ដោយ ៖ Donald Lee
សហរដ្ឋអាមេរិក ៖ រោងចក្រចិនបានពង្រីកផលិតកម្មយ៉ាងឆាប់រហ័សនៅក្នុងខែសីហា ខណៈវិស័យផលិតកម្ម សហរដ្ឋអាមេរិកបានធ្លាក់ចុះជាលើកដំបូងក្នុងរយៈពេល៣ឆ្នាំកន្លងមកនេះ។
សង្រ្គាមពាណិជ្ជកម្មរវាងអាមេរិក និងចិនបានកើនឡើងយ៉ាងខ្លាំងកាលពីខែមុន ដោយប្រទេសសេដ្ឋកិច្ចធំបំផុតទាំងពីរលើពិភពលោក បានដំឡើងពន្ធលើទំនិញនាំចូលដែលបង្កឱ្យមានភាពមិនប្រាកដប្រជា ផ្នែកសេដ្ឋកិច្ចនៅក្នុងទីផ្សារនៅជុំវិញពិភពលោក។
វិស័យផលិតកម្មអាមេរិកបានធ្លាក់ចុះ ជាលើកដំបូងនៅក្នុងខែសីហា បន្ទាប់ពីមានកំណើនជាង៣ឆ្នាំ។ នេះបើយោងតាមវិទ្យាស្ថានគ្រប់គ្រងការផ្គត់ផ្គង់ (ISM)។
សន្ទស្សន៍អ្នកគ្រប់គ្រងការទិញ ដែលជាឧបករណ៍របស់វិទ្យាស្ថាន ISM សម្រាប់វាស់ស្ទង់សុខភាពសេដ្ឋកិច្ច នៃវិស័យផលិតកម្មបានថយចុះមកត្រឹម ៤៩,១ ភាគរយ ដែលបង្ហាញពីការធ្លាក់ចុះដំបូងក្នុងវិស័យនេះ បន្ទាប់ពីមានកំណើនរយៈពេល៣ឆ្នាំ។
លទ្ធផលសន្ទស្សន៍អ្នកគ្រប់គ្រងការទិញ ដែលក្រោម៥០ភាគរយ បង្ហាញពីវិស័យផលិតកម្មធ្លាក់ចុះ។ លទ្ធផលជាង៥០ភាគរយឆ្លុះបញ្ចាំងពីការពង្រីកវិនិយោគ។
ទីផ្សារនៅអាមេរិកដូចជា ផ្សារហ៊ុនក្រុមហ៊ុន Dow Jones បានធ្លាក់ចុះ៣០០ពិន្ទុ ខណៈដែលវិនិយោគិនភ័យខ្លាចការធ្លាក់ចុះសេដ្ឋកិច្ច។
សង្គ្រាមពាណិជ្ជកម្មរវាងអាមេរិក និងចិនកំពុងធ្វើឱ្យសេដ្ឋកិច្ចអាមេរិកជួបការលំបាក ជាពិសេសវិស័យផលិតកម្ម ខណៈការនាំចេញរបស់អាមេរិកចាប់ផ្តើមធ្លាក់ចុះ។
លោក Timothy Fiore ប្រធានគណៈកម្មាធិការអង្កេតអាជីវកម្មផលិតកម្មនៃវិទ្យាស្ថាន ISM បាននិយាយថា “អ្នកឆ្លើយតបបានបង្ហាញការព្រួយបារម្ភបន្តិច អំពីភាពច្របូកច្របល់ពាណិជ្ជកម្មរវាងអាមេរិក និងចិន ប៉ុន្តែពាណិជ្ជកម្ម នៅតែជាបញ្ហាសំខាន់បំផុតដែលបង្ហាញដោយការធ្លាក់ចុះនៃការបញ្ជាទិញនាំចេញថ្មី”។
ទន្ទឹមនឹងនេះ វិស័យផលិតកម្មចិនបានកើនឡើង មិននឹកស្មានដល់នៅក្នុងខែសីហា។ សន្ទស្សន៍សន្ទស្សន៍អ្នកគ្រប់គ្រងការទិញ (PMI) ចិនមាន៥០,៤ ភាគរយសម្រាប់ខែនេះលើសពីការព្យាករណ៍ ដែលបង្ហាញពីការពង្រីកវិនិយោគនៅក្នុងវិស័យនេះ។
ទោះយ៉ាងណាអ្នកនិពន្ធនៃរបាយការណ៍ PMI របស់ចិនបានព្រមានថា លទ្ធផលខែ សីហា មិនបានបង្ហាញពីនិន្នាការកំណើនរយៈពេលវែងទេ ហើយបានឲ្យដឹងថា សូចនាករទាំងអស់ ចង្អុលបង្ហាញពីការធ្លាក់ចុះ នៃផលិតកម្មស្របតាមសេដ្ឋកិច្ចប្រទេសផ្សេងទៀតនៅជុំវិញពិភពលោក។
អ្នកវិភាគដែលធ្វើការលើសន្ទស្សន៍ អ្នកគ្រប់គ្រងការទិញរោងចក្រ Caixin / Markit បានសរសេរថា “តម្រូវការសរុបមិនបានប្រសើរឡើងទេ ហើយតម្រូវការបរទេសក៏ធ្លាក់ចុះគួរឱ្យកត់សម្គាល់ដែរដែលធ្វើឱ្យស្តុកផលិតផលកើនឡើង”។ លោកបានបន្ថែមថា “មិនមានសញ្ញាណាមួយ បង្ហាញពីភាពប្រសើរឡើងនៃឆន្ទៈរបស់ក្រុមហ៊ុន ក្នុងការបំពេញបន្ថែមស្តុកទំនិញ ឬនៅក្នុងទំនុកចិត្តរបស់ពួកគេនោះទេ។ តម្លៃឧស្សាហកម្មធ្លាក់ចុះ”៕
