ដោយរ៉ា ណេត
ភ្នំពេញៈ មន្រ្តីជាន់ខ្ពស់នៃរដ្ឋាភិបាលកម្ពុជាបានអះអាងថា ជាមួយនឹងលំហូរចូលនៃការវិនិយោគពីបណ្តាក្រុមហ៊ុនជប៉ុននៅកម្ពុជា បានធ្វើឲ្យលំហូរទុនវិនិយោគរបស់ជប៉ុនកើនជិតដល់ ២៥០០លានដុល្លារសហរដ្ឋអាមេរិក។
លោកឧបនាយករដ្ឋមន្ត្រី ហោ ណាំហុង បានមានប្រសាសន៍ក្នុងជំនួបជាមួយឯកអគ្គរដ្ឋទូតជប៉ុនលោក ហ៊ីដេហ៊ីសា ហូរីណូជិ (Hidehisa HORINOUCHI) នៅព្រឹកថ្ងៃទី១ ខែសីហា ឆ្នាំ២០១៩ នេះថា ជប៉ុន គឺជាភាគីមិត្តភាពដ៏ជិតស្និទ្ធជាមួយកម្ពុជា ជាច្រើនឆ្នាំកន្លងមកហើយ ហើយថែមទាំងព្យាយាមជួយ និងគាំទ្រដល់រាជរដ្ឋាភិបាលកម្ពុជាក្នុងជំរុញ និងអភិវឌ្ឍប្រទេសឱ្យកាន់តែមានភាពល្អ្រសើរ ដែលក្នុងនោះរួមមានដូចជាការផ្តល់ជំនួយឥតសំណង់ ការផ្តល់កម្ចីដើម្បីស្តារហេដ្ឋារចនាសម្ព័ន្ធនានា ក៏ដូចជាជំរុញ និងទាក់ទាញការវិនិយោគផ្ទាល់មកកាន់កម្ពុជាផងដែរ។
លោកបានបន្តថា នៅក្នុងអំឡុងពេលបំពេញបេសកកម្ម ចាប់តាំងពីឆ្នាំ២០១៦ ដល់២០១៩ របស់លោកហ៊ីដេហ៊ីសា ហូរីណូអូជិ ដែលទើបតែចប់អាណត្តិបេសកកម្មនៅកម្ពុជា ជប៉ុនបានផ្ដល់ជំនួយឥតសំណង ដល់កម្ពុជាសរុបចំនួនជាង ១៨១ លានដុល្លារអាមេរិក និងកម្ចីចំនួនជិត ៤២២លានដុល្លារអាមេរិក។
លោក ហ៊ីដេហ៊ីសា បានមានប្រសាសន៍ផងថា ក្នុងពេលបំពេញបេសកកម្មនៅកម្ពុជា លោកបានឃើញប្រទេសកម្ពុជាមាន ការរីកចម្រើនខ្លាំង។ លោកបានយល់ស្របទៅនឹងការលើកឡើងពីភាពរីកចម្រើន និងកើនឡើងនូវទំហំវិនិយោគផ្ទាល់របស់ជប៉ុននៅកម្ពុជា ពោលគឺបានកើនឡើងចំនួន៣៤ភាគរយ បើធៀបពីមួយឆ្នាំទៅមួយឆ្នាំ ដែលក្នុងរួមមានដូចជាវិស័យទេសចរណ៍ សណ្ឋាគារ វិស័យកសិកម្ម សំណង់ ការអប់រំ និងសុខាភិបាលជដើម។
លោកបានបញ្ជាក់ថា “ក្រោយពេលវិលត្រឡប់ទៅប្រទេសជប៉ុនវិញ លោកនឹងព្យាយាមផ្សព្វផ្សាយពីសក្ដានុពល និងឱកាសវិនិយោគនៅកម្ពុជា ដល់បណ្តាក្រុមហ៊ុននានានៅក្នុងប្រទេសជប៉ុន ដើម្បីជំរុញឱ្យមានការវិនិយោគបន្ថែមទៀត”៕
