើងខាងលើ ហើយបានស្តីបន្ទោសអាមេរិក ក្នុងសន្និសីទសារព័ត៌មានមួយនៅក្រុងប៉េកាំងកាលពីថ្ងៃអង្គារ។
លោកស្រីមានប្រសាសន៍ថា “មានសញ្ញានៃកងកម្លាំងបរទេស នៅពីក្រោយបាតុកម្ម”។
លោកស្រី Hua បានបន្ថែមថា “ខ្ញុំឆ្ងល់ថា តើមន្រ្តីអាមេរិកទាំងនេះ អាចឆ្លើយសំនួរពិតប្រាកដដល់ពិភពលោក នូវតួនាទីអាមេរិកដែលបានចូលរួម ក្នុងព្រឹត្តិការណ៍ថ្មីៗនេះនៅហុងកុងបានទេ”។
រដ្ឋាភិបាលចិនបានថ្លែងនៅសប្តាហ៍នេះថា កងទ័ពអាចត្រូវបានបញ្ជូនទៅហុងកុងដើម្បីធ្វើឱ្យមានភាពស្ងប់ស្ងាត់។
អ្នកនាំពាក្យក្រសួងការពារជាតិចិន លោក Wu Qian ប្រាប់ប្រព័ន្ធផ្សព្វផ្សាយនៅហុងកុងថា “អាកប្បកិរិយារបស់បាតុករមួយចំនួនពិតជាមិនអាចទទួលយកបានទេ”។
អ្នកនាំពាក្យក្រោយមកបានសំដៅលើមាត្រាមួយ នៅក្នុងច្បាប់ Garrison របស់ហុងកុងដែលចែងថា កងទ័ពចិនអាចត្រូវបានប្រមូលផ្តុំទៅហុងកុង ដើម្បីរក្សាសណ្តាប់ធ្នាប់សាធារណៈ។
ការរិះគន់នេះបានបង្កើនភាពតានតឹងភ្លាមៗ មុនពេលមន្រ្តីជាន់ខ្ពស់អាមេរិកនឹងជួបជាមួយលោក Liu He អនុប្រធានាធិបតីចិន នៅសៀងហៃនៅសប្តាហ៍ក្រោយ ដើម្បីស្វែងរកព័ត៌មានលម្អិតស្តីពី កិច្ចព្រមព្រៀងពាណិជ្ជកម្មថ្មីមួយ បន្ទាប់ពីការចរចាកាលពីខែ ឧសភាបានបរាជ័យ។
កិច្ចប្រជុំចុងក្រោយរវាងមន្រ្តីអាមេរិក និងចិន កាលពីខែឧសភា នៅក្រុងវ៉ាស៊ីនតោន ហើយបានបញ្ចប់ ដោយលោកប្រធានាធិបតីអាមេរិក Donald Trump ក្នុងការបង្កើនពន្ធលើទំនិញផ្សេងទៀតរបស់ចិន ដែលមានតម្លៃ២០០ពាន់លានដុល្លារ៕
