ដោយ វុត្ថា
ភ្នំពេញ៖ កម្ពុជាជាប់ចំណាត់ថ្នាក់លេខ៣ ក្នុងការនាំចេញទំនិញពីកម្ពុជាទៅជប៉ុន ហើយជប៉ុនជាប់ចំណាត់ថ្នាក់លេខ៩ ក្នុងការនាំទំនិញមកកម្ពុជា ទំហំពាណិជ្ជកម្មរវាងប្រទេសទាំងពីរមានកំណើនគួរឱ្យកត់សម្គាល់ ។
កម្ពុជាជាប់ចំណាត់ថ្នាក់ទី៣ នៃការនាំចេញទំនិញទៅប្រទេសជប៉ុន
លោក ប៊ុន ចន្ធី អនុរដ្ឋលេខាធិការក្រសួពាណិជ្ជកម្ម ក្នុងជំនួបពិភាក្សាការងារជាមួយលោក ARAI Hiroyuki ទីប្រឹក្សាពិសេសនៃគណៈរដ្ឋមន្ត្រីជប៉ុន កាលពីថ្ងៃទី ១៧ ខែតុលាម្សិលមិញនេះ បានបញ្ជាក់ថា កំណើននៃទំហំពាណិជ្ជកម្មរវាងប្រទេសទាំងពីរមានសន្ទុះយ៉ាងខ្លាំងនៅប៉ុន្មានឆ្នាំចុងក្រោយនេះ ក្នុងទំហំទឹកប្រាក់ប្រមាណ ១៥៨៨ លានដុល្លារអាមេរិក ក្នុងឆ្នាំ២០១៨។
លោកបន្តថា ក្រសួងពាណិជ្ជកម្មបាននឹងកំពុងខិតខំប្រឹងប្រែងក្នុងការជំរុញពាណិជ្ជកម្មរវាងប្រទេសទាំងពីរ ផ្អែកតាមរយៈជំនួបពិភាក្សាការងារ វេទិកាធុរកិច្ច ការផ្គូរផ្គងវិនិយោគគិន និងកិច្ចសម្រួលពាណិជ្ជកម្ម ដើម្បីទាក់ទាញអ្នកវិនិយោគផ្ទាល់ពីជប៉ុន។
លោករំពឹងថា រដ្ឋាភិបាលជប៉ុននឹងបន្តផ្តល់ជំនួយទាំងថវិកា បច្ចេកទេស និងធនធានមនុស្សដល់កម្ពុជាបន្តទៀតក្នុងការចូលរួមចំណែកអភិវឌ្ឍប្រទេសកម្ពុជា។
លោក ARAI Hiroyuki ទីប្រឹក្សាពិសេសនៃគណៈរដ្ឋមន្ត្រីជប៉ុនឱ្យដឹងដែរថា ការអភិវឌ្ឍ និងកិច្ចសហប្រតិបត្តិការរវាងប្រទេសទាំងពីរ កម្ពុជា-ជប៉ុនលើគ្រប់វិស័យកាន់តែល្អប្រសើរនាពេលកន្លងមកនេះ ។
ជាមួយគ្នានេះ លោកចង់ឱ្យអ្នកវិនិយោគជប៉ុនសហការជាមួយអ្នកវិនិយោគកម្ពុជា មិនត្រឹមតែផលិតសម្រាប់តែការនាំចេញប៉ុណ្ណោះទេ គឺថែមទាំងផលិតសម្រាប់ផ្គត់ផ្គង់ទីផ្សារនៅកម្ពុជាផងដែរ ដោយបង្កើនទំនុកចិត្ត និងជំរុញការប្រើប្រាស់ផលិតផលក្នុងស្រុក តាមរយៈការប្រើប្រាស់ស្លាកសម្គាល់រួម «ផលិតដោយជប៉ុន-កម្ពុជា នៅក្នុងប្រទេសកម្ពុជា»។
លោកក៏បានស្នើរឱ្យបង្កើនកិច្ចសហប្រតិបត្តិការល្អ និងរិះរកវិធីសាស្ត្រការបង្កើនសហគ្រាសធុនតូច-មធ្យម (SMEs) ជប៉ុន និងកម្ពុជា ដោយជួលកម្មករជំនាញកម្ពុជាដែលមានជំនាញ និងបទពិសោធន៍ធ្វើការនៅប្រទេសជប៉ុនស្រាប់ឱ្យមកធ្វើការនៅក្នុងស្រុក ដើម្បីផលិតហើយលក់ក្នុងស្រុក សំដៅកាត់បន្ថយចំណាយលើការនាំចូល។
លោកក៏មានបំណងជួយឱ្យកម្ពុជាទទួលបានចំណេះដឹងបន្ថែមពីអ្វីដែលបានសហការគ្នា និងពង្រឹងទំនាក់ទំនងឱ្យកាន់តែជិតស្និតជាមួយកម្ពុជា ពិសេសលើការបង្កើតឱ្យមានជំនួបវិនិយោគិន SMEs ជប៉ុន-កម្ពុជា ដោយសារតែទាំងនិយោជិក និងកម្មករជំនាញកម្ពុជាដែលកំពុងធ្វើការតាមបណ្តាក្រុមហ៊ុន/សហគ្រាស នៅប្រទេសជប៉ុនសព្វថ្ងៃចំនួនប្រមាណជា ១២,០០០ នាក់ នឹងក្លាយជាកត្តាមួយជួយជំរុញឱ្យអ្នកវិនិយោគជប៉ុនសម្រេចចិត្តមកបើកសហគ្រាសផលិត និងលក់រួមគ្នានៅកម្ពុជា។
កម្ពុជា និងជប៉ុន មានចំណងមិត្តភាពជាយូរមកហើយ ដែលជាហេតុនាំឱ្យប្រទេសទាំងពីរមានកិច្ចសហប្រតិបត្តិការយ៉ាងស្អិតរមូតទាំងវិស័យការទូត និងវិស័យសេដ្ឋកិច្ច-ពាណិជ្ជកម្ម ។
យោងតាមរបាយការណ៍ចុងក្រោយ របស់អង្គការពាណិជ្ជកម្មក្រៅប្រទេសជប៉ុន បានឱ្យដឹងថា ការនាំចេញកម្ពុជាទៅកាន់ជប៉ុន មានទំហំទឹកប្រាក់ប្រមាណ៧៩២លានដុល្លារក្នុងត្រីមាសទី១ ឆ្នាំ ២០១៩ កើនឡើង ៣៤ភាគរយ បើធៀបនឹងរយៈពេលដូចគ្នាកាលពីឆ្នាំមុន ខណៈការនាំចូលកម្ពុជាពីជប៉ុនមានទំហំទឹកប្រាក់ប្រមាណ២៥៦លានដុល្លារ៕
ចំណងជើងអត្ថបទដូចជាខុសន័យ ឬក៏ចេតនាសរសេរខុស។ បើសរសេរថា “ជប៉ុនជាប្រទេសទី២ ដែលកម្ពុជាបាននាំទំនិញច្រើនទៅកាន់ប្រទេសនេះ បន្ទាប់ពីសហភាពអឺរ៉ុប” បានវាត្រូវន័យ
ចំណងជើងអត្ថបទដូចជាខុសន័យ ឬក៏ចេតនាសរសេរខុស។ បើសរសេរថា “ជប៉ុនជាប្រទេសទី៣ ដែលកម្ពុជាបាននាំទំនិញច្រើនទៅកាន់ប្រទេសនេះ បន្ទាប់ពីសហភាពអឺរ៉ុប និងសហរដ្ឋអាមេរិក” បានវាត្រូវន័យ