ដោយ Donald Lee
ភ្នំពេញ៖ ប្រធានាធិបតីសហរដ្ឋអាមេរិក លោក Donald Trump បានលុបចោលដំណើរទស្សនកិច្ចដែលបានគ្រោងទុកទៅកាន់ប្រទេសដាណឺម៉ាក បន្ទាប់ពីនាយករដ្ឋមន្រ្តីលោកស្រី Mette Frederiksen បានសើចចំអកលោក នៅពេលលឺថាអាមេរិកចង់ទិញតំបន់ Greenland ។
តាមរបាយការណ៍របស់ប្រព័ន្ធផ្សព្វផ្សាយនៅអាមេរិកកាលពីសប្តាហ៍មុន លោក Trump បានលើកឡើងម្តងហើយម្តងទៀតនូវគំនិតនៃការទិញតំបន់ Greenland ដែលជាកោះធំជាងគេបំផុតនៅលើពិភពលោកនៅក្នុងការប្រជុំផ្លូវការ និងអាហារពេលល្ងាច។
ដាណឺម៉ាកអនុញ្ញាតឱ្យពលរដ្ឋ Greenland មានស្វ័យភាព និងការគ្រប់គ្រងដោយខ្លួនឯង។ នាយករដ្ឋមន្រ្តី Frederiksen បាននិយាយថា “តំបន់ Greenland មិនមែនសម្រាប់លក់ទេ”។
លោកស្រី Frederiksen បានបន្ថែមថា “តំបន់ Greenland មិនមែនជាប្រទេសដាណឺម៉ាកទេ។ តំបន់ Greenland ជាកម្មសិទ្ធិរបស់តំបន់ Greenland”។
ក្រុមអ្នកជំនាញជឿជាក់ថា លោក Trump មានអារម្មណ៍មិនពេញចិត្តនឹងមតិយោបល់របស់សមភាគីរបស់គាត់ ហើយបានយកវេទិកាប្រព័ន្ធផ្សព្វផ្សាយសង្គម Twitter ដើម្បីបដិសេធការប្រជុំដែលបានគ្រោងទុកនៅថ្ងៃទី ២ ខែ កញ្ញា។
លោក Trump បានសរសេរនៅលើបណ្តាញសង្គម Twitter ថា “ដាណឺម៉ាកជាប្រទេសពិសេសមួយដែលមានប្រជាជនមិនគួរឱ្យជឿ ប៉ុន្តែផ្អែកលើការអត្ថាធិប្បាយរបស់ នាយករដ្ឋមន្រ្តីលោកស្រី Mette Frederiksen ថាលោកស្រីនឹងមិនមានចំណាប់អារម្មណ៍ក្នុងការពិភាក្សាអំពីការទិញតំបន់ Greenland ទេ។
ខ្ញុំនឹងពន្យាពេលកិច្ចប្រជុំរបស់យើងដែលគ្រោងធ្វើក្នុងរយៈពេល ២ សប្តាហ៍ម្តងទៀត”។ លោក Trump បានបន្ថែមទៀតថា “លោកស្រីនាយករដ្ឋមន្រ្តីអាចសន្សំការចំណាយ និងកិច្ចខិតខំប្រឹងប្រែងយ៉ាងខ្លាំងសម្រាប់អាមេរិក និងដាណឺម៉ាកដោយផ្ទាល់ ដូច្នេះខ្ញុំសូមអរគុណលោកស្រីចំពោះរឿងនេះ ហើយខ្ញុំរង់ចាំមើលការណាត់ពេលវេលាម្តងទៀតនៅពេលអនាគត!”។
តំបន់ Greenland មានធនធានធម្មជាតិដ៏ធំនៅលើផ្ទៃដី ១,៣០៥,១៧៨ គីឡូម៉ែត្រក្រឡាដែលរួមមានត្បូងពេជ្រ មាស អ៊ុយរ៉ាញ៉ូម និងប្រេង។ តំបន់ Greenland ក៏ជាទីតាំងរបស់មូលដ្ឋានទ័ពអាកាស Thule Air Base កងទ័ពអាមេរិកផងដែរ។
មូលដ្ឋាននេះត្រូវបានបង្កើតឡើងនៅឆ្នាំ ១៩៥១ និងមានទីតាំងស្ថិតនៅចម្ងាយ ១,២០៧ គីឡូម៉ែត្រពីរង្វង់អាក់ទិក។ វាជាមូលដ្ឋានយោធានៅភាគខាងជើងរបស់អាមេរិក ហើយមានប្រព័ន្ធការពារមីពីប្រទេសរុស្ស៊ី៕
