ដោយ នៅ វឌ្ឈនា
ភ្នំពេញៈ តំណាងក្រុមហ៊ុន Bridgemount Ltd របស់ចក្រភពអង់គ្លេស ដែលមានឯកទេសផ្នែកប្រឹក្សាយោបល់លើវិស័យវិស្វកម្ម បានបង្ហាញចេតនាវិនិយោគលើការដំឡើងរោងចក្រផលិត និងផ្គត់ផ្គង់ទឹកស្អាតនៅក្នុងប្រទេសកម្ពុជា ដើម្បីចូលរួមអភិវឌ្ឍន៍វិស័យឧស្សាហកម្ម និងលើកកម្ពស់សុខមាលភាពរបស់ប្រជាពលរដ្ឋ។
គម្រោងខាងលើ ត្រូវបានបង្ហាញ តាមរយៈជំនួនទ្វេរភាគីរវាងលោកជំទាវ តឹករ៉េត កំរង រដ្ឋលេខាធិការក្រសួងពាណិជ្ជកម្ម និងលោក Kalyan Ghosh នាយកក្រុមហ៊ុន Bridgemount Ltd កាលពីដើមសប្តាហ៍នេះ។
-->
នៅក្នុងឱកាសនោះ លោក Kalyan Ghoshបានជម្រាបលោកជំទាវ តឹករ៉េត កំរង អំពីសាវតា និងគោលបំណងរបស់ក្រុមហ៊ុន Bridgemount Ltd ព្រមទាំងគម្រោងដែលក្រុមហ៊ុនរបស់លោក បានផ្តល់សេវាប្រឹក្សា និងសហការវិនិយោគមានដូចជា ការថែទាំសុខភាព ការផលិតទឹកស្អាត ការដំឡើងស្ថានីយថាមពលព្រះអាទិត្យ និងការគាំទ្របច្ចេកទេសកសិកម្ម។
លោកជំទាវរដ្ឋលេខាធិការ តឹករ៉េត កំរង បានសម្តែងការស្វាគមន៍ចំពោះគម្រោងវិនិយោគខាងលើ និងបានជម្រាបជូនលោក Kalyan Ghoshអំពីវឌ្ឍនភាព និងកំណើនសេដ្ឋកិច្ចរបស់កម្ពុជា គោលនយោបាយវិនិយោគ ព្រមទាំងវិស័យអទិភាព ដែលរាជរដ្ឋាភិបាលបានកំណត់នៅក្នុងយុទ្ធសាស្ត្រចតុកោណដំណាក់កាលទី៤ និងផែនការយុទ្ធសាស្ត្រអភិ វឌ្ឍន៍ជាតិ ឆ្នាំ២០១៩-២០២៣។
លោកជំទាវរដ្ឋលេខាធិការ ក៏បានលើកទឹកចិត្តលោកនាយកក្រុមហ៊ុន និងសហការី បន្តជួបពិភាក្សាអំពីគម្រោងនេះ ជាមួយស្ថាប័នពាក់ព័ន្ធមានដូចជា ក្រសួងឧស្សាហកម្ម និងសិប្បកម្ម ក្រសួងបរិស្ថាន និងក្រុមប្រឹក្សាអភិវឌ្ឍន៍កម្ពុជា ដើម្បីស្វែងយល់អំពីនីតិវិធី និងលក្ខខណ្ឌតម្រូវផ្សេងៗ ហើយក្រសួងពាណិជ្ជកម្ម នឹងរង់ចាំជួយសម្របសម្រួលលិខិតបទដ្ឋានគតិយុត្តិ ដើម្បីឱ្យក្រុមហ៊ុនអាចធ្វើប្រតិបត្តិការធុរកិច្ច នៅក្នុងប្រទេសកម្ពុជា ដោយស្របច្បាប់ និងទទួលបានជោគជ័យ៕
