ដោយ Donald lee
ភ្នំពេញៈ មាសបានឈានដល់កំរិតបំបែកឯកទ្ទកម្ម នៃតម្លៃជិត ១,៦០០ដុល្លារក្នុងមួយអោន (ឬប្រហែល ៣១ ក្រាម) ដោយសារតែវិនិយោគិនបារម្ភពីការធ្លាក់ចុះសេដ្ឋកិច្ចពិភពលោក និងសង្គ្រាមពាណិជ្ជកម្មរវាងអាមេរិក និងចិន។
មាសបានឡើងដល់តម្លៃខ្ពស់បំផុត ក្នុងរយៈពេលប្រាំមួយឆ្នាំ បើគិតពីថ្ងៃ ច័ន្ទកន្លងមកនេះ ដោយមានតម្លៃដល់ទៅ
១,៥៥០ដុល្លារក្នុងមួយអោន កើនឡើង២០ភាគរយចាប់ពីដើមឆ្នាំនេះ។
លោក Madhavi Mehta អ្នកវិភាគប្រចាំក្រុមហ៊ុន Kotak Securities Ltd បាននិយាយថា “ជាមួយនឹងសញ្ញានៃវិបត្តិសេដ្ឋកិច្ច យើងបានឃើញការផ្លាស់ប្តូរឆ្ពោះទៅរកការវិនិយោគលើទ្រព្យសម្បត្តិ ដែលមានសុវត្ថិភាព ដូចជា មាស”។
អ្នកជួញដូរមាសក្រុមហ៊ុន ABC Bullion បានប្រាប់សារព័ត៌មាន The Sydney Morning Herald ថា តម្លៃមាសកំពុងតែឈានដល់តម្លៃ ១៦០០ដុល្លារក្នុងមួយអោន។
ក្រុមហ៊ុន ABC Bullion បានឲ្យដឹងថា “នៅពេលការតម្លៃបានឡើងលើសកំរិត ១,៥៣០ដុល្លារ វាជាសញ្ញាថាតម្លៃមាសនឹងមានការកើនឡើង”។
ក្រុមហ៊ុនបានបន្ថែមថា “ឥឡូវនេះ យើងឃើញតម្លៃមាស ១,៥៣០ដុល្លារ ក្នុងមួយអោន ហើយវាអាចនឹងមានពី ១,៥៩០ ដុល្លារទៅ ១,៦០០ដុល្លារ”។
ធនាគារកណ្តាលនៅជុំវិញពិភពលោកក៏បានទិញមាសផងដែរ។ យោងតាមក្រុមប្រឹក្សាមាសពិភពលោក មាសបម្រុងរបស់ធនាគារកណ្តាលនៅជុំវិញពិភពលោក កាលពីឆ្នាំមុនបានកើនឡើងដល់ ៦៥១.៥ តោនដែលជាកំណើនប្រចាំឆ្នាំ ៧៤ភាគរយ។
មាសត្រូវបានគេចាត់ទុកថា ជាការវិនិយោគដែលមានសុវត្ថិភាពបំផុង និងរក្សាតម្លៃពិត បើប្រៀបធៀបទៅនឹងរូបិយប័ណ្ណជាតិ ដែលអាចមានការប្រែប្រួលនៅជុំវិញពិភពលោក៕
