ដោយ Donald Lee
បាងកក៖ ប្រទេសថៃ និងសហគមន៍អឺរ៉ុបនឹងធ្វើការចរចាពាណិជ្ជកម្មសេរីជាថ្មីម្តងទៀត បន្ទាប់ពីបានផ្អាកអស់រយៈពេល ៥ឆ្នាំកន្លងនេះ។ នេះបើយោងតាមនាយកដ្ឋានចរចាពាណិជ្ជកម្មរបស់ប្រទេសថៃ។
សហភាពអឺរ៉ុបគឺជាដៃគូពាណិជ្ជកម្មធំទី៣របស់ប្រទេសថៃ។ ប៉ុន្តែកិច្ចចរចាកិច្ចព្រមព្រៀងពាណិជ្ជកម្មសេរីថ្មី បានជាប់គាំងអស់រយៈពេល៥ឆ្នាំ ចាប់តាំងពីរដ្ឋប្រហារយោធាក្នុងឆ្នាំ២០១៤ សហភាពអឺរ៉ុបបានលុបចោល រាល់ការចរចាកិច្ចព្រមព្រៀងពាណិជ្ជកម្មសេរីថ្មីទាំងអស់។
លោក Auramon Supthaweethum អគ្គនាយកនៃនាយកដ្ឋានចរចាពាណិជ្ជកម្មថៃ បានប្រាប់អ្នកយកព័ត៌មានកាលពីថ្ងៃច័ន្ទថា “នេះធ្វើតាមការណែនាំពីឧបនាយករដ្ឋមន្រ្តីថ្មី និងជារដ្ឋមន្រ្តីក្រសួងពាណិជ្ជកម្មលោក Jurin Laksanavisit ដែលបានប្រកាសនៅក្នុងសភា កាលពីថ្ងៃព្រហស្បតិ៍សប្តាហ៍មុនថា ប្រទេសថៃនឹងធ្វើឱ្យប្រសើរឡើងវិញនូវការចរចាកិច្ចព្រមព្រៀងពាណិជ្ជកម្មសេរីថ្មីជាមួយអឺរ៉ុប ដែលបានជាប់គាំងអស់រយៈពេលជាច្រើនឆ្នាំ ដោយសារតែបញ្ហានយោបាយ”។
យោងតាមនាយកដ្ឋានចរចាពាណិជ្ជកម្មថៃ ពាណិជ្ជកម្មទ្វេភាគីរវាងថៃនិងអឺរ៉ុបបានកើនឡើង ៦,៥ភាគរយកាលពីឆ្នាំមុន ដែលស្មើនឹងដល់ ៤៧,៣ពាន់លានដុល្លារ។ ការនាំចេញថៃទៅកាន់អឺរ៉ុបបានកើនឡើង៥ ភាគរយ ស្មើនឹង ២៥ពាន់លានដុល្លារ និងការនាំចូលថៃពីអឺរ៉ុបមានតម្លៃ ២២,៣ពាន់លានដុល្លារ។
ការនាំចេញសំខាន់ៗរបស់ថៃទៅកាន់អឺរ៉ុប រួមមាន គ្រឿងកុំព្យូទ័រ គ្រឿងបន្លាស់រថយន្ត គ្រឿងអលង្ការ និងគ្រឿងអគ្គិសនី។
ការនាំចូលសំខាន់ៗពីសហភាពអឺរ៉ុបរួមមាន យន្ដហោះ Gliders ផលិតផលគីមី ការផ្គត់ផ្គង់វេជ្ជសាស្រ្ត និងពេជ្រ។
ថ្មីៗនេះ អឺរ៉ុបបានចុះហត្ថលេខាលើកិច្ចព្រមព្រៀងពាណិជ្ជកម្មសេរី ជាមួយបណ្តាប្រទេសជាសមាជិកអាស៊ានគឺសិង្ហបុរី និងវៀតណាម៕
