ដោយ Donald Lee
ក្រុងបាងកកៈ ក្រុមមន្ត្រីកូរ៉េខាងត្បូងសង្ឃឹមថា មន្ត្រីជាន់ខ្ពស់អាស៊ាន និងអាមេរិកអាចជួយធ្វើឲ្យមានភាពស្ងប់ស្ងាត់ នៃជម្លោះពាណិជ្ជកម្មជាមួយប៉ុន នៅក្នុងកិច្ចប្រជុំអាស៊ានប្រចាំឆ្នាំ នៅទីក្រុងបាងកក នៅសប្តាហ៍ក្រោយ។
ប្រទេសកូរ៉េខាងត្បូង និងជប៉ុន បានជាប់ពាក់ព័ន្ធក្នុងជម្លោះពាណិជ្ជកម្ម បន្ទាប់ពីតុលាការកូរ៉េខាងត្បូង បានបញ្ជាឲ្យក្រុមហ៊ុនជប៉ុនបង់ប្រាក់ដល់គ្រួសារ នៃពលករកូរ៉េ ក្នុងអំឡុងពេលស្ថិត នៅក្រោមការគ្រប់គ្រងរបស់់ប្រទេសជប៉ុន ក្នុងចន្លោះឆ្នាំ ១៩១០ និង១៩៤៥។
រដ្ឋាភិបាលជប៉ុនបានប្រតិកម្ម ដោយការហាមប្រាមការនាំចេញទូរស័ព្ទស្មាតហ្វូន និងសម្ភារៈអេក្រង់សំខាន់ៗ ទៅកាន់ប្រទេសកូរ៉េខាងត្បូង ដែលកំពុងរារាំងដល់ចង្វាក់ផ្គត់ផ្គង់នៅក្នុងវិស័យផលិតកម្មដ៏សំខាន់បំផុតរបស់កូរ៉េខាងត្បូង។
មន្ត្រីជាន់ខ្ពស់នៃប្រទេសទាំងពីរនឹងជួបគ្នា នៅឯកិច្ចប្រជុំរដ្ឋមន្រ្តីការបរទេសអាស៊ានលើកទី៥២ (AMM) នៅសប្តាហ៍ក្រោយ។
ក្រុមមន្ត្រីកូរ៉េខាងត្បូងសង្ឃឹមថា មេដឹកនាំមកពីអាស៊ានអាចជួយបញ្ចុះបញ្ចូលជប៉ុន ឲ្យលុបចោលការហាមប្រាមលើសង្វាក់ផ្គត់ផ្គង់សំខាន់ៗ និងទប់ស្កាត់ជម្លោះរវាងប្រទេសទាំងពីរពីការបំផ្លិចបំផ្លាញ និងធ្វើឲ្យខូចដល់សេដ្ឋកិច្ចសកល ដែលកំពុងមានភាពយឺតយ៉ាវ។
លោក Choi Yoon-jung អ្នកស្រាវជ្រាវនៅនាយកដ្ឋានសិក្សា យុទ្ធសាស្ត្រការទូតនៅវិទ្យាស្ថាន Sejong របស់កូរ៉េខាងត្បូង បានប្រាប់សារព័ត៌មាន South China Morning Post ថា “យុទ្ធសាស្រ្តកូរ៉េខាងត្បូង ដែលសង្កត់ធ្ងន់លើសារៈសំខាន់ នៃការធ្វើពាណិជ្ជកម្មសេរីក្នុងការប្រឈមមុខ នឹងការរឹតត្បិតផ្នែកពាណិជ្ជកម្មរបស់ជប៉ុន សមស្របនឹងស្មារតីអាស៊ាន ជាពិសេសនៅពេលដែលសមាគម កំពុងសង្កត់ធ្ងន់លើគោលការណ៍ពាណិជ្ជកម្មសេរីកាន់តែច្រើន ដោយសារតែវាកំពុងរងគ្រោះពីការបន្ត ជម្លោះពាណិជ្ជកម្មរវាងសហរដ្ឋអាមេរិក និងចិន”។
រដ្ឋមន្ត្រីការបរទេសកូរ៉េខាងត្បូងលោកស្រី Kang Kyung-wha បាននិយាយថា លោកស្រី នឹងបញ្ជាក់ពីសារៈសំខាន់នៃពាណិជ្ជកម្មសេរី និងយុត្តិធម៌ទៅកាន់សមភាគីជប៉ុនរបស់លោកស្រី នៅពេលពួកគេជួបគ្នានៅទីក្រុងបាងកក។
ទន្ទឹមនឹងនេះដែរ អាមេរិក ដែលនឹងបញ្ជូនមន្រ្តីជាន់ខ្ពស់ ទៅចូលរួមកិច្ចប្រជុំអាស៊ានសង្ឃឹមថា នឹងដើរតួជាអ្នកសម្របសម្រួល រវាងអ្នកដើរតួសេដ្ឋកិច្ចអាស៊ីទាំងពីរ និងសម្ព័ន្ធមិត្តសំខាន់របស់អាមេរិក។
ប្រធានាធិបតីអាមេរិកលោក Donald Trump បាននិយាយថា លោកនឹងអាចមានលទ្ធភាពធ្វើជាអ្នកសម្រុះសម្រួល ប្រសិនបើមានសំណូមពរ។
មន្ត្រីជាន់ខ្ពស់អាមេរិកម្នាក់ បានប្រាប់អ្នកយកព័ត៌មានថា “ខ្ញុំគិតថា នៅពេលណាដែលយើងមានអាមេរិក កូរ៉េខាងត្បូង និងជប៉ុននៅនឹងកន្លែងនោះ នឹងមានបំណងចង់ជួបជុំគ្នា”៕
