ដោយ ៖ រ៉ាណេត
ភ្នំពេញ ៖ បន្ទាប់ពីពិនិត្យមើលលើកិច្ចសំណើស្នើសុំវិនិយោគរបស់ក្រុមហ៊ុនចំនួន២ក្នុងការបង្កើតរោងចក្រ ដែលមានទីតាំងនៅក្នុងខេត្តកណ្តាល កាលពីពេលកន្លងទៅ គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រ ចុះបញ្ជីជាស្ថាពរជូនដល់ក្រុមហ៊ុនទាំង២ ដែលមានទំហំទឹកប្រាក់ជាង៦លានដុល្លារ។
ក្រុមហ៊ុនដែលទទួលបានសិទ្ធិអនុញ្ញាតដំណើរប្រតិបត្តិការលើការវិនិយោគនៅក្នុងខេត្តកណ្តាលចំនួន២ រួមមាន ៖
១- ក្រុមហ៊ុន HONGFAXIANG INDUSTRIAL CO., LTD” គម្រោងបង្កើតរោងចក្រផលិតកាបូបគ្រប់ប្រភេទ និងគ្រឿងផ្សំកាបូប ដែលមានទីតាំងវិនិយោគស្ថិតនៅភូមិព្រៃគោ ឃុំលំហាច ស្រុកអង្គស្នួល ខេត្តកណ្តាល មានទុនវិនិយោគប្រមាណ ៣,៩លានដុល្លារអាមេរិក និងអាចបង្កើតការងារបានចំនួន ២.៥២៧កន្លែង។
២- ក្រុមហ៊ុន M.H.K.Y Manufactures CO., LTD” គម្រោងបង្កើតរោងចក្រផ្គុំដំឡើងម៉ូតូ និងម៉ូតូកង់បី ដែលមានទីតាំងវិនិយោគស្ថិតនៅភូមិឫស្សីជ្រោយ ឃុំឫស្សីជ្រោយ ស្រុកមុខកំពូល ខេត្តកណ្តាល មានទុនវិនិយោគប្រមាណ ២,២លានដុល្លារ អាមេរិក និងអាចបង្កើតការងារបានចំនួន ៩១កន្លែង ៕
