ដោយ វុត្ថា
ភ្នំពេញៈ រដ្ឋមន្ត្រីក្រសួងសាធារណៈការ និងដឹកជញ្ជូនបានអះអាងថា រដ្ឋាភិបាលចិនរហូតមមកដល់ពេលនេះ បានផ្តល់កម្ចីសម្បទានដែលមានអត្រាការប្រាក់ទាប លើគម្រោងអភិវឌ្ឍន៍ហេដ្ឋារចនាសម្ព័ន្ធ ដែលបាននិងកំពុងសាងសង់ និងសាងសងរួចរាល់នៅកម្ពុជាមានទឹកប្រាក់ចំនួន ២៥០០លានដុល្លារអាមេរិក។
ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូន បានឱ្យដឹងនៅក្នុងកិច្ចសម្ភាសជាមួយសារព័ត៌មានក្នុងស្រុកមួយ កាលពីចុងសប្តាហ៍មុនថា ថវិកាទាំងនេះ ត្រូវបានយកទៅចំណាយលើការសាងសង់ផ្លូវចំនួន២៩ខ្សែ ដែលមានចម្ងាយ ២៨៨៨គីឡូម៉ែត្រ និងសាងសង់ស្ពានចំនួន៧ ហើយស្ពានមួយទៀតបាននឹងកំពុងសាងសង់ដែលសរុបមានប្រវែងប្រមាណ ៨០០០ម៉ែត្រស្មើនឹង ៨គីឡូម៉ែត្រ។
លោកទេសរដ្ឋមន្ត្រីបន្តថា ក្រៅពីនោះឥណទានសម្បទាននោះ ត្រូវបានចំណាយទៅលើការសាងសង់កំពង់ផែស្វយ័តភ្នំពេញ និងត្រៀមសាងសង់ផ្លូវជាតិលេខ៧១C និង ផ្លូវជាតិលេខ១០ ថែមទៀតដែលមានការចំណាយ ៣០០លានថែមទៀត។ ដូច្នេះ បើបូករួមទាំងថវិកាទាំងអស់របស់ថវិការបស់រដ្ឋាភិបាលចិន មានចំនួន ២៨៦៥លានដុល្លារអាមេរិក ដែលត្រូវបាយកមកសាងផ្លូវ ស្ពាន និងកំពង់ផែនៅភ្នំពេញ។
លោកបន្ថែមថា ជាមួយគ្នានេះរដ្ឋាភិបាលចិន គ្រោងនឹងផ្តល់ជាបន្តបន្ទាប់ទៀត តាមរយៈគម្រោងអភិវឌ្ឍន៍៥ឆ្នាំរំកិល របស់រដ្ឋាភិបាលកម្ពុជាដែលត្រូវបានពិភាក្សាយ៉ាងលម្អិតលើគម្រោងអទិភាព ដាក់ទៅអោយភាគីចិនយកទៅពិនិត្យ។ បើភាគីចិនឯកភាព រដ្ឋាភិបាលនឹងបន្តចចាតម្លៃ ជាមួយក្រុមហ៊ុនសាងសង់ទាំងនោះ ក្នុងការសាងសង់បន្ថែមទៀ ព្រោះរដ្ឋាភិបាលកម្ពុជាមានគម្រោងនៅច្រើនណាស់ ក្នុងការត្រៀមប្រើប្រាស់ថវិកាចិន យកមកប្រើប្រាស់។
លោកស៊ុន ចាន់ថុលបានបន្ថែមទៀតថា ក្រៅពីថវិការបស់រដ្ឋាភិបាលចិន រដ្ឋាភិបាលកម្ពុជាក៏បានខ្ចីថវិកាមកពីប្រទេសកូរ៉េ ប្រទេសជប៉ុន ធនាគារពិភពលោក ធនាគារអភិវឌ្ឍន៍អាស៊ី ប្រទេសថៃ និងប្រទេសវៀតណាមផងដែរ ។ ទាំងនេះដោយសាររដ្ឋាភិបាលកម្ពុជាមានទំនាក់ទំនងល្អជាមួយបណ្តាប្រទេស និងស្ថាប័នទាំងនោះ ទើបគេផ្តល់ប្រាក់កម្ចីក្នុងអត្រាការប្រាក់ទាប តែសម្រាប់ទំនាក់ទំនងជាមួយភាគីចិន មានទំនាក់ទំនងពិសេស មានលក្ខណៈគ្រប់ជ្រុងជ្រោយ និងនីតិវិធីក្នុងការស្នើសុំ គឺមានភាពលឿន ក្នុងការយកថវិកាមកកសាងផ្លូវ ដើម្បីតភ្ជាប់ផ្លូវពីភ្នំពេញទៅកាន់បណ្តាខេត្តនានា ដើម្បីសម្រួលដល់ការធ្វើដំណើរ និងដឹកជញ្ជូន។
លោកបញ្ជាក់ទៀថា សម្រាប់កម្ចីសម្រាប់ប្រទេសផ្សេង ក្រៅពីប្រទេសចិន គឺមាននីតិវិធីយូឆ្នាំក្នុងការស្នើសុំ យ៉ាងហោចណាស់២ ទៅ៥ឆ្នាំ ទើបទទួលបានថវិកាយកមកប្រើប្រាស់លើការសាងសង់ផ្លូវ ដែលបណ្តាលឱ្យមានការខាងបង់សេដ្ឋកិច្ចជាតិយ៉ាងច្រើន។
លោកបញ្ជាក់ថា រដ្ឋាភិបាលកម្ពុជាមិនអាចរង់ចាំថវិកាទំាងនោះបានទេ ទើបត្រូវស្វែងរកប្រភពថវិកាមកពីប្រទេស ដែលប្រើប្រាស់និតិវិធីលឿនបំផុត មានភាពងាយស្រួល និងមិនស្មុកស្មាញយកមកកសាងហេដ្ឋារចនាសម្ព័ន្ធសំខាន់ៗក្នុងប្រទេសកម្ពុជា៕
