ដោយ Donald Lee
ភ្នំពេញៈ មន្ត្រីរដ្ឋាភិបាលកូរ៉េខាងត្បូង និងជប៉ុនបានជួបប្រជុំគ្នានៅទីក្រុងសេអ៊ូល កាលពីថ្ងៃពុធ ក្នុងក្តីសង្ឃឹមថានឹងរកដំណោះស្រាយ ចំពោះសង្គ្រាមពាណិជ្ជកម្មរបស់ខ្លួន។ នេះបើយោងតាមក្រសួងការបរទេសកូរ៉េខាងត្បូង។
មន្ត្រីក្រសួងការបរទេសកូរ៉េខាងត្បូងលោក Kim Jung-han នឹងជួបជាមួយអ្នកការទូតជប៉ុនលោក Shigeki Takizaki ក្នុងក្តីសង្ឃឹមថា នឹងមានផ្លូវឆ្ពោះទៅរកការផ្សះផ្សាអាចត្រូវបានធ្វើឡើង និងដើម្បីធានាឱ្យមានការចូលរួមរបស់កូរ៉េខាងត្បូង នៅក្នុងពិធីសោយរាជ្យរបស់អធិរាជជប៉ុន Naruhito នៅថ្ងៃទី ២២ ខែ តុលា នៅទីក្រុងតូក្យូ។
-->
សង្រ្គាមពាណិជ្ជកម្មកូរ៉េខាងត្បូង នឹងជប៉ុនបានចាប់ផ្តើមកាលពីឆ្នាំមុន នៅពេលដែលតុលាការកំពូលកូរ៉េខាងត្បូង បានបញ្ជាឱ្យសាជីវកម្មជប៉ុន បង់ប្រាក់សំណងសម្រាប់ការពាក់ព័ន្ធរបស់ពួកគេ នៅក្នុងពលកម្មទាសករ នៅឧបទ្វីបកូរ៉េក្នុងអំឡុងពេលកាន់កាប់របស់ខ្លួនក្នុងឆ្នាំ១៩១០ ដល់ ១៩៤៥។
រដ្ឋាភិបាលជប៉ុនបានអះអាងថា សេចក្តីសម្រេចរបស់តុលាការកូរ៉េ បង្កឱ្យមានជម្លោះដោយផ្ទាល់ជាមួយសន្ធិសញ្ញាឆ្នាំ១៩៦៥ រវាងប្រទេសទាំងពីរដែលបានបញ្ជាក់យ៉ាងច្បាស់ថា រាល់ការទាមទារសំណងអំឡុងពេលសង្គ្រាម គឺបានបញ្ចប់ទាំងស្រុង និងចុងក្រោយ។
ជាលទ្ធផលទំនាក់ទំនងសេដ្ឋកិច្ច នយោបាយ និងវប្បធម៌រវាងប្រទេសមហាអំណាចសេដ្ឋកិច្ចអាស៊ីទាំងពីរ បានឈានដល់កម្រិតទាបជាប្រវត្តិសាស្ត្រ។
ប្រជាជនកូរ៉េខាងត្បូងបានធ្វើពហិការរាល់អ្វីៗទាំងអស់ ដែលផលិតដោយជប៉ុន ខណៈជប៉ុន បានដាក់កម្រិតលើការនាំចេញវត្ថុធាតុដើម ដែលចាំបាច់នៅក្នុងខ្សែសង្វាក់ផ្គត់ផ្គង់ផលិតកម្មបច្ចេកវិទ្យារបស់ប្រទេសកូរ៉េខាងត្បូង ដែលក្រុមអ្នកសេដ្ឋកិច្ចបានចាត់ទុកជាអាវុធប្រើប្រាស់ក្នុងសង្គ្រាមពាណិជ្ជកម្ម។
រថយន្តម៉ាក Lexus ស្រាបៀរអាសាហ៊ី និងគ្រឿងសំអាងប្រណីត សុទ្ធតែស្ថិតក្នុងបញ្ជីទំនិញ ដែលប្រជាជនកូរ៉េខាងត្បូងបានឈប់ទិញ ចាប់តាំងពីមានភាពតានតឹងកាន់តែខ្លាំងឡើង ដោយសារតែជម្លោះលើសំណង ក្នុងអំឡុងពេលដែលជប៉ុនជាមួយឧបទ្វីបកូរ៉េ។
ខែ កញ្ញាកន្លងមក គឺជាខែអាក្រក់បំផុតសម្រាប់ការលក់រថយន្តរបស់ជប៉ុន ចាប់តាំងពីសង្គ្រាមពាណិជ្ជកម្មកូរ៉េខាងត្បូង និងជប៉ុនបានកើតឡើង។
យោងតាមសមាគមអ្នកចែកចាយ និងអ្នកចែកចាយរថយន្តកូរ៉េ (KAIDA) រថយន្តដែលបានចុះបញ្ជីរបស់ជប៉ុន បានធ្លាក់ចុះ៥៩.៨ភាគរយ នៅក្នុងប្រទេសកូរ៉េខាងត្បូងនៅក្នុងខែ កញ្ញា បើប្រៀបធៀបទៅនឹងរយៈពេលដូចគ្នាកាលពីឆ្នាំមុន៕
