ដោយ Donald Lee
ភ្នំពេញៈ យោងតាមទិន្នន័យដែលចេញផ្សាយ ដោយធនាគារកណ្តាលអាល្លឺម៉ង់ Bundesbank បានឱ្យដឹងថា ការធ្លាក់ចុះជាបន្តបន្ទាប់នៃសេដ្ឋកិច្ចរបស់អាល្លឺម៉ង់ ដោយសារតែការធ្លាក់ចុះនៅក្នុងវិស័យផលិតកម្ម ឧស្សាហកម្មរបស់ខ្លួនអាចមានន័យថា សេដ្ឋកិច្ចធំបំផុតរបស់អឺរ៉ុបកំពុងធ្លាក់ចុះ។
យោងតាមធនាគារកណ្តាលនេះបានឱ្យដឹងថា វិស័យផលិតកម្មរថយន្តដ៏សំខាន់របស់អាឡឺម៉ង់ បានធ្លាក់ចុះចាប់តាំងពីដើមឆ្នាំនេះ ដោយសារកង្វះខាតតម្រូវការនៅបរទេស។
ផលិតផលក្នុងស្រុកសរុបរបស់អាឡឺម៉ង់បានធ្លាក់ចុះ ០,១ ភាគរយពីខែមេសា ដល់ខែ មិថុនា ហើយអ្នកជំនាញយល់ស្របជាមួយធនាគារកណ្តាលថា វិស័យផលិតកម្មនឹងមិនកើនឡើងនៅត្រីមាសបន្ទាប់ឆ្នាំនេះទេ។
ធនាគារកណ្តាលនេះបានបញ្ជាក់ទៀតថា “សេដ្ឋកិច្ចទូទៅអាចធ្លាក់ចុះបន្តិចម្តង។ ចំណុចកណ្តាលនៃបញ្ហានេះគឺជាការធ្លាក់ចុះនៅក្នុងឧស្សាហកម្ម។
ធនាគារបានបន្ថែមថា “ខណៈដែលអ្វីៗកំពុងលេចឡើងនាពេលបច្ចុប្បន្ននេះ វាមិនច្បាស់ទេថាតើការនាំចេញ និងការពង្រីកឧស្សាហកម្ម នឹងវិលត្រឡប់ទៅរកភាពល្អប្រសើរឡើងវិញ មុនពេលសេដ្ឋកិច្ចក្នុងស្រុករងផលប៉ះពាល់ធ្ងន់ធ្ងរ។
ប្រសិនបើការព្យាករណ៍របស់ធនាគារកណ្តាល សម្រាប់ត្រីមាសទីបីបង្ហាញថាជាការពិតនោះ ប្រទេសអាល្លឺម៉ង់នឹងចូលក្នុងវិបត្តិសេដ្ឋកិច្ច ក្នុងរយៈពេលមួយដែលសេដ្ឋកិច្ចធ្លាក់ចុះក្នុងរយៈពេលពីរត្រីមាសជាប់គ្នា៕
