ដោយ វុត្ថា
ភ្នំពេញ៖ រដ្ឋាភិបាលបាននិងកំពុងដាក់ចេញយន្តការពិសេសសម្រាប់ការទាកទាញការវិនិយោគកាន់តែច្រើនបន្ថែមទៀត នៅតាមព្រំដែនកម្ពុជា-ថៃ និងព្រំដែនកម្ពុជា-វៀតណាម ស្របតាមស្មារតី និងលទ្ធផលនៃវេទិការាជរដ្ឋាភិបាល-ផ្នែកឯកជន លើកទី១៨ ។
យោងតាមកិច្ចប្រជុំបូកសរុបលទ្ធផលនៃដំណើរទស្សនកិច្ចការងារនៅក្រុងប៉ោយប៉ែត ខេត្តបន្ទាយមានជ័យ និងក្រុងបាវិត ខេត្តស្វាយរៀងកាលពីថ្ងៃ ១៩ ខែកញ្ញា ឆ្នាំ ២០១៩ម្សិលមិញនេះ របស់មន្ត្រីរដ្ឋាភិបាល បានឱ្យដឹងថា គោលបំណងនៃកិច្ចប្រជុំនេះ គឺដើម្បីបូកសរុបលទ្ធផលនៃដំណើរទស្សនកិច្ចការងារទាំងពីរលើក ព្រមទាំងការដាក់ចេញនូវកិច្ចការបន្តចំពោះមុខ សម្រាប់ជាមូលដ្ឋានឈានទៅដល់ការរៀបចំដាក់ចេញនូវយន្តការពិសេសសម្រាប់ទាក់ទាញការវិនិយោគឱ្យកាន់តែច្រើន។
-->
យន្តការពិសេសរបស់រដ្ឋាភិបាលដែលនឹងដាក់ចេញរួមមានជាអាទិ៍ ការរៀបចំតំបន់សេដ្ឋកិច្ចពិសេសនៅតាមជាយដែន ការតភ្ជាប់បណ្តាញ និងផ្គត់ផ្គង់អគ្គិសនីនៅក្នុងតំបន់សេដ្ឋកិច្ចពិសេសទាំងនោះ ការកំណត់នូវវិស័យឧស្សាហកម្មដែលត្រូវទាក់ទាញ និងការរៀបចំឡើងវិញនូវការលើកទឹកចិត្តដល់ការវិនិយោគទាំងនោះ និង ការរៀបចំបង្កើនការសម្រួលពាណិជ្ជកម្ម និងសម្រួលផ្នែកឡូជីស្ទីកនៅតាមជាយដែន ឬតំបន់សេដ្ឋកិច្ចពិសេស។
កិច្ចប្រជុំនេះផងដែរ ត្រូវបានរៀបចំឡើងនៅក្រុមប្រឹក្សាអភិវឌ្ឍន៍កម្ពុជាដឹកនាំដោយ លោក សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្រ្តី អគ្គលេខាធិការក្រុមប្រឹក្សាអភិវឌ្ឍន៍កម្ពុជា បន្ទាប់ពីការចុះធ្វើទស្សនកិច្ចសិក្សាបឋម និងពិនិត្យមើលស្ថានភាពជាក់ស្ដែងចំនួនពីរលើក គឺលើកទី១ នៅក្រុងប៉ោយប៉ែត ខេត្តបន្ទាយមានជ័យ កាលពីថ្ងៃទី៥ ខែសីហា ឆ្នាំ២០១៩ និងលើកទី២ នៅក្រុងបាវិត ខេត្តស្វាយរៀង កាលពីថ្ងៃទី៥ ខែកញ្ញា ឆ្នាំ២០១៩ កន្លងទៅ។
បេសកកម្មនេះត្រូវបានធ្វើឡើង ដោយយោងតាមស្មារតី និងលទ្ធផលនៃវេទិការាជរដ្ឋាភិបាល-ផ្នែកឯកជន លើកទី១៨ ដែលបានប្រព្រឹត្តទៅកាលពីថ្ងៃទី២៩ ខែមីនា ឆ្នាំ២០១៩ ក្រោមអធិបតីដ៏ខ្ពង់ខ្ពស់របស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា៕
