ដោយ នៅ វឌ្ឍនា
ភ្នំពេញៈ «កម្ពុជាចង់បានការវិនិយោគបន្ថែមពីប្រទេសចិន លើឧស្សាហកម្មកែច្នៃ និងវេចខ្ចប់ផលិតផលកសិកម្ម ដើម្បីធ្វើពិពិធកម្មការនាំចេញទៅកាន់ទីផ្សារអន្តរជាតិ ដោយសារយើងមានកសិផលមិនទាន់កែច្នៃជាច្រើនដូចជា ផ្លែស្វាយខេត្តកំពង់ស្ពឺ ផ្លែមៀនខេត្តប៉ៃលិន និងឈើហូបផ្លែជាច្រើនទៀត» នេះបើតាមការបញ្ជាក់របស់លោកប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជា ទៅកាន់មន្ត្រីទទួលបន្ទុកសេដ្ឋកិច្ច និងពាណិជ្ជកម្ម អមស្ថានទូតចិនប្រចាំនៅកម្ពុជា។
នៅក្នុងជំនួបពិភាក្សាជាមួយគណៈប្រតិភូចិន ដឹកនាំដោយលោកលី អាន (Li An) ទីប្រឹក្សាសេដ្ឋកិច្ច និងពាណិជ្ជកម្មចិន (ចប់អាណត្តិ) នៅទីស្តីការក្រសួង កាលពីរសៀលថ្ងៃពុធកន្លងមក លោកប៉ាន សូរស័ក្តិ បានជម្រាបភាគីចិន ពីកិច្ចប្រឹងប្រែងរបស់ក្រសួងពាណិជ្ជកម្ម ក្នុងការជំរុញការនាំចេញកសិផលទៅកាន់ទីផ្សារចិន តាមរយៈការចូលរួមព្រឹត្តិការណ៍ពិព័រនានា និងការបង្ហាញនៅតាមមជ្ឈមណ្ឌលពាណិជ្ជកម្មកម្ពុជា ស្ថិតក្នុងរដ្ឋធានី និងខេត្តចំនួន៥ នៃសាធារណរដ្ឋប្រជាមានិតចិន។
លោកបានស្នើភាគីចិន ជួយសម្របសម្រួលការនាំចេញកសិផលខ្មែរ និងជួយកៀងគរក្រុមហ៊ុនចិន ដែលមានឯកទេសត្រឹមត្រូវ មកលើវិនិយោគនៅក្នុងប្រទេសកម្ពុជាថែមទៀត ដើម្បីពង្រឹងទំនាក់ទំនងពាណិជ្ជកម្ម និងវិនិយោគទ្វេភាគី។ លើសពីនេះ លោករដ្ឋមន្ត្រី ក៏បានសន្យាបន្តសហការជាមួយភាគីចិន ក្នុងវិស័យពាណិជ្ជកម្មអេឡិចត្រូនិក (E-Commerce) ដើម្បីជំរុញការលក់ និងនាំចេញផលិតផលខ្មែរ ទៅកាន់ទីផ្សារក្នុងតំបន់ និងពិភពលោក។
លោកទីប្រឹក្សាទើបចប់អាណត្តិរូបនេះ បានណែនាំលោកវូ កៅក្វាន់ (Wu Guoquan) ដែលត្រូវចូលកាន់តំណែងទីប្រឹក្សាសេដ្ឋកិច្ច និងពាណិជ្ជកម្មថ្មី ដល់រដ្ឋមន្ត្រី និងសហការី ដើម្បីបន្តធ្វើកិច្ចការជាមួយគ្នា លើកិច្ចការអទិភាពផ្សេងៗដែលប្រទេសទាំងពីរបានកំណត់។
នៅក្នុងឱកាសនោះដែរ លោកវូ កៅក្វាន់ បានប្តេជ្ញាជំរុញកិច្ចសហប្រតិបតិ្តការពាណិជ្ជកម្មទ្វេភាគី តាមរយៈការជួយគាំទ្រការរៀបចំពិព័រណ៍ ឬវេទិកាជំរុញពាណិជ្ជកម្មទ្វេរភាគី ដើម្បីផ្តល់ឱកាសដល់វិស័យឯកជននៃប្រទេសទាំងពីរ អាចស្វែងយល់សក្តានុពល និងចាប់ដៃគូធុរកិច្ចទៅវិញទៅមក៕
