ដោយ វុត្ថា
ភ្នំពេញៈ ទីក្រុងភ្នំពេញស្ថិតនៅក្នុងចំណោមទីក្រុងចំនួន៥ ជាទីក្រុងល្អបំផុតក្នុងតំបន់អាស៊ីក្នុងការទិញអចលនទ្រព្យ ខណៈទីក្រុងទាំងនេះ កំពុងមានសន្ទុះរីកចំរើនខ្លាំងខាងវិស័យសេដ្ឋកិច្ច ប្រជាសាស្ត្រ និងសំណង់។
យោងតាមការចុះផ្សាយពីគេហទំព័រ INVEST INSIAN បានចុះផ្សាយកាលពីពេលថ្មីៗនេះបានឲ្យដឹងថា ទីក្រុងភ្នំពេញរបស់ប្រទេសកម្ពុជា ស្ថិតក្នុងចំណោមទីក្រុងដែលមានការរីកចម្រើនលឿនបំផុតនៅអាស៊ីអាគ្នេយ៍ ដោយសារតែការធ្វើនគរូបនីយកម្មរបស់រដ្ឋាភិបាល និងអត្រាកំណើតមានសុខភាពល្អរបស់ប្រជាជនបច្ចុប្បន្ន នៅទីក្រុងភ្នំពេញមានចំនួន ២លាននាក់ ហើយនឹងកើនឡើងទ្វេដងនៅឆ្នាំ២០៣០។
ទីក្រុងក្នុងតំបន់អាស៊ីទាំងនោះ រួមមាន ទីក្រុងភ្នំពេញ បាងកក ទីក្រុងម៉ានីល ទីក្រុងសេអ៊ូល និងទីក្រុងកូឡាឡាំពួរ។
សារព័ត៌មាននេះបានពន្យល់ថា ចំនួនប្រជាជននឹងកើនឡើងឥតឈប់ឈររួមជាមួយការកើនឡើង នៃវណ្ណៈកណ្តាលរបស់ប្រទេសកម្ពុជា និងកត្តាជំរុញកំណើនផ្សេងទៀត ស្មើនឹងតម្រូវការកាន់តែច្រើន សម្រាប់អចលនទ្រព្យក្នុងកណ្តាលក្រុង ក្នុងរយៈពេលវែង។
សារព័ត៌មានដដែលពន្យល់បន្ថែមទៀតថា ទីក្រុងភ្នំពេញ ជាទីក្រុងដែលមានក្រុមហ៊ុននិងមជ្ឈមណ្ឌលហិរញ្ញវត្ថុជាច្រើន ដែលមានធនាគារលំដាល់ពិភពលោកជាច្រើនដូចជា ICBC ធនាគារចិន និងធនាគារ ANZ ដែលប្តូរឈ្មោះទៅ J Trust Bank ជាដើម។ ទន្ទឹមនឹងនេះដែរ ក្រុមហ៊ុន AEON Group មកពីប្រទេសជប៉ុននាពេលថ្មីៗនេះបានសាងសង់ផ្សារទំនើបធំៗចំនួន២ នៅក្នុងក្រុងដោយផ្សារទំនើបនីមួយៗទទួលបានការកាន់កាប់ ១០០% និងមានភ្ញៀវចូលរាប់ពាន់នាក់ក្នុងមួយថ្ងៃ។
ទីក្រុងភ្នំពេញនេះ គឺជាមជ្ឈមណ្ឌលទេសចរណ៍ ដែលកំពុងរីកចម្រើនផងដែរ។ អាកាសយានដ្ឋានអន្តរជាតិភ្នំពេញ បានស្វាគមន៍ភ្ញៀវចូលមានចំនួនជាង៥លាននាក់ក្នុងឆ្នាំ ២០១៨ កើនឡើង ១,៧លាននាក់បើធៀបនឹងកាលមុន។
ប៉ុន្តែទោះបីជាមានសក្តានុពលច្រើនយ៉ាងនេះក្តី ទីផ្សារអចលនទ្រព្យសំខាន់ៗនៅភ្នំពេញ នៅតែមានតម្លៃទាបជាងបណ្តាទីក្រុងមួយចំនួនដែលនៅជិតខាង ពោលគឺមានតម្លៃ ១០០០ដុល្លារអាមេរិក ក្នុងមួយម៉ែត្រការ៉េក្នុងគិតជាមធ្យម។ តម្លៃអចលនទ្រព្យនៅទីក្រុងជិតៗនោះដូចជាទីក្រុង Jakarta និងទីក្រុងហាន់ណូយជាដើម គឺមានតម្លៃលើសពី ៤០០០ដុល្លារអាមេរិកក្នុងមួយម៉ែត្រការ៉េ បើប្រៀបធៀបនឹងទីក្រុងភ្នំពេញ៕
