ដោយៈ រ៉ាណេត
ភ្នំពេញៈ នៅក្នុងគម្រោងផែនការយុទ្ធសាស្ត្រអភិវឌ្ឍជាតិ៣ឆ្នាំរំកិល ដោយចាប់គិតពីឆ្នាំ២០២០-២០២៣ខាងមុខនេះ ក្រសួងផែនការបានដាក់សំណើដល់រដ្ឋាភិបាលកម្ពុជា ក្នុងការប្រើប្រាស់ថវិកាសរុបជាង១៤ពាន់លានដុល្លារសហរដ្ឋអាមេរិក ដោយត្រូវឆ្លងកាត់កិច្ចប្រជុំពណៈរដ្ឋមន្ត្រីនៅថ្ងៃខាងមុខនេះ។
មន្ត្រីជាន់ខ្ពស់នៃក្រសួងផែនការបានបង្ហើបប្រាប់ឱ្យដឹងថា សម្រាប់ថវិកាដែលនឹងត្រូវចំណាយសម្រាប់ផែនការ អភិវឌ្ឍគម្រោងសាធារណៈរយៈពេល៣ឆ្នាំ ដោយគិតចាប់ពីឆ្នាំ២០២០ ២០២៣ ខាងមុខនេះមានចំនួនប្រមាណ ១៤.៤ពាន់ លានដុល្លារអាមេរិក ដែលនឹងត្រូវដាក់ឆ្លងរដ្ឋាភិបាល ក្នុងកិច្ចប្រជុំគណៈរដ្ឋមន្ត្រីនាពេលខាងមុខនេះ។
-->
អ្នកនាំពាក្យទីស្ដីការគណៈរដ្ឋមន្ត្រី លោកឯក ថា បានមានប្រសាសន៍ប្រាប់ក្រុមអ្នកសារព័ត៌មានថា “ផែនការដែលត្រូវបានស្នើ រំពឹងថានឹងត្រូវបានអនុម័តដោយរាជរដ្ឋាភិបាលកម្ពុជា ក្នុងពេលប្រជុំគណៈរដ្ឋមន្ត្រីនាពេលខាងមុខនេះ ដោយក្នុងខ្ទង់ចំណាយខាងលើនេះ នឹងត្រូវប្រើប្រាស់លើគម្រោងសរុបចំនួន ៦០៨ គម្រោង។
សម្រាប់ចំនួនថវិកាបម្រុងទាំងអស់នេះ គឺសម្រាប់ប្រើប្រាស់ទៅលើវិស័យសេដ្ឋកិច្ចចំនួន ៩៤៣.៩លានដុល្លារអាមេរិក។ វិស័យហេដ្ឋារចនាសម្ព័ន្ធរូបវន្តចំនួន៧.៧៩ពាន់លានដុល្លារអាមេរិក។ វិស័យហិរញ្ញវត្ថុចំនួន៤.៧៣ពាន់លានដុល្លារអាមេរិក និងវិស័យផ្សេងទៀតដូចជា សេវាកម្មនឹងត្រូវចំណាយថវិកាចំនួន ១.០១ពាន់លានដុល្លារអាមេរិក។
ក្រៅពីនេះ នៅក្នុងចំណោមគម្រោងទាំង៦០៨នេះ មានគម្រោងចំនួន១៧១ ត្រូវបាននិងកំពុងអនុវត្តន៍ ហើយត្រូវការថវិកាជាង៧.៥៣ពាន់លានដុល្លារ អាមេរិកបន្ថែមទៀត ខណៈគម្រោងចំនួន៤៣៧គម្រោងទៀត នឹងត្រូវការថវិកាប្រមាណ៦.៩៥ពាន់លានដុល្លារអាមេរិកចាក់បញ្ចូល៕
អានបន្ត៖ រដ្ឋាភិបាលត្រៀមថវិកា ១០០ លានដុល្លារសម្រាប់ស្តាហេដ្ឋារសម្ព័ន្ធបន្ទាប់ពីគ្រោះទឹកជំនន់ខេត្តព្រះសីហនុ
