ដោយៈ រ៉ាណេត
ភ្នំពេញៈ នៅក្នុងគោលដៅនៃការជំរុញវិស័យពាណិជ្ជកម្មកម្ពុជា ទៅកាន់ទូទាំងសាកលលោកឱ្យកាន់តែឆាប់រហ័ស និងល្អប្រសើរ សភាពាណិជ្ជកម្មកម្ពុជាគ្រោងបើកការិយាល័យតំណាងនៅតាមបណ្តាប្រទេសជឿនលឿន ជាពិសេសនៅក្នុងប្រទេសប៉ែកអឺរ៉ុប។
អនុប្រធានសភាពាណិជ្ជកម្មកម្ពុជា លោកឧកញ៉ាលឹម ហេង បានមានប្រសាសន៍ឲ្យដឹងតាមទូរស័ព្ទនារសៀលថ្ងៃទី២៣ កញ្ញានេះថា វិស័យពាណិជ្ជកម្ម គឺចាំបាច់បំផុតត្រូវមានកិច្ចទំនាក់ទំនងល្អ និងទូលាយជាមួយបណ្តាក្រុមហ៊ុនអន្តរជាតិ នៅតាមបណ្តាប្រទេសនានានៅក្នុតំបន់ ក៏ដូចជានៅលើសាកលលោកជាសំខាន់។
-->
លោកឧកញ៉ាបានបន្តទៀតថា “ក្រោមការកិច្ចគាំទ្រ និងការចង្អុលបង្ហាញពីសំណាក់ប្រមុខថ្នាក់ដឹកនាំរបស់រដ្ឋាភិបាលកម្ពុជា សភាពាណិជ្ជកម្មកម្ពុជា បានព្យាយាមជំរុញការផ្សព្វផ្សាយពីសក្តានុពល និងឱកាសល្អពីការវិនិយោគនៅកម្ពុជា ទៅកាន់បណ្តាប្រទេសនានានៅទូទាំងសាកលលោក”។
លោកឧកញ៉ាលឹម ហេងបានបន្តថា បច្ចុប្បន្ននេះសភាពាណិជ្ជកម្មកម្ពុជា កំពុងតែធ្វើតាមផែនការយុទ្ធសាស្ត្រ ដែលបានដាក់ចេញ និងគាំទ្រដោយរដ្ឋាភិបាលកម្ពុជា ដើម្បីជំរុញ និងធ្វើយ៉ាងណាជួយសម្រួលដល់វិស័យឯកជនមានឱកាស និងលទ្ធភាពគ្រប់គ្រាន់ក្នុងការស្វែងរកដៃគូវិនិយោគរបស់ខ្លួន ក្រោមការជួយសម្របសម្រួលកំណែទម្រង់ផ្ទៃក្នុងរបស់រដ្ឋាភិបាល។
លោកឧកញ៉ាបានបន្តទៀតថា “បច្ចុប្បន្ននេះសភាពាណិជ្ជកម្មកម្ពុជា បានព្យាយាមធ្វើការជាមួយតំណាងរដ្ឋាភិបាល ក្នុងការសម្របសម្រួលដល់វិស័យឯកជនជាច្រើនដោយបានបង្កើតក្រុមការងារដោះស្រាយបញ្ហាប្រឈមនានារហូតដល់១៣ក្រុម ដោយមានរដ្ឋមន្ត្រីចំនួន១៣ក្រសួងចូលរួមយ៉ាងសកម្មផងដែរ”។ លោកបន្តថា រដ្ឋាភិបាលបានសម្រេចលុបចោលនូវនីតិវិធីមួយចំនួនដែលអាចបង្កភាពរាំងស្ទះ និងឧបសគ្គដល់អ្នកវិនិយោគ ដ៏ដូចជាការនាំចេញ នាំចូលផលិតផលនានាដើម ជាក់ស្ដែងដូចបញ្ហាគយ បញ្ហាការិយាធិបតេយ្យ ត្រូវបានលុបចោល។
លោកឧកញ៉ាបានបញ្ជាក់ទៀតថា ដើម្បីជំរុញការផ្សព្វផ្សាយពីសក្ដានុពលកម្ពុជាទៅកាន់បណ្តាប្រទេសនានា នៅទូទាំងសាកលលោកឱ្យកាន់តែទូលាយ និងឆាប់រហ័ស សភាពាណិជ្ជកម្មកម្ពុជា បានចាប់អនុវត្តគោលការណ៍ចម្បង ដោយការដាក់ពង្រាយការិយាល័យតំណាងនៅតាមបណ្តាប្រទេសនានា ជាពិសេសប្រទេសដែលមានការអភិវឌ្ឍ និងជឿនលឿន ដូចជាប្រទេសចិន ជប៉ុន សហរដ្ឋអាមេរិក បារាំង អង់គ្លេស សាំងហ្គាពួរ អូស្ត្រាលី និងបណ្តាប្រទេសផ្សេងៗទៀត ខណៈដែលបច្ចុប្បន្ននេះយើងបានដាក់ទីតាំងនៅក្នុងប្រទេសកាណាដា រួចទៅហើយ។
លោកលឹម ហេងបានបញ្ជាក់ថា “យើងមានគម្រោងដាក់ការិយាល័យតំណាងនៅតាមតំបន់ និងរដ្ឋទាំងឡាយណា ដែលមានវត្តមានប្រជាពលរដ្ឋកម្ពុជារស់នៅច្រើន ជាពិសេស ដូចជាសហរដ្ឋអាមេរិក និងបារាំងជាដើម ដែលមានបងប្អូនប្រជាជនខ្មែររស់នៅច្រើន”។
អ្នកជំនាញសិក្សាស្រាវជ្រាវសេដ្ឋកិច្ចនៃរាជបណ្ឌិតសភាកម្ពុជា លោកបណ្ឌិត ហុង វណ្ណៈ បានមានបង្ហាញពីការគាំទ្រទៅនឹងគោលការណ៍ដែលបានដាក់ចេញឱ្យអនុវត្ត និងគាំទ្រដោយរដ្ឋាភិបាលខាងលើនេះ។
លោកបានបន្តទៀតថា “វាជារឿងល្អប្រសិនបើយើងអាចធ្វើទៅបាន ដែលវាគឺជាចំណែកមួយយ៉ាងសំខាន់ក្នុងការជួយផ្សព្វផ្សាយ និងផ្តល់ព័ត៌មានលម្អិតពីកម្ពុជាទៅកាន់បណ្តាអ្នកវិនិយោគអន្តរជាតិនៅតាមបណ្តាប្រទេសជឿនលឿនទាំងអស់នោះ”។
លោកបានបញ្ជាក់ថា “នៅពេលមានការិយាល័យតំណាងសភាពាណិជ្ជកម្មកម្ពុជានៅក្នុងប្រទេសណាមួយ មានន័យថា កម្ពុជាត្រូវបានស្ថិតនៅក្នុងការគាំទ្រពីថ្នាក់ដឹកនាំនៃប្រទេសនោះ”។
លោកបានបន្តទៀតថា អ្វីដែលត្រូវយកចិត្តទុកដាក់នោះ គឺភាពប្រាកដប្រជាថាអ្នកតំណាងការិយាល័យត្រូវតែមានភាពច្បាស់លាស់ និងយល់ដឹងស៊ីជម្រៅពីទិដ្ឋភាពវិនិយោគ ទិដ្ឋភាពផ្នែកច្បាប់ពាក់ព័ន្ធ ក៏ដូចជាកិច្ចទំនាក់ទំនងលើវិស័យពាណិជ្ជកម្មរវាងប្រទេស និងប្រទេស។ ប៉ុន្តែប្រសិនបើអ្នកតំណាងការិយាល័យមានភាពមិនច្បាស់ការណ៍ទាក់ទងទៅនឹងការលើកឡើងខាងលើនេះ វានឹងក្លាយទៅជាបន្ទុកបន្ថែមរបស់រដ្ឋាភិបាល៕
