ដោយ ៖ វុត្ថា
ភ្នំពេញ៖ ដូចការគ្រោងទុក លេខាធិការដ្ឋានអាស៊ាននឹងសម្ពោធជាផ្លូវការនូវអគារថ្មីរបស់ខ្លួនកំពស់១៦ ជាន់ នៅក្នុងទីក្រុងហ្សាកាតា ប្រទេសឥណ្ឌូនេស៊ី នៅថ្ងៃទី៨ ខែសីហា ឆ្នាំ២០១៩ ដោយមានការចូលរួមពីបណ្តារដ្ឋមន្ត្រីមកពីប្រទេសជាសមាជិក បន្ទាប់ពីការចំណាយពេលសាងសង់ជាងមួយឆ្នាំកន្លងមកនេះ។
យោងតាមសេចក្តីប្រកាសព័ត៍មានរបស់ក្រសួងការបរទេស និងសហប្រតិបត្តិការអន្តរជាតិ នៅថ្ងៃទី៥ ខែសីហា ឆ្នាំ២០១៩ នេះបានឱ្យដឹងថា ពិធីសម្ពោធនេះ ប្រព្រឹត្តទៅចំខួបលើកទី៥២ឆ្នាំនៃការបង្កើតអាស៊ាន។ លើសពីនេះ ក៏នឹងមានរៀបចំការតម្លើងប្រអប់ពេលវេលា ដើម្បីរក្សាទុកនូវសារលិខិតរបស់បណ្តាថ្នាក់ដឹកនាំអាស៊ាន ដែលរៀបរាប់ពីក្តីសង្ឃឹមនិងការរំពឹងទុកមកលើអាស៊ាន នៅចំពេលខួបលើកទី៧៥ឆ្នាំនៃការបង្កើតអាស៊ាន នៅឆ្នាំ២០៤២ ខាងមុខផងដែរ។
សេចក្តីប្រកាសព័ត៌មានដដែលបន្តថា ការសម្ពោធអគារលេខាធិការដ្ឋានអាស៊ានថ្មីនេះ បង្ហាញឲ្យឃើញនូវតួនាទីកាន់តែកើនឡើងរបស់លេខាធិការដ្ឋានអាស៊ាន និងថ្នាក់ដឹកនាំរបស់ខ្លួន ក្នុងការឆ្លើយតបទៅនឹងបញ្ហាប្រឈមនានាដែលកំពុងវិវត្តក្នុងសកលលោក និងក្នុងតំបន់ ក៏ដូចជាក្នុងការកសាងសហគមន៍អាស៊ាន ដែលមានសសរស្តម្ភបីគឺ ៖ សហគមន៍នយោបាយ-សន្តិសុខ សហគមន៍សេដ្ឋកិច្ច និងសហគមន៍សង្គម-វប្បធម៌។
តបតាមការអញ្ជើញរបស់លោកស្រី រ៉េតណូ ម៉ារស៊ូឌី (Retno Marsudi) រដ្ឋមន្រ្តីការបរទេសនៃសាធារណរដ្ឋឥណ្ឌូនេស៊ី លោក ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីការបរទេសនិងសហប្រតិបត្តិការ អន្តរជាតិនៃព្រះរាជាណាចក្រកម្ពុជា នឹងអញ្ជើញទៅកាន់ទីក្រុងហ្សាការតា ប្រទេសឥណ្ឌូនេស៊ី នៅថ្ងៃទី៨ ខែសីហា ឆ្នាំ២០១៩ ដើម្បីចូលរួមជាមួយរដ្ឋមន្រ្តីការបរទេស និងអ្នកតំណាងផ្សេងទៀតរបស់ប្រទេសសមាជិកអាស៊ាន ក្នុងពិធីសម្ពោធជាផ្លូវការនូវអគារថ្មីរបស់លេខាធិការដ្ឋានអាស៊ាន។
លេខាធិការដ្ឋានអាស៊ានថ្មីនេះ ត្រូវបានសាងសង់នៅលើផ្ទៃដី ៤៩.៩៩៣ ម៉ែត្រការ៉េ ខណៈទំហំអគារផ្ទាល់គឺ ១១.៣៦៩ ម៉ែត្រការ៉េ និងមានអគារចំនួន ២ ដែលអាគារនីមួយៗមានកំពស់ ១៦ជាន់ ដែលប្រើប្រាស់ទឹកប្រាក់ប្រមាណជិត ៥០០ ពាន់លាន (ប្រាក់ឥណ្ឌូនេស៊ី) ស្មើនឹងប្រមាណ ៣៧,២លានដុល្លារ។
