ដោយ ម៉ាណេត
ភ្នំពេញៈ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានថ្លែងថា ផ្លូវសូត្រសតវត្សរ៍ទី២១ បានផ្ដល់ឱ្យប្រទេសជាច្រើនដែលមានការយកចិត្តទុកដាក់ ជាមួយនឹងគម្រោងសហប្រតិបត្តិការ និងគម្រោងនេះទទួលបាននូវផលប្រយោជន៍ដូចជាកម្ពុជា និងបណ្ដាប្រទេសផ្សេងទៀតនៅក្នុងតំបន់។
សម្ដេចតេជោនាយករដ្ឋមន្ត្រី បានលើកឡើងដូច្នេះក្នុងកិច្ចសម្ភាសន៍ជាមួយនឹងសារព័ត៌មានល្បីៗចំនួនបី របស់សាធារណរដ្ឋប្រជាមានិត ចិន រួមមាន ទូរទស្សន៍ CCTV ទីភ្នាក់ងារសារព័ត៌មាន Xinhua និងវិទ្យុផ្សាយសំឡេងអន្តរជាតិកម្ពុជា-ចិនដើម្បីអបអរសាទរខួបទី៧០ឆ្នាំ នៃការបង្កើតសាធារណរដ្ឋប្រជាមានិតចិន កាលពីពេលថ្មីៗកន្លងមកនេះ។
សម្ដេចតេជោនាយករដ្ឋមន្ត្រី បានលើកឡើងថា គំនិតផ្ដួចផ្ដើមរបស់ឯកឧត្ដមប្រធានាធិតីហ្សី ជិនពីង លើបញ្ហាពាក់ព័ន្ធជាមួយនឹងខ្សែក្រវាត់ និងផ្លូវ (BRI) ក៏ដូចជាផ្លូវសូត្រសតវត្សរ៍ទី២១ បានផ្ដល់ឱ្យប្រទេសជាច្រើន ដែលមានការយកចិត្តទុកដាក់ជាមួយនឹងគម្រោងសហប្រតិបត្តិការ និងគម្រោងនេះ ទទួលបាននូវផលប្រយោជន៍ ដូចជាកម្ពុជា និងបណ្ដាប្រទេសផ្សេងទៀតនៅក្នុងតំបន់ ហើយគម្រោងនេះ សម្ដេចបានចូលរួមប្រជុំពីរដង កាលពីឆ្នាំ២០១៧ និងក្នុងខែមេសា ឆ្នាំ២០១៩កន្លងទៅនេះ។
សម្ដេចតេជោមានប្រសាសន៍ថា “ខ្ញុំឃើញថាមានប្រទេសកាន់តែច្រើនបានចូលរួម ជាមួយនឹងគំនិតផ្ដួចផ្ដើមទាក់ទិននឹង ខ្សែក្រវាត់១ និងផ្លូ១ ហើយកម្ពុជាក៏ជាអ្នកទទួលផលនៃការរីកលូតលាស់នៃសេដ្ឋកិច្ចរបស់ចិន”។
សម្ដេចតេជោបានបន្ថែមទៀតថា “សរុបមកអាចនិយាយបានថា ចិនបានឆ្លងផុតដំណាក់កាលពីប្រទេសដែលមានការអភិវឌ្ឍតិចតួច មកកាន់ជាប្រទេសដែលមានការអភិវឌ្ឍខ្ពស់រួចស្រេចទៅហើយ”។ សម្តេចបន្តថា “នេះគឺជាការដែលកម្ពុជា និងខ្លួនខ្ញុំក្នុងឋានៈជាមិត្តភក្ដិមួយរបស់ចិន ក៏សូមជូនពរដល់ប្រជាជនចិន បក្សកុម្មុយនីស្ត ក៏ដូចជារដ្ឋាភិបាល និងប្រជាជនចិន ទទួលបាននូវសមិទ្ធផលកាន់តែធំធេងថែមទៀតសម្រាប់ជាឆ្នាំបន្ត ដើម្បីជួយដល់ប្រជាជនចិនរីកលូតលាស់ខ្លួនឯងផង និងជួយទៅដល់បណ្ដាប្រទេសនៅក្នុងតំបន់ និងពិភពលោកផងដែរ”។
បណ្តាប្រទេសជាសមាជិកអាស៊ាន រួមមាន ព្រុយណេ កម្ពុជា ឥណ្ឌូនេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សឹង្ហបូរី ថៃ និងវៀតណាម។
គំនិតផ្តួចផ្តើមស្តីពី ខ្សែក្រវ៉ាត់១ ផ្លូវ១ ត្រូវបានប្រទេសចិនប្រកាសជាផ្លូវការក្នុងឆ្នាំ២០១៣ ហើយប្រទេសកម្ពុជាបានបង្ហាញនូវគោលជំហរ គាំទ្រគំនិតផ្តួចផ្តើមនេះភ្លាម។ ចាប់តាំងពីពេលនោះមក ភាគីទាំងពីរបានចុះអនុស្សរណៈយោគយល់គ្នា (MOU) ស្តីពីការរៀបចំចំណុចគោល នៃផែនការកិច្ចសហប្រតិបត្តិការទ្វេភាគី ដើម្បីរួមគ្នាបង្កើតកិច្ចសហប្រតិបត្តិការសេដ្ឋកិច្ចផ្លូវសូត្រ និងកិច្ចសហប្រតិបត្តិការផ្លូវសូត្រសមុទ្រសតវត្សទី២១ នៅក្នុងអំឡុងទស្សនកិច្ចផ្លូវរដ្ឋ នៅកម្ពុជារបស់លោក XI Jinping ប្រធានាធិបតីនៃសាធារណរដ្ឋប្រជាមានិតចិន និងឈានចុះហត្ថលេខាលើផែនការ ដោយផ្តោតលើគម្រោងនៃវិស័យអាទិភាពចំនួន៧ គឺវិស័យហេដ្ឋារចនាសម្ពន្ធ ដោយរួមបញ្ចូលទាំងវិស័យដឹកជញ្ជូន ទូរគមនាគមន៍ បណ្តាញនិងបច្ចេកវិទ្យាអវកាស និងថាមពល វិស័យកសិកម្ម ការកសាងសមត្ថភាព ការអភិវឌ្ឍតំបន់សេដ្ឋកិច្ចពិសេស វប្បធម៌និងទេសរចណ៍ ហិរញ្ញវត្ថុ និងការពារអេកូបរិស្ថាន។
គម្រោងទាំងនេះ អាចស្នើឡើងភាគីរដ្ឋាភិបាល នៃប្រទេសទាំងពីរផង និងវិស័យឯកជននៃប្រទេសទាំងពីរផងដែរ។
ក្រោយពេលផ្តល់ការអនុម័តដោយថ្នាក់ដឹកនាំនៃប្រទេសទាំងពីររួច គម្រោងអាទិភាពទាំងនេះ នឹងទទួលបានការគាំទ្រផ្នែកហិរញ្ញប្បទាន ពីស្ថាប័នហិរញ្ញវត្ថុទាំងឡាយ របស់រដ្ឋាភិបាលចិន រួមទាំងវិស័យឯកជនរបស់ចិនផងដែរ។ គិតមកត្រឹមពេលនេះ គម្រោងហេដ្ឋារចនាសម្ពន្ធធំៗចំនួន២ គឺគម្រោងផ្លូវល្បឿនលឿនភ្នំពេញ-ក្រុងព្រះសីហនុ និងគម្រោងសាងសង់ព្រលាន្តយន្តហោះសៀមរាបថ្មីបានចាប់ផ្តើមដំណើរការ៕
